Ziya Məmmədov: "Hesab edirəm ki, ölkənin inkişafı naminə sahibkarlar, o cümlədən fiziki şəxslər belə hallardan çəkinməlidir"
Xəbər verildiyi kimi, Dövlət Gömrük Komitəsinin (DGK) sədri Aydın Əliyev sahibkarlara müraciət edib. Bununla bağlı yayılan məlumata görə, "Caspian European Club"un təşkilatçılığı ilə keçirilən biznes forumda A.Əliyev gömrük rəsmiləşdirilməsində qanun pozuntusuna yol verən sahibkarlara xəbərdarlıq ünvanlayıb:
"Mən iş adamlarının və mətbuat nümayəndələrinin burada olmasından istifadə edərək "ikili invoys"la işləyən sahibkarları bu cəhdlərindən əl çəkmələrinə çağırıram. Biz istəməzdik ki, iş adamları əziyyət çəksin. Lakin bu o demək deyil ki, artıq rəsmiləşdirilməsi bitmiş mallar üzərində biz öz tədqiqatımızı davam etdirməyəcəyik. Biz əməkdaşlıq etdiyimiz digər ölkələrin gömrük orqanları ilə qiymətlərin müəyyən edilməsi ilə bağlı da addımlar atırıq və sonra da əldə edilmiş rəsmi məlumatlara əsasən həmin idxalçıların büdcə ödəmələrini tam şəkildə həyata keçirməsinə nail oluruq".
Maraqlıdır, "ikili invoys" nə deməkdir və bəzi sahibkarların buna əl atmasında məqsədi nədir? Sözügedən məsələyə aydınlıq gətirən ekspert Ziya Məmmədovun sözlərinə görə, "ikili invoys" ikili faktura deməkdir: "Bəzi sahibkarların bunu etməkdə məqsədi gətirilən mala görə gömrük ödənişlərindən yayınmaqdır. Yəni bu o deməkdir ki, aldıqları malın qiymətini düzgün göstərmirlər. Məsələn, sahibkar ölkəyə mal gətirərkən həmin məhsulun real qiymətini gömrük rəsmiləşdirmələri zamanı olduğu kimi göstərmir. Az gömrük rüsumu ödəməkdən ötrü aldığı məhsulu real qiymətindən aşağı göstərir. Qiymət aşağı göstəriləndə gömrük ödənişləri də aşağı olur. Nəticədə həmin məhsulu ölkəyə gətirən bunu satarkən daha çox qazanc əldə edir. Ancaq bundan itirən dövlət büdcəsi olur. Çünki büdcə daxilolmaları azalır. Ancaq indi texniki imkanlar o qədər genişdir ki, bunu etmək o qədər də asan deyil. Çox asanlıqla müəyyən etmək olur ki, idxal olunan məhsulun real dəyəri nə qədərdir. Bu baxımdan DGK sədrinin xəbərdarlığı məntiqəuyğundur. Hesab edirəm ki, ölkənin inkişafı naminə sahibkarlar, o cümlədən fiziki şəxslər belə hallardan çəkinməlidir. Düzdür, vergidən yayınma hər bir ölkədə var. Birində az, digərində çox. Ancaq maksimum çalışmaq lazımdır ki, belə hallara yol verənlər az olsun".
Vidadi ORDAHALLI
