Vüqar Bayramov: "Yeni qaydaların tətbiq edilməsi prosedurun asanlaşdırılması baxımından vacibdir"
Vergilər Nazirliyinə daha bir səlahiyyət verilir. Belə ki, "Azərbaycan Respublikasının Vergi Məcəlləsində dəyişikliklər edilməsi haqqında" qanun layihəsinə əsasən, vergi orqanları vergi ödəyicisi olan fiziki və hüquqi şəxsin icra orqanının rəhbərinin ölkədən getmək hüququnun müvəqqəti məhdudlaşdırılmasına səbəb olmuş əsaslar aradan qalxdıqdan sonra dərhal həmin məhdudlaşdırmanın götürülməsi barədə qərar qəbul edə bilər. Bununla bağlı Vergi Məcəlləsinin 24.0.2-1-ci maddəsinə dəyişiklik edilməsi tövsiyə edilib.
Məlumat üçün qeyd edək ki, indiyədək vergi ödəyicisi olan fiziki və hüquqi şəxsin icra orqanının rəhbərinin ölkədən getmək hüququnun müvəqqəti məhdudlaşdırılmasına səbəb olmuş əsaslar aradan qalxdıqdan sonra vergi orqanları həmin məhdudlaşdırmanın götürülməsi barədə 2 iş günü ərzində məhkəməyə müraciət etməli idi. Qanuna təklif edilən bu dəyişiklik qəbul olunarsa, vergi orqanları dərhal həmin məhdudlaşdırmanın götürülməsi barədə qərar qəbul edə biləcək.
Qeyd edək ki, "Azərbaycan Respublikasının Vergi Məcəlləsində dəyişikliklər edilməsi haqqında" qanun layihəsi fiziki və hüquqi şəxslərin sahibkarlıq fəaliyyəti şərtlərinin asanlaşdırılması və vergi inzibatçılığının çevikliyinin gücləndirilməsi məqsədilə hazırlanıb.
Milli Məclisin İqtisadi siyasət, sənaye və sahibkarlıq komitəsinin sentyabrın 19-da keçirilən iclasında "Azərbaycan Respublikasının Vergi Məcəlləsində dəyişikliklər edilməsi haqqında" qanun layihəsi Milli Məclisin plenar iclasına tövsiyə edilib.
Ümumən sözügedən yeniliklərin əhəmiyyətini ekspertlər necə dəyərləndirir?
Məsələyə münasibət bildirən iqtisadçı-ekspert Vüqar Bayramov buna müsbət prizmadan yanaşdı: "Yeni qaydaların tətbiq edilməsi prosedurun asanlaşdırılması baxımından vacibdir. Nəticə etibarilə yeni qaydaların tətbiq edilməsi imkan verəcək ki, proseduru sadələşdirmək mümkün olsun. Nəzərə alaq ki, məhkəməyə müraciət etmək zaman alırdı və müəyyən müddət gözləməyə ehtiyac yaranırdı. Bu da vergi borcunu ödəmiş şəxslər üçün əlavə vaxt itkisi demək idi. Nəticədə sahibkarlar, ölkənin işgüzar həyatı bundan itirirdi. Ancaq məlum yeniliklərdən sonra vəziyyət bir qədər fərqli olacaq. Burada məqsəd həm sahibkarlar, həm də vətəndaşlar üçün daha yüngül, asan prosedurlarla vaxta qənaət etməklə qaydaların tətbiqindən ibarətdir. Vergi borcunu ödəmiş sahibkarlar və vətəndaşlar üçün bunun mühüm əhəmiyyəti var. Hesab edirəm ki, belə bir səlahiyyətin Vergilər Nazirliyinə verilməsi ümumən ölkədəki işgüzar mühitə müsbət təsir edəcək".
Vidadi ORDAHALLI
