Vüqar Bayramov: "Son hərraclar onu göstərir ki, son günlər bankların və vətəndaşların dollara tələbi əvvəlki dövrlə müqayisədə azalıb"
Kommersiya banklarının dollara tələbatı kəskin azalıb. Bu son hərraclarda da özünü göstərir. Sentyabrın 22-də Azərbaycan Respublikası Dövlət Neft Fondu (ARDNF) tərəfindən 100 milyon ABŞ dolları məbləğində vəsait hərraca çıxarılıb və bu vəsaitdən 61,4 milyon dolları 19 banka satılıb.
Ötən gün Dövlət Neft Fondu (DNF) növbəti valyuta hərracı keçirib. Fonddan fins.az-a verilən xəbərə görə, son hərracda 100 milyon ABŞ dolları məbləğində vəsait satışa çıxarılıb. Həmin vəsaitdən 70,2 milyon ABŞ dolları satılıb. Hərraca çıxarılan ABŞ valyutasını 20 bank alıb. DNF-dən bildiriblər ki, hərraclar vasitəsilə valyuta satışı il ərzində davam etdiriləcək.
Son bir həftə ərzində keçirilən hərraclar bir daha sübut etdi ki, kommersiya banklarının dollara tələbatı azalıb.
Məsələ ilə bağlı fikir bildirən iqtisadçı-ekspert Vüqar Bayramov "Bakı-Xəbər"ə açıqlamasında qeyd etdi ki, hazırda kommersiya banklarının dollara tələbatının azalması müşahidə olunur: "Mərkəzi Bank və Dövlət Neft Şirkəti tərəfindən yay aylarında hərraca çıxarılan valyutanın həcmi çox az oldu. Yay aylarında hərraca çıxarılan vəsait tələbatı ödəmirdi. Çünki yeni tədris ilinin başlanması və xarici ölkələrə səfərə gedənlərin sayının çox olması dollara tələbatı artırırdı. Təbii ki, bu tələbi kommersiya bankları ödəyə bilmirdi. Nəticədə "qara bazar"ın yaranması müşahidə olundu. Xatırladım ki, iyunun 1-də mətbuata açıqlamamda bildirmişdim ki, Mərkəzi Bank və Dövlət Neft Fondu birlikdə auksiona 300 milyon dollar vəsait çıxarsın və bu, nəticə etibarilə, proseslərin stabilləşməsinə imkan verəcək. Beləliklə, Mərkəzi Bank sentyabrın əvvəlində 300 milyon dollar vəsaiti hərraca çıxardı və proqnozlaşdırdığımız kimi stabillik yarandı".
İqtisadçının sözlərinə görə, keçirilən son hərracın nəticələri dollara tələbin azaldığını göstərir. Yeni tədris ili başladığından, xaricdə təhsilə gedənlər yoxdur və istirahət üçün də əcnəbi ölkələrə gedənlərini sayı azalıb: "Digər tərəfdən, Dövlət Neft Fondu tərəfindən hərraca çıxarılan valyuta həcminin çox olması bazarda stabillik yaradaraq vətəndaşların dollara tələbatını azaltdı. Son hərraclar onu göstərir ki, son günlər bankların və vətəndaşların dollara tələbi əvvəlki dövrlə müqayisədə azalıb".
Günel CƏLİLOVA
