“Qeyri-neft sektorumuz və qeyri-neft sektorunun sənaye sahəsi kifayət qədər artıbdır”. Bunu Prezident İlham Əliyev 2023-cü ilin 6 ayının sosial-iqtisadi yekunlarına həsr olunmuş müşavirədə deyib.
Ölkə başçısının sözlərinə görə, ilin altı ayı arxada qalır: “Müəyyən dərəcədə yekunlar haqqında danışmaq olar. Halbuki əminəm ki, ilin sonuna qədər ölkəmizin uğurlu inkişafı təmin ediləcəkdir. Bu ilin altı ayında isə əsas istiqamətimiz ölkəmizin dayanıqlı inkişafının təmin edilməsi, qeyri-neft sektorunun inkişafı, Qarabağın və Şərqi Zəngəzurun bərpası, iqtisadi və sosial sahələrdə islahatların davam etdirilməsi idi. Deyə bilərəm ki, bütövlükdə altı ay ərzində iqtisadiyyatımız inkişaf edib, halbuki mütləq rəqəmlər o qədər də böyük deyil. Ancaq qeyri-neft sektorumuz və qeyri-neft sektorunun sənaye sahəsi kifayət qədər artıbdır. Qeyri-neft sənayemiz 6,5 faiz artıbdır və qeyri-neft sektoru, ümumiyyətlə, 3 faizdən çox artıbdır”.
“İqtisadiyyatda inhisarçı amillərin aradan qaldırılması, rəqabət mühitinin inkişaf etdirilməsi vacib faktordur”
Məsələ ilə bağlı “Bakı-Xəbər”ə açıqlama verən İqtisadi Resursların Öyrənilməsi Birliyinin sədri, iqtisad üzrə fəlsəfə doktoru Ruslan Atakişiyev hesab edir ki, ümumən qeyri-neft sektorunda artım tendensiyası müsbət haldır: “Son illər ölkədə qeyri-neft sektorunun inkişafına göstərilən diqqət artır. Məqsəd iqtisadiyyatda qeyri-neft sektorunun payını artırmaqdır. Ancaq bütün bunlarla kifayətlənmək olmaz. Elə etmək lazımdır ki, bu sahə daha da inkişaf etsin. Qeyri-neft sektorunun inkişafı daha çox rəqabət mühitinin dərinləşməsindən asılıdır. Yəni iqtisadiyyatda inhisarçı amillərin aradan qaldırılması, rəqabət mühitinin inkişaf etdirilməsi vacib faktordur. Rəqabət şəraitinin inkişafı üçün bir neçə prinsip var. Bunlar azad məhkəmə sisteminin formalaşdırılması, sahibkarların qarşılıqlı olaraq hüquqlarının qorunması, bazara azad şəkildə daxil olmasının təmin edilməsidir. O cümlədən, hər hansı böyük şirkətin bazarda dempinq siyasəti yeritməməsi və digər bu kimi məsələlər qeyri-neft sektorunun inkişafına müsbət təsir edir. Bütün bunlar rəqabətin formalaşmasına təsir göstərir. Nəticədə sahibkarlıq subyektləri sərbəst şəkildə fəaliyyət göstərə bilirlər. Deməyim odur ki, dövlətin əsas vəzifəsi bütün bunları formalaşdırmaqdır. Digər bir məsələ isə, təbii ki, sahibkarlıq subyektlərinin təşkilati, maliyyə və digər məsələlərdə əlçatanlığının təmin olunmasıdır. Ümumiyyətlə, bugünkü gündə Azərbaycan sahibkarlığında idarəetmə sistemini formalaşdırmaq, bunu daha da dərinləşdirmək və maliyyə resurslarına çıxış imkanlarını artırmaq vacibdir. Əsasən də dövlət və sahibkarlıq dialoqunu genişləndirmək lazımdır. Hesab edirəm ki, bütün bunlar kompleks şəkildə həyata keçirilsə, qeyri-neft sektorunda artımın həcmi daha böyük olacaq. Bu da öz növbəsində iqtisadiyyatın ümumi inkişafına təkan verəcək”.
Vidadi ORDAHALLI
