"Bankların bir sıra yerli və beynəlxalq maliyyə qurumları ilə həyata keçirdiyi..."
Azərbaycanın valyuta böhranı şəraitinə daxil olması onun iqtisadi vəziyyətini çətinləşdirsə də, hazırda vəziyyət kritik deyil. Bunu dünyada tanınmış "Fitch" beynəlxalq reytinq agentliyinin baş direktoru Pol Gembl "Reuters" agentliyinə müsahibəsində bildirib. O qeyd edib ki, Azərbaycan hökumətinin sərəncamında olan irihəcmli xarici aktivlər kredit reytinqinin müəyyənləşdirilməsində rol oynayan vacib amildir.
"Fitch" rəhbəri onu da əlavə edib ki, Azərbaycan Dövlət Neft Fondunun (ARDNF) valyuta ehtiyatları 2016-cı ilin ilk yarısında 4,5 faiz artaraq 35,1 mlrd. ABŞ dollarına çatıb. İnflyasiya ilə mübarizədə Azərbaycan Mərkəzi Bankı (AMB) keçən həftə uçot dərəcələrini 1,5 dəfə (9,5 faizdən 15 faizə) artırıb. Bundan sonra kommersiya bankları valyuta qıtlığı səbəbindən valyuta satışına qoyduqları məhdudiyyəti ləğv edib.
Müşahidələr göstərir ki, məlum valyuta böhranı ilə əlaqədar bir sıra ölkələrdə vəziyyət kritik həddə pisləşsə də, Azərbaycanda bu durum ümidvericidir. O baxımdan ekspertlər sözügedən nüfuzlu agentliyin Azərbaycanla bağlı dəyərləndirməsini necə şərh edir?
Məsələyə münasibət bildirən iqtisadçı-ekspert İldırım Qurbanovun sözlərinə görə, deyilənlər reallığı əks etdirir: "Yəni vəziyyət həqiqətən də kritik deyil və bunu da şərtləndirən bir sıra faktorlar var. Hökumət tərəfindən atılan addımlar, görülən bir sıra çevik tədbirlər buna imkan verib. Bunun nəticəsində Azərbaycan iqtisadiyyatında sabitləşmə müşahidə olunur. Bu və digər addımların atılması banklara dövlətin ən böyük dəstəyi oldu. Bu tip tədbirlərin davam etdirilməsi bank sektorunu canlandıra bilər. Nəticədə banklar da real sektora vəsait ayıracaq. Real sektorun inkişafı isə Azərbaycan iqtisadiyyatı üçün çox vacibdir. Çünki banklar bazar iqtisadiyyatının aparıcı qüvvəsidir. Kapital olmasa, bazar münasibətləri formalaşa bilməz. Kapital da banklar vasitəsilə formalaşır. Bankların bir sıra yerli və beynəlxalq maliyyə qurumları ilə həyata keçirdiyi xüsusi layihələr əsasən regionları əhatə etməklə kiçik və orta sahibkarların fəaliyyətinin maliyyələşdirilməsi məqsədi daşımalıdır. Dövlət başçısının tapşırıqlarına əsasən, qeyri-neft sektorunun prioritet sahələrindən biri, təbii ki, aqrar sektordur. Bir sözlə, qeyri-neft sektoru inkişaf etsə, ixracat məhsulları əsasən qeyri-neft məhsulları olsa, o zaman devalvasiya bir o qədər bizə təsir göstərməz. Eyni zamanda, yaranan valyuta böhranı kritik həddə çatmaz".
Vidadi ORDAHALLI
