İldırım Qurbanov: "Daxili istehsalı stimullaşdırmaq, yerli emal sahələrini daha da genişləndirmək lazımdır"
"Bu gün başlıca məsələ məzənnə yox, məzənnə-inflyasiya cütlüyüdür". Məlum olduğu kimi, bunu mətbuata açıqlamasında Azərbaycan Mərkəzi Bankı İdarə Heyətinin sədri Elman Rüstəmov deyib. Onun sözlərinə görə, əsas məqsəd inflyasiyanı birrəqəmli həddə endirməkdir:
"Dünyada da biz gördük ki, avro-dollar məzənnəsində 30 faizlik fərq yarandı, sonradan kurs sabitləşdi. Bu və ya digər dövlətdə qiymətlər sabit qalırsa, heç kim həyəcan təbili çalmır. Bizim başlıca məqsədimiz ikirəqəmli inflyasiyanı aşağı salmaqdır. Yəni məqsəd həm əhali, həm biznes, həm də dövlət üçün inflyasiyanı məqbul səviyyəyə düşürməkdir. Bütün mərkəzi bankların qayğısı birrəqəmli aşağı inflyasiyaya nail olmaqdır. Yuxarı inflyasiya və devalvasiya iqtisadiyyat, iqtisadiyyatın bütün subyektləri üçün zərərlidir".
Bununla yanaşı, ölkədə inflyasiyanın 11 faizlik səviyyədə olduğunu deyən E.Rüstəmov bildirib ki, hazırda inflyasiya ilə bağlı proqnoz vermək çox çətindir: "Biz 9 ayın nəticələrini gözləyirik. İnflyasiya proqnozu kurs-məzənnə dayanıqlığından asılı olacaq. Bu isə bütövlükdə makroiqtisadiyyatın bütün istiqamətlərinin müvəffəqiyyətindən asılıdır. Amma biz nikbinik. Situasiyanın gərginliyinə baxmayaraq, gördüyünüz kimi situasiyanı idarə edirik. Bazarda müəyyən gərginlik var idi. Valyuta qıtlığı və digər gərginlikləri biz aradan götürdük. Amma qarşımızda daha fundamental sabitliyə nail olmaq məqsədi var".
İnflyasiyanın hansı həddə olması birbaşa iqtisadiyyata öz təsirini göstərir. Əlbəttə, inflyasiyanın yüksək olması arzuolunan deyil. Ona görə ki, bu, aztəminatlı ailələrin sosial vəziyyətinə daha çox mənfi təsir göstərir. Bütün bu deyilənlərin fonunda inflyasiyanı birrəqəmi həddə endirmək nə dərəcədə mümkündür?
Sözügedən məsələ ilə bağlı fikirlərini "Bakı-Xəbər"lə bölüşən iqtisadçı-ekspert İldırım Qurbanovun sözlərinə görə, inflyasiyanı birrəqəmli həddə endirmək üçün bir sıra kompleks tədbirlərin görülməsinə ehtiyac var: "Milli valyutanı ABŞ dollarına nisbətdə daha dəyərli etmək üçün sistemli və ardıcıl tədbirlərin görülməsinə ehtiyac var. Bir sözlə, milli valyutanın möhkəmlənməsi istiqamətində bir sıra addımlar atılmalıdır. Etiraf etmək lazımdır ki, bu yöndə dövlət tərəfindən müəyyən kompleks tədbirlər görülür. Artıq vergi və digər sahədə islahatlar aparılır. Ölkədə sahibkarlığın inkişafı, işgüzar biznes mühitinin yaradılması ilə bağlı görülən tədbirləri qeyd etmək olar. Bu cür addımlar davamlı olsa, inflyasiyanı birrəqəmli həddə endirmək mümkündür. Bazar iqtisadiyyatı şəraitində tələb və təklif qanunu var. Təklif tələbi üstələsə, o zaman qiymətlər sabitləşəcək və inflyasiyanın həddi daha da aşağı düşəcək. Ona görə də daxili istehsalı stimullaşdırmaq, yerli emal sahələrini daha da genişləndirmək lazımdır".
Vidadi ORDAHALLI
