"Bilirsiniz ki, rəqabət olan yerdə inkişaf olur"
Prezident İlham Əliyevin sədrliyi ilə Sabirabadın Mədəniyyət evində pambıqçılığın inkişafı məsələlərinə dair keçirilən respublika müşavirəsində ölkə başçısı çıxış edib. İlham Əliyev çıxışı zamanı kənd təsərrüfatında yeniliklərin tətbiq olunacağını və bunun da nəticəsində əhalinin həmin sahəyə marağının artacağını deyib. Prezident bildirib ki, bu sahədə rəqabət güclənməli, "Əmək" ordeni təsis olunmalıdır:
"Hesab edirəm ki, Azərbaycanda yeni bir orden təsis edilməlidir. Son vaxtlar mənim sərəncamımla bir neçə yeni orden təsis edilib. Ən böyük ordenimiz "Heydər Əliyev" ordenidir. Ondan sonra mənim sərəncamımla "Şərəf" ordeni, "Dostluq" ordeni təsis edilmişdir. Hesab edirəm ki, biz "Əmək" ordeni də təsis etməliyik. Müxtəlif sahələrdə - istər özəl, istər dövlət, fərqi yoxdur, yaxşı göstəricilər nümayiş etdirən insanları biz ordenlərlə, medallarla təltif etməliyik.
Hesab edirəm ki, biz bu ənənəni bərpa etməliyik. Göstəriş verirəm, Prezident Administrasiyası bu məsələ ilə bağlı öz təkliflərini mənə təqdim etsin. "Əmək" ordeninin bir neçə dərəcəsi ola bilər. Əgər yaxşı nəticələr olsa, birinci ordeni biz pambıqçılara təqdim edə bilərik".
Ölkə başçısı, həmçinin, rayonlararası rəqabət sisteminə keçidin vacib olduğunu da deyib: "Mən bəzi statistik göstəriciləri diqqətinizə çatdıranda, əlbəttə, istərdim sizdə və bütün Azərbaycan ictimaiyyətində dolğun fikir olsun ki, biz harada idik, hara düşmüşük və haraya qalxmaq istəyirik. Eyni zamanda, bir məqsədim də var idi göstərim ki, hansı rayonlarda işlər necə gedir.
Vaxtilə rayonlararası rəqabət mexanizmləri də var idi. Hesab edirəm ki, biz bunu təbii yolla bərpa etməliyik. Biz bunu necə bərpa edə bilərik ictimaiyyət bilsin ki, hansı rayonda nə qədər əkin sahələri var, hansı rayonda nə qədər pambıq yığılır, hansı rayonda məhsuldarlıq nə qədərdir. Hesab edirəm ki, rayonlar, bax, bu 3 parametr üzrə də bir-birilə yarışa çıxmalıdır. Əlbəttə ki, bu, sağlam rəqabət olmalıdır. Hesab edirəm ki, bu rəqabət rayon rəhbərlərini də, pambıqçıları da stimullaşdıracaq. Çünki yadımdadır, vaxtilə belə bir məlumat mütəmadi qaydada Azərbaycan mətbuatında dərc edilirdi. 1970-ci illərdə bizim mərkəzi qəzetlərdə pambığın, üzümün tədarükü ilə bağlı belə bir cədvəl verilirdi ki, hansı rayon nə qədər istehsal edib. Rayon əhalisi də baxırdı, qabaqda olanlar sevinirdi. Ondan sonra mükafatlandırma aparılırdı. Əfsuslar olsun ki, bu çox müsbət prinsiplər ya yaddan çıxır, ya tarixdən silinir. Biz buna bir daha baxmalıyıq, onları bərpa etməliyik".
Rayonlararası rəqabətin bərpası kənd təsərrüfatının inkişafına stimul verə bilərmi?
İqtisadçı Günel Fərhadqızı qəzetimizə açıqlamasında bildirdi ki, İlham Əliyevin Sabirabadda keçirdiyi müşavirə zamanı etdiyi nitq proqram xarakterli idi: "Bəli, həmin nitqdə əlaqədar qurumların diqqət yetirməli bir çox məqamlar var. Mövzudan uzaqlaşmamaq üçün mən bu barədə ətraflı danışmaq istəmirəm. Ölkə başçısı tamamilə haqlı olaraq bu məsələdə sovetlər dönəminə ekskurs edərək müəyyən müqayisələr apardı. Torpaq yerində, infrastruktur əvvəlkindən də yaxşıdır, qiymətin də daha da artırılacağına söz verildisə, niyə biz əvvəlkindən çox pambıq istehsal etməməliyik? Bir quruluş dağılanda o demək deyil ki, bütün stereotiplərdən imtina etməliyik. İqtisadiyyat yaxşı nə varsa, tətbiq olunmasını sevən sahədir. Ölkəmizdə kənd təsərrüfatı sahəsini prioritet elan etmək üçün bütün göstəricilər var. Bir neçə ildir kənd təsərrüfatı sanki unudulub. Televiziyalarda hansı sahədən nə qədər məhsulun götürüldüyü barədə, demək olar ki, məlumat verilmir. Hətta buna ironik yanaşanlar da olurdu. Ancaq təcrübə göstərir ki, bu, kəndçini əmək üçün stimullaşdıran amildir. Hazırda müxtəlif festivallar keçirilir. Keçmişdə olan "Məhsul bayramı"nın özünü də bərpa etmək olar. Burda pis nə var ki? Hər rayon öz istehasalını nümayiş etdirəcək. Ölkə başçısı "Əmək" ordeninin də təsis edilməsinə göstəriş verdi. Bunların hamısı bizə lazımdır. Rayonlararası rəqabətin kənd təsərrüfatına yalnız xeyri dəyə bilər. Bilirsiniz ki, rəqabət olan yerdə inkişaf olur. Çox məqbul bir təklif kimi qəbul edirəm".
Məhəmmədəli QƏRİBLİ
