Vahid Məhərrəmov: "Hazırda gülçülük sahəsində ciddi rəqabət var"
İnsanların ən çox sevdiyi, buna görə də bir-birinə hədiyyə etdiyi gül həm də toy, nişan mərasimlərində istifadə edilir. Eləcə də güldən dekorasiya məqsədilə geniş çeşiddə yararlanırlar. Bu gün ölkədə yeni salınan və yaxud abadlaşdırılan parklarda müxtəlif gül növlərindən istifadə edilir. Eyni zamanda, bu da bir faktdır ki, gül yetişdirilməsi qazanc gətirən bir təsərrüfat fəaliyyəti kimi iqtisadiyyatın aparıcı sahələrindən birinə çevrilib.
Dünyanın bir çox ölkələri gülçülükdən qazanc əldə edir.
Qeyd edək ki, ölkəmiz müxtəlif güllərin yetişdirilməsi ilə bağlı əlverişli iqlim şəraitinə malikdir.
Bir zamanlar Bakıətrafı kəndlər - Zabrat, Maştağa, Nardaran, Bilgəh, Mərdəkan və Şüvəlan ərazilərində gülçülük sovxozları fəaliyyət göstərib. Şəki-Zaqatala bölgəsində isə respublikada ilk dəfə olaraq sənaye xarakterli gülçülük təsərrüfatı olub. Bakı kəndlərindəki gülçülük təsərrüfatları həm Azərbaycanı, həm də keçmiş Sovet İttifaqını güllə təmin edirdi. Ancaq Sovet İttifaqı dağılandan sonra ölkəmizdə gülçülük təsərrüfatı geriləməyə başladı.
Hazırda ölkənin gül bazarı xarici ölkələrdə yetişdirilən güllərin ümidinə qalır. Ancaq, qeyd etdiyimiz kimi, vaxt vardı Azərbaycanda istehsal olunan güllər SSRİ bazarında əsas yeri tuturdu.
Azərbaycanın gülçülük təsərrüfatının əvvəlki şöhrətini bərpa etmək üçün hansı işlər görülməlidir? Mövzu ilə bağlı aqrar sahə üzrə ekspert Vahid Məhərrəmova müraciət etdik. O, "Bakı-Xəbər"ə açıqlamasında qeyd etdi ki, gülçülük kapital tələb edən sahədir: "Bəllidir ki, dünya bazarında Hollandiya, İsrail, İran və digər ölkələr vaxtında işlər həyata keçirərək hazırda bu istiqamətdə öz sözünü deyir. Azərbaycanın gülçülük sahəsində təcrübəsi olmasına baxmayaraq, artıq geri qalıb".
Həmsöhbətimizin fikrincə, gülçülük təsərrüfatının inkişafı üçün elmi müəssisə olmalıdır: "Həmin müəssisədə yeni sort güllərin yetişdirilməsi müzakirə olunmalıdır. Hansı sort gülün daha məhsuldar, keyfiyyətli və tələb olunan olması nəzərə alınmalıdır. Sovet dönəmində Bakıda istehsal olunan güllərə Rusiya bazarında tələbat vardı. O vaxt Azərbaycan güllərinə maraq var idi. Ancaq indi gülçülük sahəsində ciddi rəqabət var. Rəqabətə dözümlü məhsul istehsal etmək üçün bu işə elmi yanaşma lazımdır. Həmçinin, gülçülük təsərrüfatının inkişafı ilə bağlı dövlət proqramı da qəbul oluna bilər. Sahibkarlara güzəştli kredit də verilə bilər. Bir sıra tədbirlər keçirməklə bu sahəni yenidən dirçəltmək olar".
Günel CƏLİLOVA
