"Dünyanın bəzi ölkələrində bənzər sistemin tətbiq olunması vergidən yayınma hallarının azalmasında müəyyən rol oynayıb"
Vergilər Nazirliyinin Ərazi vergi orqanları ilə iş üzrə Baş İdarəsinin rəisi Elçin Bəylərov mətbuata müsahibəsində bir sıra məqamlara toxunub.
Onun sözlərinə görə, ölkədə yeni iqtisadi inkişaf strategiyasının həyata keçirilməsi, eləcə də sahibkarlığın inkişafı və əlverişli biznes mühitinin yaradılması istiqamətində atılan addımların tərkib hissəsi olaraq, vergi sistemində də geniş islahatlar aparılır: "Ərazi vergi orqanları ilə iş üzrə Baş İdarə vergi nəzarətinin və vergitutma bazasının genişləndirilməsi, vergi daxilolmalarının artırılması, xüsusilə də regionların daim diqqət mərkəzində olması nəzərə alınaraq yaradılıb. Bu qurum ərazi vergi orqanlarının fəaliyyətinə nəzarətin səmərəliliyinin artırılmasını, vergilərin tam həcmdə və vaxtında ödənilməsini təmin edəcək.
Dəyişikliklərdən əvvəl ərazi vergi orqanları tərəfindən proqnozun icrası ümumi vergi ödəyiciləri üzrə təşkil edilirdi. Struktur dəyişikliklərinə əsasən, ərazi vergi orqanlarında qeydiyyatda olan vergi ödəyicilərinə sahə təhkimçiliyi prinsipi müəyyənləşdirilib ki, bu da nəzarətin tam təmin edilməsinə imkan yaradır".
Bütövlükdə sahə təhkimçiliyi prinsipinin müəyyənləşdirilməsini ekspertlər necə şərh edir? Sözügedən məsələyə aydınlıq gətirən iqtisadçı-ekspert İldırım Qurbanovun sözlərinə görə, burada söhbət həmin ərazilərə təhkim olunan vergi müfəttişlərindən gedir: "Onlar hansısa əraziyə təhkim olunur. Vəzifələri onu müəyyənləşdirməkdən ibarətdir ki, ərazidə işləyən hansı obyektlər vergi ödəyicisidir, hansı vergi ödəyicisi deyil. Yəni hansı obyekt vergidən yayınır. Burada məqsəd ondan ibarətdir ki, vergidən yayınma hallarının qarşısı alınsın. Dünyanın bəzi ölkələrində bənzər sistemin tətbiq olunması vergidən yayınma hallarının azalmasında müəyyən rol oynayıb. Hesab edirəm ki, analoji tədbirlərin Azərbaycanda da həyata keçirilməsi müsbət effekt verəcək. Eyni zamanda vergi daxilolmaları artacaq". Vidadi ORDAHALLI
