Vətən müharibəsindən ötən müddət ərzində azad olunmuş ərazilərdə müasir yaşayış, istehsal və xidmət infrastrukturunun qurulması, iqtisadi fəaliyyətin, o cümlədən nəqliyyat-kommunikasiya xətlərinin bərpası istiqamətində genişmiqyaslı işlər görülüb və bu, hazırda da davam etdirilir.
Qarabağ və ətraf rayonların işğaldan azad olunmasından qısa müddət ötməsinə baxmayaraq, bu tarixi torpaqlarımızın dirçəldilməsi prosesi sürətlə davam etdirilir, quruculuq, təmir-bərpa layihələri yüksək səviyyədə həyata keçirilir. Belə yaşayış sahələrindən biri də Suqovuşan qəsəbəsidir. Məlumdur ki, Azərbaycan Prezidenti İlham Əliyev oktyabrın 15-də Tərtər rayonunda Suqovuşan su anbarının təmir-bərpadan sonra istifadəyə verilməsi mərasimində iştirak edib.
Artıq Suqovuşan su anbarı istifadəyə verilib. Bu anbarın istifadəyə verilməsi ilə ölkədə yaşanan su probleminin həll olunacağı gözlənilir. Maraqlıdır, Suqovuşan su anbarının istifadəyə verilməsinın suvarma, su təminatının həllində hansı töhfələri olacaq?
“Suqovuşan, Xaçınçay və Sərsəng su anbarlarının Azərbaycanın nəzarətinə keçməsi olduqca böyük uğurdur, çünki Azərbaycanın içməli su ehtiyatları azdır”
“Yaşıl Dünya” Ekoloji Maarifləndirmə İctimai Birliyinin sədri Elman Cəfərli “Bakı-Xəbər”ə açıqlamasında qeyd etdi ki, Suqovuşan su anbarı yerləşən bölgə 1993-cü ildən ermənilərin işğalı altında idi. Ərazi 44 günlük müharibədə, konkret desək, 3 oktyabr 2020-ci ildə işğaldan azad olunub: “Bu günlərdə Qarabağ iqtisadi rayonuna səfər edən prezident İlham Əliyev təmir-bərpadan sonra istifadəyə verilmiş Suqovuşan su anbarının açılışında iştirak edib.
Tərtər rayonu ərazisində yerləşən Suqovuşan su anbarı kənd təsərrüfatı torpaqlarını su ilə təmin etmək məqsədilə 1976-cı ildə istismara verilib. Məlumat üçün bildirim ki, su anbarının su tutumu 5.86 milyon kubmetrdir.
Suqoşuvan su anbarı kənd təsərrüfatı baxımından olduqca əhəmiyyətlidir. Tərtərçay və Turağaycay çaylarından daxil olan sular su anbarın tənzimlənərək su kanallarına verilir.
Su anbarı işğaldan öncə Tərtər, Goranboy, Bərdə, Ağdam, Ağcabədi, Yevlax rayonlarının su təminatında mühüm rol oynayırdı. 28 illik işğal dönəmində sözügedən rayonların əkin sahələrinin suvarılmasında ciddi çətinliklər yaranmışdı. Susuzluq əkinə yararlı torpaqların şoranlaşmasına, meşə sahələrinin keçəlləşməsinə və məhvinə səbəb olurdu. Qarabağ iqtisadi rayonunda aparılan son antiterror əməliyyatından öncə mütəxəssislər bildirirdi ki, bölgədə yerləşən və 47 ildir istismar olunan su anbarlarında əsaslı təmir-bərpa işlərinə ehtiyac var. Son əməliyyatlardan sonra Sərsəng su anbarı da Azərbaycan dövlət qurumlarının nəzarətinə keçib”.
E.Cəfərli hesab edir ki, Suqovuşan, Xaçınçay və Sərsəng su anbarlarının Azərbaycanın nəzarətinə keçməsi olduqca böyük uğurdur. Çünki Azərbaycanın içməli su ehtiyatları azdır. Əsas içməli su qaynağımız olan Kür, Araz və Samur transsərhəd çaylarıdır. Bu çaylar ölkəmizə daxil olana qədər ciddi şəkildə çirklənməyə məruz qalır: “Məlumdur ki, Qarabağ və Şərqi Zəngəzurda axan çaylarımız Ermənistanın dağ-mədən sənayesinin tullantıları ilə çirkləndirilir. Sənaye tullantıları ilə çirkləndirilmiş çaylar əkin sahələrinə də ziyan vurur, məhsuldarlığa ciddi çəkildə təsir edir. Müzəffər ordumuzun rəşadəti sayəsində yenidən nəzarətimizə keçmiş su mənbələrimizi düzgün idarə etməli, işğal dönəmində vurulan ziyan aradan qaldırılmalıdır. Nəzarətimizə keçmiş Sərsəng su anbarında da əsaslı təmir-bərpa işlərinə ehtiyac var. Çünki su anbarının hidrotexniki qurğuları 47 ildir yenilənmir. Bu, olduqca risqli bir vəziyyət yaradır. Yəqin ki, aiddiyəti qurumlar qısa zamanda Sərsəng su anbarında da vəziyyəti öyrənəcək və təmir-bərpa işlərinə başlayacaq”.
Günel CƏLİLOVA
