Rüfət Quliyev: "SOCAR manatla istiqrazlar buraxarsa, bu, qiymətli kağız bazarında müsbət dönüş yaradacaq"
Azərbaycan Respublikasının Dövlət Neft Şirkəti (SOCAR) gələcəkdə manat istiqrazlarının buraxılması imkanını istisna etmir. Bu barədə SOCAR prezidenti Rövnəq Abdullayev media nümayəndələrinə açıqlamasında deyib. Onun sözlərinə görə, əhali arasında sentyabrın 20-də buraxılmış dollar istiqrazlarına böyük maraq müşahidə olunur.
Dollarla buraxılan istiqrazlara böyük maraq olduğu üçün milli valyuta ilə də istiqrazların buraxılması gözlənir.
Mütəxəssislərin fikrincə, manatla istiqrazların buraxılması ölkə iqtisadiyyatına müsbət təsir edəcək və manata inamı yenidən bərpa edəcək.
Milli Məclisin İqtisadi siyasət, sənaye və sahibkarlıq komitəsinin üzvü, millət vəkili Rüfət Quliyev "Bakı-Xəbər"ə açıqlamasında qeyd etdi ki, manatla istiqrazların buraxılmasının müsbət təsirləri ola bilər: "Dollar istiqrazları sentyabrın 20-dən etibarən buraxılıb. Qısa müddət ərzində SOCAR istiqrazlarına böyük maraq yaranıb. İmkanı olan şəxs çalışır ki, istiqraz sahibi olsun. Manat istiqrazlarının da buraxılması gözlənir. Məncə, bu addım yerində atılmış olar. Çünki manatla istiqraz buraxılarsa, bu, milli valyutaya inamı, etibarı yenidən bərpa edəcək".
Həmsöhbətimiz hesab edir ki, SOCAR manatla istiqrazlar buraxarsa, bu, qiymətli kağız bazarında dönüş yaradacaq: "İstər hüquqi, istərsə də fiziki şəxslər çalışacaq ki, əllərində olan vəsaitlə istiqraz sahibi olsun. İstiqrazların qiyməti azalan deyil, alıcılar 5 faiz gəlir əldə edəcək".
Millət vəkili onu da vurğuladı ki, bu gün bank sektorunda yaşanan vəziyyət ürəkaçan deyil. Ard-arda bir neçə bank bağlandı, devalvasiyadan sonra kommersiya banklarında əmanəti olanlar öz depozitlərini geri çəkdilər. Belə olan şəraitdə insanların banklara inamı itdi: "Banklardan vəsaitlərini geri çəkənlər rahatlıqla vəsaitlərini SOCAR-ın istiqrazına yönəldə bilər. SOCAR etibar olunası, güvəniləsi və həm də dövlət şirkətidir. SOCAR dollarla yanaşı, manatla da istiqrazlar buraxarsa, bunun yalnız faydası olar".
Günel CƏLİLOVA
