Ruslan Atakişiyev: "Nəticədə neft amilindən asılılıq azalmağa doğru gedəcək"
Maliyyə naziri Samir Şərifov gələn ilin dövlət büdcəsində neftdən daxilolmaların hesablanması üçün neftin 1 barrelinin baza qiymətinin 40 dollardan götürüldüyünü açıqlayıb. 2017-ci ilin dövlət büdcəsinin əsas prioritetlərini açıqlayan nazir qeyd edib ki, büdcə layihəsi hazırlanarkən dünya iqtisadiyyatında baş verənlər nəzərə alınıb.
S.Şərifovun sözlərinə görə, gələn il Azərbaycan Dövlət Neft Fondundan büdcəyə nəzərdə tutulan transfert cari illə müqayisədə əhəmiyyətli dərəcədə azalacaq ki, bu da dövlət başçısının verdiyi müvafiq tapşırıqların icra olunması deməkdir: "Lakin nəzərə alsaq ki, gəlirlərimiz əhəmiyyətli dərəcədə azalıb, çalışmalıyıq ki, xərclərimizi gəlirlərimizlə uzlaşdıraq. Xərclərimiz gəlirlərlə ayaqlaşmalıdır. Xərclər siyasətimiz daha sərt olacaq. Bununla əlaqədar gələn il Azərbaycan Respublikası Dövlət Neft Fondndan transfert cari illə müqayisədə əhəmiyyətli dərəcədə azalacaq. 1,5 mlrd. manat həcmində azalmadan söhbət gedir. Həm gömrük daxilolmaları, həm də bir qədər vergi daxilolmaları artacaq. Hazırda daha səmərəli xərclərə üstünlük verilir. Xərclərin optimallaşdırılması, ixtisarı istiqamətində də mühüm tədbirlər görüləcək. Yəni biz fondun vəsaitlərindən daha az istifadə edərək, digər mənbələrdən əldə olunan vəsaitlərə müraciət etməliyik".
Qeyd edək ki, Nazirlər Kabinetinin sentyabrın 22-də keçirilən iclasında 2017-ci ilin dövlət büdcəsinin layihəsi müzakirə edilib. Büdcə sistemi haqqında qanuna uyğun olaraq Prezidentə təqdim olunub.
Bütövlükdə transfertlərin 1,5 milyard azaldılması fonunda büdcənin əsasən gömrük və vergi daxilolmaları hesabına formalaşdırılması nə dərəcədə realdır?
Məsələyə münasibət bildirən İqtisadi Resursların Öyrənilməsi Mərkəzinin sədri Ruslan Atakişiyevin fikrincə, prinsipcə, bu mümkündür: "Çünki bunu bir sıra faktorlar şərtləndirir. Məsələ ondadır ki, vergi ödəyicilərinin sayının artırılması, vergi ödəyicilərinin kiçik, orta və böyük sahibkara çevrilməsi bu qənaətə gəlməyə əsas verir. Eyni zamanda, bütün bunlar vergi islahatlarına uyğun olan bir tələbdir. Onu da qeyd edim ki, ölkə başçısının 4 avqustda vergi islahatları ilə bağlı imzaladığı fərman mühüm əhəmiyyətə malikdir. Ona görə ki, 2017-ci ilin 1 yanvarından başlayaraq vergi sahəsində geniş islahatların aparılması gözlənir. Həmin dövrdən başlayaraq vergi sahəsində bir sıra yeniliklər tətbiq olunacaq. Hesab edirəm ki, sözügedən yeniliklər gömrük və vergi daxilolmalarının artmasına şərait yaradacaq. Bütün bu görülən işlər şərait yaradacaq ki, vergi ödəyicilərinin sayı artsın. Nəticədə neft amilindən asılılıq azalmağa doğru gedəcək". Vidadi ORDAHALLI
