Zakir Əhmədov: "Ölkə şaxələndirmə siyasəti sayəsində iqtisadi-siyasi dividendlər qazanır"
Azərbaycan dünyanın qlobal rəqabət qabiliyyətlilik reytinqində öz mövqeyini il ərzində bir qədər də yaxşılaşdırıb. Bu barədə Ümumdünya İqtisadi Forumu (ÜİF) tərəfindən hazırlanan reytinq cədvəli deməyə əsas verir.
Belə ki, Azərbaycan ötən ildən bu yana öz mövqeyini yaxşılaşdıraraq bir pillə irəliləyib və siyahıda 37-ci yeri tutub.
Keçmiş SSRİ respublikaları arasında Rusiya 43, Litva 35, Estoniya 30, Qazaxıstan 53, Ukrayna 85-ci yerdə qərarlaşıb. Belarus ümumiyyətlə reytinqə düşməyib.
Siyahıda lider üçlük dəyişməyib: İsveçrə, Sinqapur və ABŞ.
ÜİF ölkələrin rəqabət qabiliyyətlilik reytinqini 110-dan çox göstərici əsasında hazırlayır. Bura infrastruktur, əmtəə və əmək bazarının səmərəliliyi, təhsil və səhiyyənin keyfiyyəti, ölkədə makroiqtisadi şərait, innovasiya, maliyyə bazarının inkişafı və s. daxildir. Yəni sözügedən meyarlar əsasında reytinq cədvəli hazırlanır.
Bütövlükdə ekspertlər Azərbaycanın reytinq cədvəlində tutduğu mövqeyi necə dəyərləndirir? Məsələyə münasibət bildirən ekspert Zakir Əhmədovun sözlərinə görə, prinsipcə, bunu qənaətbəxş saymaq olar: "Ona görə ki, ilbəil Azərbaycanın yeri dəyişir. Məsələ ondadır ki, Azərbaycan ildən-ilə iqtisadiyyatın rəqabət qabiliyyətliliyini artırır. Nəticədə bu, qlobal rəqabət qabiliyyətlilik üzrə hesabatlarda əksini tapır. Qlobal rəqabət qabiliyyətlilik indeksi qlobal sorğunun nəticələrinin və xüsusi statistik məlumatların kombinasiyasına əsaslanan qlobal və ən nüfuzlu tədqiqatdır.
İndeks dövlətlərin iqtisadi sahədə dövlət siyasətinin səmərəliliyini, həyat səviyyəsini, artım tempini və s. dəyərləndirən 110 parametr üzrə göstəricilərə uyğun bölgüsüdür. Həmin tədqiqatın nəticələrinə görə dünya ölkələrinin iqtisadi rəqabət qabiliyyətlilik göstəricisi üzrə reytinqi tərtib edilir. Qeyd etmək lazımdır ki, bu və ya digər ölkəyə münasibət təkcə onun iqtisadi sahədə əhalinin rifah halının yüksəldilməsinə istiqamətlənmiş uğurlarına əsaslanmır. Bu, beynəlxalq biznesin nümayəndələrinin həmin ölkəyə münasibətdə yekdil fikridir. Rəqabət qabiliyyətliliyin artması onu göstərir ki, Azərbaycan müstəqil iqtisadi siyasət yürüdür. Şaxələndirmə siyasəti sayəsində iqtisadi-siyasi dividendlər qazanır. Bütün bunlar yaxşıdır və Azərbaycanın dünyada imicinin yüksəlməsinə xidmət edir. O baxımdan sözügedən dəyərləndirməyə müsbət prizmadan yanaşıram".
Vidadi ORDAHALLI
