Ceyhun Musaoğlu: "Müğənnilərin borcları çoxdur, bundan sonra daha da artacaq, belə getsə, başqa sənət tapmağa məcbur olacaqlar"
Müğənnilər var-dövlətdən, imkandan danışanda, necə deyərlər, ağızlarına "çullu dovşan" sığmır. Vergi ödəməyə gələndə isə bəzi müğənnilər elə gileylənir ki, adam istəyir cibində olanını da çıxarıb onlara versin...
İstənilən sahədə çalışan, gəlirinin miqdarından asılı olmayaraq, hər kəs dövlətin vergisini ödəyir. Vergi ödəmək hər bir vətəndaşın vətəndaşlıq borcudur. Ancaq bunu bəzi müğənnilərə aid edə bilmərik. Çünki onlar toylarda baha qiymətə oxuyub vergini verməməkdə israrlıdır.
Məlumat üçün bildirək ki, Vergilər Nazirliyi vergi borcuna görə ölkədən getmə hüququ məhdudlaşdırılmış fiziki şəxslərin adını açıqlayıb. Siyahıda əməkdar artist Abbas Bağırov da var. Bir müddət öncə Vergilər Nazirliyinin A.Bağırovu vergi ödəmədiyi üçün 30 min manat cərimələdiyi haqda məlumat yayılmışdı.
Vergidən yayınanların, xüsusilə də şou-biznes təmsilçilərinin ölkədən çıxışına qadağa qoyulması ölkə ictimaiyyəti tərəfindən müsbət qarşılanır.
Ancaq ölkədən çıxışına qadağa qoyulan müğənni Abbas Bağırov sosial şəbəkə vasitəsilə bu məsələyə fərqli münasibət bildirib: "Dəyərli dostlar və diqqətli mətbuatımız, inşallah, hər şey yaxşı olacaq. Azərbaycandayam və yaxın 100 ildə bu ölkədən heç yerə gedən deyiləm. Cənab Prezident mənə bu qədər fəxri ad verib. Xalqın sevgisini heç zaman itirmərəm. Azərbaycanımız naminə uğurlarımız bol olsun".
Müğənni vergi işçisinin toyuna getmədiyi üçün ona vergi borcu yazıldığını bildirib: "Mənə zəng vurublar ki, sizin 30 min manat borcunuz var və siz ƏDV-yə düşdünüz. Sübutsuz və mənimlə heç bir hesabat aparılmadan bu addımı atdılar. Belə şey başıma birinci dəfə gəlmir. 10 min manata toya gedirəmsə, onun hamısını vergi əməkdaşı necə hesablaya bilər?
Bəs mənimlə çalışan musiqiçilər nə qazanır? Çəkilən kliplərə, mahnılarımın aranjimanlarına, toyda mənimlə birgə gedən musiqiçilərin alətlərinin yenilənməsinə xərclənən pullar hardandır? Kimə şikayət edək? Belə özbaşınalıq olmaz".
Vergi borcuna görə müğənnilərin ölkədən çıxışına qadağa qoyulmasına Jurnalist Ekspert Mərkəzi də reaksiya verib. Mərkəzin sədri Ceyhun Musaoğlu bu mövzuda açıqlama yayıb. Açıqlamada deyilir: "Vergilər Nazirliyi vergi borcu olan müğənnilərin ölkədən çıxışına qadağa qoyur. Yaxşı xəbərdir. Onların borcları çoxdur, bundan sonra daha da artacaq. Belə getsə, başqa sənət tapmağa məcbur olacaqlar. Vergilər Nazirliyi tarix yaza bilər. Cəmiyyətin manıslaşmasının qarşısını almağa gücümüz çatmırdı. Vergilər Nazirliyi bizi arzumuza çatdıra bilər.
Jurnalistlər Vergilər Nazirliyinin bu addımını təqdir etsə və dəstək versələr yaxşı olar. Hələ məsələnin ikinci tərəfi də var. Büdcəyə xeyli əlavə vəsait daxil olacaq ki, indiki məqamda bu, Azərbaycana çox lazımdır. Məsələn, jurnalist müsabiqədə min manat udur, 3 yerə vergi verir. O jurnalist ki, bəlkə də kirayədə yaşayır. Ancaq müğənnilər bütün günü maşınlarını, evlərini, telefon nömrələrini reklam edir. Necə olur, onlar təbliğatları üçün KİV-ə, xüsusən də televiziyalara reklam pulu ödəyir, dövlətin vergisini isə vermirlər? Halbuki, mənəvi baxımdan dövlətə vergi vermək vətəndaşın şərəf borcudur. Dövləti biz yaşatmalıyıq".
