Təbriz Universitetinin Azərbaycan dili və ədəbiyyatı bölməsinin tələbələri dərsləri dayandırıb. Bu barədə onlar sosial mediada paylaşım ediblər.
Tələbələr bildirib ki, universitet rəhbərliyi, fars dili və ədəbiyyatı bölməsinin məsulları bir çox məsələlərdə, o cümlədən azərbaycan dili və ədəbiyyatı bölməsinə mütəxəssis kadrların cəlb olunmasına müdaxilələr edirlər.
Qeyd edilib ki, problemlər həll olunana və tələblər yerinə yetirilənə qədər tələbələr aksiyanı davam etdirəcək. Məlumat üçün bildirək ki, Təbriz Universitetində Azərbaycan dili və ədəbiyyatı bölməsi 2016-ci ildə yaradılıb. Lakin bölmə bugünə kimi davamlı problemlər və maneələrlə üzləşib. Onsuz da çox sayda tələbənin oxumasına imkan verilməyən bölməyə azərbaycan dili və ədəbiyyatı üzrə mütəxəssis kadrların işə götürülməsinə maneçilik törədilib.
O da bildirilir ki, müraciət edənlərin çox olmasına baxmayaraq, bölməyə illik məhdud sayda, yalnız 20-30 arası tələbənin cəlb olunmasına icazə verilir.
Mütəxəssis kadrların və azərbaycan dili və ədəbiyyatı müəllimlərinin Azərbaycan Respublikasından çağırılması ilə bağlı təkliflərə isə laqeyd yanaşılır.
“İran hakimiyyəti azərbaycan dili və ədəbiyyatı fakültəsini bağlamaqla tələbələrin etiraz aksiyasında iştirakının heyfini çıxır”
Orta Doğu Araşdırmalar Mərkəzinin rəhbəri, siyasi şərhçi Sədrəddin Soltan “Bakı-Xəbər”ə açıqlamasında qeyd etdi ki, 1946-cı ilin iyununda Təbrizdə ilk milli universitet açıldı. Həmin universitetdə tədris azərbaycan dilində aparılırdı: “Eyni zamanda, həmin universitetdə azərbaycan dili və ədəbiyyatı fakültəsi də mövcud idi. Həsən Ruhani hakimiyyətə gəlməzdən öncə Təbrizdə belə fakultənin açılmasına icazə verdi. Fakultə açıldı və tələbələr böyük həvəslə həmin ixtisasda təhsil almağa başladılar. Məlumdur ki, İranda azərbaycan türkcəsində təhsil ocağı yox idi. Ancaq Təbriz universitetində azərbaycan dili və ədəbiyyatı tədris olunurdu. İran hakimiyyəti isə son zamanlar bu fakültənin bağlanması istiqamətində fəaliyyətini artırıb. Məlum fakültənin bağlanmasına səbəb isə ora azərbaycan türkcəsi ilə əlaqəsi olmayan müəllimlərin cəlb edilməsidir. Bundan başqa, fakültəyə İran təhlükəsizlik orqanlarının təmsilçilərinin nəzarət etməsidir. Yəni bu fakültə İran təhlükəsizlik xidmətinin nəzarətindədir.
Bundan başqa, İran tərəfi iddia edir ki, azərbaycan türkcəsini bilən müəllimlər Azərbaycan Respublikasından cəlb olunmamalıdır. O fakültəyə dərs demək üçün Şimali Azərbaycandan müəllimlər o halda cəlb edilə bilər ki, İran tərəfinin də dini təriqət yönümlü müəllimləri Azərbaycanın dini təmayüllü universitetlərində dərs demiş olsun. İran tərəfi məsələni bu cür məntiqsiz qoyur”.
S.Soltan onu da əlavə etdi ki, İran hakimiyyəti öz vətəndaşının konstitusion hüququnun təmin edilməsi üçün başqa bir dövlətlə şərtlə danışır. Halbuki, İranın Ana Yasasında ana dilində təhsilə dair maddə təsbit olunub. İran Ana Yasasının 15-ci maddəsi 19 cu maddəsi dil və milli birliklə bağlıdır.
Həmsöhbətimizin sözlərinə görə, son zamanlar İranda keçirilən aksiyalarda tələbələr iştirak edib. Həmin aksiyalarda iştirak edənlər arasında Təbriz universitetinin tələbələri də olub. İran hakimiyyəti azərbaycan dili və ədəbiyyatı fakultəsini bağlamaqla tələbələrin etiraz aksiyasında iştirakının heyfini çıxır. Onu da deyim ki, İran Ana Yasasında vətəndaşların sərbəst toplaşması, milli bərabərliyi nəzərdə tutulub. İran hakimiyyəti isə azərbaycan türkcəsi fakültəsinə belə kobud müdaxilə etməklə öz Ana Yasalarına qarşı çıxmış olurlar”.
Günel CƏLİLOVA
