"İndiki dövrdə pambığın alış qiyməti ən azı 70 qəpik olmalıdır"
"Pambıqçılığın inkişafı iqtisadi məsələlərin həlli ilə yanaşı, eyni zamanda, sosial məsələdir. Çünki mənə verilən məlumata görə, bu il 24 rayonda pambıq tarlalarında 70 minə yaxın insan işləyəcək və bu, məşğulluğun artırılması deməkdir". Bunu Prezident İlham Əliyev Sabirabadda pambıqçılığın inkişafına dair respublika müşavirəsində deyib.
Prezident pambığın alış qiymətinə də toxunaraq, onun 40 qəpikdən 50 qəpiyə qaldırıldığını və bunun çox ciddi artım olduğunu xatırladıb: "Mən bunu artıq qeyd etdim, pambığın alış qiyməti 40 qəpikdən 50 qəpiyə qaldırıldı. Əlbəttə ki, çox ciddi artımdır. Ancaq baxmaq lazımdır ki, bu işlərlə məşğul olaraq alış qiymətini bir daha qaldıraq. Burada əlbəttə ki, insanların gəlirləri xüsusi diqqət mərkəzində olmalıdır. Eyni zamanda, bu işin iqtisadi səmərəliliyi təmin edilməlidir. Giriş sözümdə qeyd etdiyim kimi, biz kəndliləri stimullaşdırmalıyıq ki, özləri də bu işə geniş şəkildə qoşulsunlar. Biz bu il pambığın alış qiymətini də 20 faiz qaldırdıq. Ancaq yenə də baxmalıyıq, bəlkə yenə də qaldırmaq lazımdır. Əlbəttə, yaxşı olar, biz də bunu istəyirik, fəhlələr üçün daha yaxşı olacaq. Ona görə mən indi müvafiq orqanlara tapşırıq verirəm ki, - Prezident Administrasiyası, Kənd Təsərrüfatı, İqtisadiyyat nazirlikləri, pambıqla məşğul olan firmalar da baxsınlar, - biz nə qədər mümkünsə, əlbəttə, alış qiymətini qaldırmalıyıq. İlk növbədə ona görə ki, insanlar daha da çox pul əldə etsinlər".
Prezident deyib ki, eyni zamanda, pambıqçılığın inkişafının stimullaşdırılması üçün əlavə tədbirlər görülməlidir.
Pambığın alış qiyməti artırılarsa, bunun məhsul istehsalına təsirini ekspertlər necə dəyərləndirir? Sözügedən məsələ ilə bağlı fikirlərini "Bakı-Xəbər"lə bölüşən ekspert Zakir Əhmədovun sözlərinə görə, pambığın alış qiymətləri fermerlərə sərf edərsə, onlar bu sahənin genişləndirilməsində maraqlı olacaq: "O baxımdan dövlət başçısının bu məsələyə xüsusi olaraq toxunması tamamilə məntiqəuyğundur. Yəni alış qiyməti artırılsa, tarlada çalışan kəndli də işə həvəslə yanaşacaq. Digər tərəfdən, pambıq yüngül sənayedə xammal kimi istifadə edələndən sonra bu sahə gəlir gətirəcək. Azərbaycanda bunun üçün əlverişli şərait var. Sadəcə, fermerlərin problemlərini həll etməklə istehsalı artırmaq, bu sahəni inkişaf etdirmək mümkündür. Hazırda Çin, Pakistan və Hindistan istehsal imkanlarını məhz öz daxili istehlaklarını qarşılamağa yönəldir. Bir məqamı da qeyd edim ki, pambıq istehsalı yüksək əmək və kapital tələb edir. Buna görə də pambıqçılığın inkişafı fermerlərə edilən təkliflərdən çox asılıdır. İndiki dövrdə alış qiyməti ən azı 70 qəpik olmalıdır. Pambıqçılığın inkişafına mane olan problemlərdən biri də torpaqların kiçik paylara bölünməsidir. Hazırda torpaq sahələri xırda təsərrüfatlara pay şəklində bölündüyü üçün səmərəli nəticə əldə etmək çətin olur. Ona görə də çıxış yolu olaraq əvvəlcə kooperasiyalar yaradılmalı və iri təsərrüfatlar əsasında pambıq əkini həyata keçirilməlidir. Nəzərə almaq lazımdır ki, kultivasiya, dərmanlama aparılmalı, məhsul maşınla yığılmalıdır".
Vidadi ORDAHALLI
