Nüsrət İbrahimli: "İkinci əl avtomobillərin satış qiymətinin yüksəlməsi gözlənilən idi"
Avtomobil bazarında maşınların satış qiymətinin qalxdığı iddia olunur. Bildirilir ki, ikinci əl avtomobillərin satış qiyməti artıb. Müxtəlif markalı avtomobillərin qiyməti 1000-1500 manat dəyərində bahalaşıb.
Qeyd edək ki, devalvasiyadan sonra ölkədə daşınmaz əmlakın alıcısı azalıb. Avtomobil sahibləri öz maşınlarını satmaqda çətinlik çəkir. Çünki bazarda alıcı əvvəlki illərlə müqayisədə çox azdır.
Satıcıların bildirdiyinə görə, son iki həftədə avtomobil bazarında nisbi canlanma yaranıb. Ötən illə müqayisədə bazar olduqca zəifdir. Ancaq ilin əvvəli ilə müqayisədə canlanma var. Satıcılar bildirir ki, hazırda alıcılar əsasən "Mercedes", "Opel" və "Lada" markalı avtomobillərlə maraqlanır.
Maşın bazarında alıcının kəskin azaldığı bir dönəmdə ikinci əl avtomobillərin satış qiyməti nə səbəbdən qalxıb? Daşınmaz əmlak məsələləri üzrə ekspert Nüsrət İbrahimli "Bakı-Xəbər"ə açıqlamasında ikinci əl avtomobillərin satış qiymətinin yüksəlməsinin gözlənilən olduğunu bildirdi: "Birinci və ikinci devalvasiyadan sonra yeni avtomobillərin satış qiyməti iki dəfə artdı. Ancaq ikinci əl avtomobillərin təkrar bazarında isə qiymət artımı olmamışdı. Əksinə, ikinci əl avtomobillərin satış qiyməti düşmüşdü. Belə bir vəziyyət alıcıları işlənmiş avtomobil almağa stimullaşdırdı. Alıcılar təzə avtomobil yox, ikinci əl maşın almağa üstünlük verdi. Məsələn, o vaxt maşın bazarında Almaniya istehsalı olan avtomobilin təzəsi 80 min manat, bir il işlənəni 60, iki il sürülmüş maşın isə 45 min manat dəyərində idi. Bazarın bu vəziyyəti alıcıları stimullaşdırırdı ki, onlar işlənmiş nəqliyyat vasitələrinə meyl etsin. Bu vəziyyət bir müddət bazarda yaşandı və ikinci əl avtomobillərin satış qiymətinin yüksəlməsi gözlənilirdi".
N.İbrahimlinin sözlərinə görə, maşın bazarında qiymət 1000-1500 manat artıb. Amma gələcəkdə bu rəqəm daha da arta bilər. Ekspertin fikrincə, ikinci əl avtomobillərin satış qiyməti gələn ilin əvvəlində ikiqat artacaq.
Günel CƏLİLOVA
