"Görülən işlər imkan verəcək ki, Azərbaycan kənd təsərrüfatı məhsullarına olan tələbatı daxili istehsal hesabına ödəsin"
"İstifadəsiz torpaqlar dövriyyəyə qaytarılmalıdır. Torpağı icarəyə götürən mütləq torpaqda işləməlidir, onu əmanət kimi saxlamamalıdır". Bu sözləri Prezident İlham Əliyev Sabirabadda pambıqçılığın inkişafı məsələlərinə dair respublika müşavirəsində yekun nitqində deyib.
Dövlət başçısı vurğulayıb ki, böyük torpaq sahələri daha da səmərəli şəkildə dövriyyəyə buraxılacaq: "Bu il çox ciddi təftiş aparılır. Bəzi torpaqlar müxtəlif adamlar tərəfindən qanunsuz olaraq zəbt edilib və o torpaqlarda heç bir fəaliyyət göstərilmir. O torpaqların icarə müqavilələri ləğv edilməlidir. Artıq bir çox müqavilələrin icarəsi ləğv olunub, bu proses davam etdirilir. Dövlət orqanları, yerli orqanlar və ictimaiyyət tərəfindən çox ciddi nəzarət olmalıdır. Mən dəfələrlə demişəm ki, ictimai nəzarət Azərbaycanda güclü olmalıdır. İctimai nəzarət, yəni vətəndaşların nəzarəti güclü olarsa, onda biz bu işləri daha da böyük uğurla həll edə bilərik".
Ölkə başçısının toxunduğu məsələ, yəni istifadəsiz qalan torpaqların dövlət tərəfindən geri qaytarılması Konstitusiyaya dəyişikliklər aktında da öz əksini tapıb. Layihədə Konstitusiyanın 29-cu maddəsində V və VI hissələrə müvafiq olaraq "Xüsusi mülkiyyət sosial öhdəliklərə səbəb olur", "Sosial ədalət və torpaqlardan səmərəli istifadə məqsədilə torpaq üzərində mülkiyyət hüququ qanunla məhdudlaşdırıla bilər" məzmunlu cümlələrin əlavə edilməsi qeyd edilib. Bu da o deməkdir ki, Prezidentin qeyd etdiyi kimi, istifadəsiz qalan, qanunsuz zəbt olunan torpaqlar dövlət tərəfindən geri alına bilər.
Sözügedən məsələ ilə bağlı fikirlərini "Bakı-Xəbər"lə bölüşən ekspert Rəsul Cahangirlinin sözlərinə görə, Prezidentin toxunduğu məsələlər tamamilə mövcud reallığı özündə ehtiva edir: "Məsələ ondadır ki, Azərbaycanın torpaq
eytiyatları elə də böyük deyil. Bununla yanaşı, əkinə yararlı torpaqların sahəsi də digər ölkələrlə müqayisədə böyük deyil. Belə olan halda, bəzi şəxslərin hektarlarla böyük torpaq sahələrini istifadəsiz saxlaması qətiyyən yolverilməzdir. Adam var ki, minlərlə hektar torpağı adına keçirib, amma istifadə etmir. Bu səbəbdən ölkədə kənd təsərrüfatı məhsullarının əkin sahələrini genişləndirmək mümkün olmur. Nəticədə məhsul az istehsal olunduğuna görə tələbatı ödəmək üçün idxala üz tutmalı oluruq. Bu da, öz növbəsində, valyutanın xaricə axmasına gətirib çıxarır. O üzdən, qanunsuz zəbt olunan torpaqların icarə müqavilələri ləğv edilməlidir. Mümkün olan qədər bu istiqamətdə görülən işləri sürətləndirmək lazımdır. Hesab edirəm ki, bununla bağlı işlər nə qədər sürətli həyata keçirilsə, bu bir o qədər bizim xeyrimizədir. Görülən işlər imkan verəcək ki, Azərbaycan kənd təsərrüfatı məhsullarına olan tələbatı daxili istehsal hesabına ödəsin". Vidadi ORDAHALLI
