Son günlər “Muğan Bank”ın bağlanma ehtimalının olması ilə bağlı məlumatlar yayılır. Belə bir məlumatın yayılmasına səbəb isə "Muğan Bank” ASC-nin səhmdarının bank rəhbərliyindən kənarlaşmasıdır. Elmir Mehdiyev bankın Müşahidə Şurasının (MŞ) üzvlüyündən ayrılıb. Bununla da, bankın MŞ-nin üzvlərinin sayı 3-ə enib.
Bildirək ki, son vaxtlar ölkədə bağlanacaq bankların sırasında məhz "Muğan Bank"ın da adı çəkilir. Hazırda səhmdarın rəhbərlikdən ayrılması da bununla bağlı müəyyən fikirlərin yaranmasına səbəb olub.
“Muğan Bank” ASC-nin fəaliyyətində 2023-cü ilin ikinci rübündə müsbət maliyyə nəticələri qeydə alınıb. Ötən ilin analoji dövrü ilə müqayisədə ümumi aktivlər böyüyərək 3,47 % artımla 721,86 milyon manat təşkil edib. Cəmi depozit portfelində də 9,56 % artım qeydə alınaraq 393,83 milyon manata çatıb, eləcə də faiz gəlirləri 11,68 % artaraq 20,79 milyon manat təşkil edib. Bankın kredit portfeli isə 5,96 % artaraq 454,13 milyon manata çatıb.
Onu da xatırladaq ki, ölkədə hansısa bankın bağlanması qeyri-adi hadisə deyil. Bir neçə ay öncə anidən "Günay Bank"ın bağlanmasının şahidi olduq.
Statistik göstəricilər bağlanması üçün əsas yaratmırsa, həmin bankın bağlanması reallaşa bilərmi? Ümumiyyətlə, ilin sonuna kimi ölkədə hansısa bankın bağlanması gözlənilirmi və bu, vətəndaşlar üçün təhlükə yaradacaqmı?
“Muğan Bank" bağlanılsa Əmanətlərin Sığortalanması Fondu da çox çətin vəziyyətə düşə bilər, bu, bank sistemi üçün ciddi problem yarada bilər”
Bank sahəsi üzrə ekspert Əkrəm Həsənov “Bakı-Xəbər”ə açıqlamasında qeyd etdi ki, bank səhmdarlarının rəhbərlikdən ayrılması müxtəlif səbəblərdən ola bilər: "Belə ki, səhmləri başqa şəxsə sata bilər. Ola bilər ki, səhmdara pul lazımdır, ona görə səhmlərini satır. Ancaq Azərbaycanda çox nadir hallarda kimsə öz bankını könüllü satır. Ümumiyyətlə, bu vəziyyət onu göstərir ki, bankın vəziyyəti pisdir. Məsələn, "Muğan Bank"da vəziyyətin necə olduğunu demək mümkün deyil. Ancaq müxtəlif vaxtlarda məhz "Muğan Bank"la bağlı məlumarlar yayılır. Bu hələ də öz təsdiqini tapmayıb. Ola bilər ki, hazırda bankın vəziyyəti pisdir, yaxud da səhmdara pul lazımdır".
Ekspert hesab edir ki, cari ildə hansısa bankın bağlanması mümkün ola bilər: “Son dövrlər məhz "Muğan Bank"la bağlı daha çox mənfi məlumatlar gəlir. Bağlanmadan danışdıqda, əgər bankın səhmdarı dəyişibsə, demək bağlanma risqi də azalır. Yəni bağlanacaq olan bankı heç kim almaz. Azərbaycanda elə bir hal olmayıb ki, bank bağlanmazdan əvvəl səhmdarı dəyişsin. Adətən bank vəziyyəti ilə bağlı öhdəlikləri yerinə yetirə bilmirsə, kapitalı çatmır və buna görə də bankın yiyəsi istəyir ki, onu satsın. Elə bir adama satır ki, o vəsait qoyub bankı vəziyyətdən çıxaracağını deyir. Son vaxtlarda bağlanan banklardan olan "Günay Bank"ı bağlamaq asan idi. Çünki o bankın elə bir öhdəlikləri yoxdur. Böyük ehtimalla, "Günay Bank" Azərbaycanda ilk bağlanmış bank olacaq ki, qısa müddətdə hamıya olan borclarını verəcək. Məndə olan məlumata görə, 4 ay ərzində öhdəliklərinin 60 faizdən çoxunu ödəyib. Ancaq ölkədə bağlanan elə banklar var ki, 10 ildir hələ də öhdəliyini yerinə yetirə bilmir. Çünki "Günay Bank" elə bir böyük bank deyildi, öhdəlikləri az idi. Ancaq "Muğan Bank"ın öhdəlikləri çoxdur. "Muğan Bank"ı bağlasalar Əmanətlərin Sığortalanması Fondu da çox çətin vəziyyətə düşə bilər. Bu, bank sistemi üçün ciddi problem yarada bilər. Əgər səhmdar dəyişibsə, yəqin ki, bağlanmaz".
Ə.Həsənov onu da qeyd etdi ki, ilin əvvəlində elə Mərkəzi Bankın sədri bəyanat vermişdi ki, biz bankları bağlayacağıq: “İlin əvvəlində deyibsə, bu o deməkdir ki, bunu istisna etmək olmaz. Mərkəzi Bankın yeni rəhbərliyi bu problemləri qısa müddətdə həll etməlidir. Əgər bağlayacaqsa, bu ilin sonu, yeni ilin ilk yarısında bağlanmalı hesab etdiyi bankları bağlayacaq. Müəyyən ehtimallar var. Ancaq bağlanacaq bankın adını desək təşvişə səbəb ola bilər. Hər bir halda vətəndaşların əmanətləri sığortalıdır. Buna görə də vətəndaşlar narahat olmamalıdır. Əsas problem sahibkarlarla bağlıdır. Bağlanan banklarda əsasən sahibkarların pulları batır. Çünki Əmanətlərin Sığortalanması Fondu ləğvedici kimi adekvat tədbirlər görmür, qeyri-şəffaf fəaliyyət göstərir. Orada qalan pulların qayıtması üçün tədbir görmür”.
Günel CƏLİLOVA
