"Milli valyuta ilə yerləşdirilən əmanət faizinin 15-ə qaldırılması daha çox əmanətçinin əmanətinin qorunmasına səbəb olacaq"
Azərbaycanda banklarda milli valyuta ilə yerləşdirilən əmanətlərin sığortalanma faizi 12 %-dən 15 %-ə qaldırılıb. Bu barədə cümə günü jurnalistlərə Azərbaycan Banklar Assosiasiyasının sədri Zakir Nuriyev deyib. O qeyd edib ki, 1 mart 2016-cı ildən etibarən Azərbaycanda "Əmanətlərin tam sığortalanması haqqında" Qanuna əsasən, əmanətçinin qorunan əmanətinin məbləğinə məhdudiyyətlər aradan qaldırılır. Hazırda sığorta sistemi əhalinin 30 min manatadək və dərəcəsi illik 12 %-dən artıq olmayan əmanətlərinə şamil edilir.
Bu qanun qüvvəyə mindiyi gündən etibarən faizləri "Əmanətlərin sığortalanması haqqında" Qanuna müvafiq olaraq Əmanətlərin Sığortalanması Fondunun Himayəçilik Şurası tərəfindən əmanətlər üzrə müəyyən edilmiş illik faiz dərəcəsi həddində olan bütün qorunan əmanətlər, məbləğindən asılı olmayaraq, bank fəaliyyətinin həyata keçirilməsi üçün xüsusi razılığa (lisenziyaya) malik olan fondun iştirakçı bankları tərəfindən 3 il müddətində tam sığortalanır.
ADIF 2006-cı il dekabrın 29-da qəbul olunmuş "Əmanətlərin sığortalanması haqqında" Qanunun təsdiqlənməsi və qüvvəyə minməsinə dair" ölkə Prezidentinin 9 fevral tarixli Fərmanı çərçivəsində yaradılıb. Fondun əsas məqsədi banklar iflasa uğradıqda və onların depozit qəbulu üzrə lisenziyası ləğv olunduqda bank yığımlarının əmanətçilərə qaytarılmasına zəmanət verməkdir.
Milli valyuta ilə qorunan əmanətlərin sığortalanma faizinin 12-15 faizə qaldırılmasına münasibət bildirən iqtisadçı-ekspert Vüqar Bayramov "Bakı-Xəbər"ə açıqlamasında qeyd etdi ki, qorunan əmanətlərin faiz dərəcəsinin artırılması ilə bağlı dəfələrlə çıxış edib: "Qorunan əmanətlərin faiz dərəcələrinin artırılmasının tərəfdarıydım. Əmanətlərin Sığortalanması Fonduna bununla bağlı öz təkliflərimi bildirmişdim. Sevindirici haldır ki, təkliflərim nəzərə alındı və qorunan əmanətlərin faiz dərəcəsi yüksəldi. Zənnimcə, buna ehtiyac var idi. Çünki manata inamın bərpa olunması baxımından qorunan əmanətlərin faiz dərəcəsinin artırılmasına ehtiyac var idi. Bu hal manatla yığıma müsbət təsir edəcək. Digər tərəfdən isə, manatla yığımların qorunmasına imkan yarada bilər. Nəzərə almaq lazımdır ki, bəzi banklar yüksək faiz təklif edirdi, amma deyilən qayda ilə əmanətlər sığortalanmırdı. Ancaq bu qərar imkan verəcək ki, daha çox əmanət sığortalansın və sığortalanan depozitlərin coğrafiyası genişləndirilsin. Vətəndaşların banklarla hər hansı bir problemi olarsa, onların əmanəti dövlət tərəfindən banka qaytarılsın. Onu da qeyd edim ki, artıq əmanətlərin sığortalanmasında limit yoxdur. Vətəndaş manatla olan istədiyi məbləği depozit banka yerləşdirib sığortalaya bilər. Bu daha çox əmanətçinin əmanətinin qorunmasına səbəb olacaq".
Günel CƏLİLOVA
