Azərbaycanın ərazi bütövlüyü bərpa edildikdən sonra Böyük Qayıdışın təmin edilməsi proqramı çərçivəsində Qarabağda iqtisadiyyatın müxtəlif sahələrinin inkişaf etdirilməsi nəzərdə tutulub və hazırda bu istiqamətdə məqsədyönlü işlər həyata keçirilir.
Qeyd edək ki, Prezident İlham Əliyevin imzaladığı müvafiq sənədə əsasən ölkə üzrə iqtisadi rayonlar yenidən təsnifatlandırılıb. O cümlədən, işğaldan azad edilmiş ərazilər Qarabağ və Şərqi Zəngəzur iqtisadi rayonlarında birləşdirilib. Hər iki iqtisadi rayon üzrə iqtisadiyyatın inkişafının burada tarixən formalaşan ənənələrə uyğun şəkildə davam etdirilməsi nəzərdə tutulub.
Məlum olduğu kimi, Prezident İlham Əliyev oktyabrın 17-də “Füzuli Şəhəri Günü”ndə Füzuli şəhərinə köçmüş sakinlər və rayon ictimaiyyətinin nümayəndələri ilə görüşüb. Görüş zamanı Prezident İ.Əliyev qeyd edib ki, müəyyən müddətdən sonra Qarabağ Azərbaycan iqtisadiyyatında bir təkanverici qüvvəyə çevriləcək: “Şəhərin özünəməxsus məşğulluq imkanları var. Əlbəttə ki, kəndlərdə yerləşən və yerləşəcək vətəndaşlar, ənənəvi məşğulluqla məşğul olacaqlar, dövlət isə öz tərəfindən onlara kömək göstərəcək – texnika ilə, mal-qara ilə, bütün lazımi vasitələri onlara təqdim etməklə. Özünüməşğulluq proqramı icra ediləcək ki, burada həyat qaynasın. Əminəm ki, müəyyən müddətdən sonra Qarabağ Azərbaycan iqtisadiyyatında bir təkanverici qüvvəyə çevriləcək. Çünki bizim iqtisadiyyatımızın, bax, buradan qalxması ümumi inkişafa da böyük töhfə olacaqdır".
“Qarabağ və Şərqi Zəngəzur iqtisadi rayonlarında müasir dövrün tələblərinə uyğun ən yeni texnologiyalar tətbiq edilməklə güclü infrastruktur artıq qurulmaqdadır”
Qarabağın Azərbaycan iqtisadiyyatına verəcəyi töhfələr haqqında danışan millət vəkili Aydın Hüseynov “Bakı-Xəbər”ə açıqlamasında qeyd etdi ki, işğaldan azad edilmiş ərazilərimizdə bir çox iqtisadi fəaliyyət sahələrinin inkişaf potensialı var: “Kənd təsərrüfatı sahələrindən arıçılıq və maldarlıq potensialı Zəngilan, Kəlbəcər, Qubadlı, Cəbrayıl, Xocalı, Laçın, Tərtər, və Füzuli rayonlarımızda vardır. Cəbrayıl və Kəlbəcər ərazisində balıqçılıq sahəsini inkişaf etdirmək mümkündür. İpəkçilik üzrə Cəbrayıl rayonu və Şuşa şəhəri, taxılçılıq üzrə Kəlbəcər, Cəbrayıl, Tərtər, Qubadlı, Füzuli və Xocavənd rayonları böyük potensiala sahibdirlər. Kənd təsərrüfatı məhsullarının emalı sahəsində ət-süd məhsulları emalı üzrə Kəlbəcər, Tərtər və Füzuli, gön-dəri emalı üzrə Ağdam, Cəbrayıl, Laçın və Füzuli rayonlarımız geniş potensiala sahibdirlər. Dağ-mədən sənayesi üzrə Kəlbəcər və Zəngilan və Ağdərədə qızıl, mis, gümüş, civə və xromit ehtiyatları, Cəbrayıl rayonunda yerləşən “Yəşəm” və “Xalsedon” yataqları zərgərlik sahəsini inkişaf etdirməyə imkan verir. Əlavə olaraq, turizm sahəsinin inkişafına imkan verəcək gözəl guşələrimizdən olan Şuşa, Laçın, Kəlbəcər ərazilərimizdə dağ turizmi, ekoturizm, müalicəvi turizm və mədəni turizm üçün yararlı sayılan digər rayon və şəhərlərimizin potensialından istifadə edərək Qarabağın iqtisadi dirçəlməsinə töhfə verə bilərik”. Millət vəkilinin sözlərinə görə, Qarabağ və Şərqi Zəngəzur iqtisadi rayonlarında müasir dövrün tələblərinə uyğun olaraq ən yeni texnologiyalar tətbiq edilməklə güclü infrastruktur artıq qurulmaqdadır. Eyni zamanda, işğaldan azad edilmiş ərazilərdə iqtisadi canlanmanın sürətləndirilməsi, investisiya cəlbediciliyinin artırılması, müasir və effektiv istehsal, ticarət və xidmət infrastrukturunun yaradılması, innovativ texnologiyaların tətbiqi, sənaye potensialının reallaşdırılması və sahibkarlıq fəaliyyəti üçün əlverişli şərait yaradılması məqsədilə güclü iqtisadi stimul yaradılıb: “Hazırda Qarabağ və Şərqi Zəngəzurun iqtisadi inkişafı, iqtisadi potensialının qiymətləndirilməsi, Azərbaycan Respublikasının siyasi, iqtisadi, sosial, mədəni həyatına qovuşması ilə bağlı proqramlar hazırlanır və yaxın illərdə bu bölgənin ölkə iqtisadiyyatına reinteqrasiyasının nəticələrini görəcəyik”. A.Hüseynov bildirdi ki, bölgəyə xarici investorların da marağı böyükdür. Buradakı zəngin minerqal ehtiyatların mənimsənilməsinə, yaşıl enerji konsepsiyasına və ekoturizm proqramına qoşulan dövlətlərin sayı artır. Hökumət onların fəaliyyətini stimullaşdırmaq üçün 10 illik vergi və digər iqtisadi güzəştlər tətbiq edib ki, bu da bu regionun ən güclü investisiya zonasına çevrilməsinə səbəb olacaq. Nəticədə Azərbaycana böyük həcmli sərmayələr qoyulacaq. Eyni zamanda, Zəngəzur dəhlizi Yeni İpək Yolunun ən mühüm hissəsi kimi region ölkələri arasında qlobal ticarəti və tranziti təmin edəcək və Azərbaycan bu marşrutdan böyük gəlirlər əldə edəcək.
Günel CƏLİLOVA
