"Hesab edirəm ki, bu sistemin Azərbaycanda müsbət effekti olacaq"
Sabirabadda keçirilən müşavirədə Prezident İlham Əliyev kənd təsərrüfatının inkişafı ilə bağlı bir sıra məqamlara toxunub. O, növbəli əkin sisteminə keçilməsinin vacib olduğunu vurğulayıb:
"Torpaqların münbitliyi ilə bağlı tədbirlər görülməlidir. Münbitliyin və məhsuldarlığın artırılması üçün növbəli əkin sisteminə keçməliyik - pambıq, yonca, taxıl. Bunu kənd təsərrüfatı mütəxəssisləri yaxşı bilirlər. Növbəli əkin sisteminə keçmək üçün əlbəttə ki, həm mövcud torpaq fondu, həm də gələcək torpaq fondu dəqiqliklə müəyyən edilməlidir. Çünki gələcəkdə torpaq fondu böyük dərəcədə artacaq. Bu, bəzi çıxışlarda səsləndi. Mən bu təklifləri dəstəkləyirəm ki, növbəti mövsümdə biz əkin sahəsinə görə deyil, yığılan məhsula görə subsidiya verməliyik. Aidiyyəti qurumlar indidən bu məsələni işləsinlər, hazırlasınlar, təkliflər versinlər. Bu daha da məqsədəuyğun və ədalətli olacaq".
Prezidentin fikrincə, torpaqlardan çox səmərəli şəkildə istifadə olunmalıdır: "Bizim çox böyük torpaq sahələrimiz yoxdur. Biz ancaq yeni texnologiyalar, meliorativ tədbirlər nəticəsində yeni, böyük torpaq sahələrini dövriyyəyə cəlb edə bilərik. Misal üçün, bu yaxınlarda Salyan rayonunda olarkən pambıq tarlalarında pambıqçılarla görüşlər əsnasında gördüm ki, orada vaxtilə şoranlaşmış torpaqlarda böyük pambıq sahələri yaradılıb. Bu mümkündür və belə şoranlaşmış torpaqlar bizdə kifayət qədər çoxdur. Yəni kənd təsərrüfatı üçün yararsız torpaqlar kifayət qədər çoxdur. Ancaq orada da məhsul yetişdirmək olar".
Ekspertlər bununla bağlı yanaşmanı necə dəyərləndirir? Məsələyə münasibət bildirən iqtisadçı-alim Əli Əlirzayevin sözlərinə görə, növbəli əkin sisteminə keçid effektiv nəticə verə bilər: "Çünki bir bitkinin kökləri, tullantıları başqa bitkinin inkişafı üçün münbit şərait yaradır. Yəni bu sistemin tətbiqi dədə-baba qaydasıdır və hər zaman özünü doğruldub. Məsələn, yoncadan sonra buğda, buğdadan sonra qarğıdalı əkəndə torpaq münbitləşir. Torpaq eyni məhsula yox, müxtəlif məhsullara uyğunlaşır. Həmin məhsullar torpağı zənginləşdirir və nəticədə münbitlik artır. Torpaq öz məhsuldarlığını saxlayır. O baxımdan növbəli əkin sistemi aqrotexniki bir tədbirdir və bu sistemin tətbiqi vacibdir. Heç bir əlavə xərc tələb etmir. Təbii seçmə yolu ilə, bu və ya digər əkin növünün torpağa təsiri nəticəsində torpağın münbitliyi artır. O üzdən təcrübədə bu özünü doğrultduğu üçün Azərbaycan da vaxt itirmədən bu sistemin geniş tətbiqinə keçməlidir. Hər regionun özünün də özünəməxsus təbii şəraiti var. Hesab edirəm ki, bu sistemin Azərbaycanda müsbət effekti olacaq".
Vidadi ORDAHALLI