Millət vəkili Fazil Mustafa vergidən yayınan müğənnilərin ölkədən çıxışına qadağa qoyulmasına fərqli münasibət bildirdi. Onun fikrincə, toy müğənnilərinin çoxu ölkədən çıxarılmalıdır ki, geri qayıda bilməsin: "O zaman hər gün qarşılaşdığımız bu vəhşi toy adətlərində çəki-düzən yaratmaq üçün nələr etmək olmazdı. Onsuz da zəhlətökən səsgücləndiricidən fonoqramla oxunan mahnını eşidən yoxdur, əksəriyyət də musiqini deyil, öz bacardığını oynayır, israfçılıq da baş götürüb gedir. Artıq toyun müğənnisi olmayanda daha rahatlıqla və az məsrəflərlə bir yeni ailənin qurulmasına şahidlik etmək imkanımız yaranacaq. Bu zaman həm də toy sahibi "şadlıq evinin pulunu necə verəcəyəm" bədbəxtliyindən qurtulacaq, "iki gəncin xoşbəxtliyi, maddi rifahı üçün nələr etməliyəm" barədə düşünə biləcək. Allah hamının ocağında toy-düyün, xeyir işlər qismət etsin, ancaq bu gün şadlıq evlərində keçirilən toylar "Toy mafiyası"nın onsuz da çətin şərtlərdə yaşayan Azərbaycan insanına sırıdığı vəhşilikdən, israfçılıqdan, səhhət pozuntusundan başqa bir şey deyil. Müğənnilərlə məsələ düzəlsəydi, nə vardı ki... İnsanları gör nə vəziyyətə gətiriblər ki, Azərbaycanda xurafat və cəhalət əleyhinə olanlar belə, səbrsizliklə Məhərrəm ayının gəlişini gözləyir".
İqtisadçı-ekspert Rəşad Həsənli bizimlə söhbətində bildirdi ki, müğənnilərin vergidən yayınması sahəsində ciddi boşluqlar var idi. 2014-cü ilin sonundan etibarən müğənnilərin vergiyə cəlb olunması istiqamətində ardıcıl olaraq işlər görülməyə başlanıb: "Amma bununla yanaşı, bəzi problemlər hələ də yaşanır. Hətta bəzi şou təmsilçiləri vergi hesabatlarında gəliri az göstərir. Beləliklə, vergidən yayınma hallarının genişlənməsinə səbəb olur. İnzibati tədbirlərin tətbiq olunması Vergilər Nazirliyinin hüququdur. İnzibati tədbirlərin tətbiq olunması müğənnilərin vergi öhdəliklərinin yerinə yetirilməsinə səbəb ola bilər. Nəzərə almaq lazımdır ki, müğənnilər xarici ölkələrə tez-tez səfər edir. Vergidən yayınan müğənnilərin xaricə çıxışına qadağa qoyulması onların işinə mane olacaq. Əksər hallarda şou-biznes təmsilçilərinin xarici səfərləri biznes xarakterli olur və bu gəlirlərin itməməsi üçün məcburən müğənnilər vergi öhdəliyini yerinə yetirmiş olacaq. Vergidən yayınanların ölkədən çıxışına qadağa qoyulması yığımlara müsbət təsir edəcək. Amma digər bir problem odur ki, müğənnilərin göstərdiyi xidmət qarşılığında əldə etdiyi gəlirin tam məbləği gizlədilir. Bu problem kompleks tədbirlər nəticəsində öz həllini tapa bilər. Məsələn, xidməti təklif edən tərəf ödənişləri qəbzlə etməlidir".
Həmsöhbətimizin sözlərinə görə, adıçəkilən sektorda çalışanlar başa düşmür ki, onlar qazandığı vəsaitin bir qismini vergi şəklində ödəyərək ölkə əhalisinin rifahının yüksəlməsinə səbəb ola bilər: "Bu istiqamətdə kütləvi informasiya vasitələrinin, ictimaiyyətin üzərinə böyük iş düşür. Maarifləndirmə yolu ilə bu məsələ qabardılmalıdır ki, insanların üzərinə ictimai yük qoyulsun".
Günel CƏLİLOVA
