Mərkəzi Bankın özünə yüz milyonlarla qiymətində yeni ofis tikdirmə planına ictimai reaksiyalar genişlənir...

img

Xəbər verildiyi kimi, Azərbaycan Mərkəzi Bankının (AMB) yeni inzibati binasının tikintisi üçün 218 milyon avro (452 milyon manat) vəsait xərclənəcək. Mərkəzi Bank ötən il verdiyi tender elanında bildirib ki, 160 metr hündürlüyündə olacaq yeni inzibati bina Bakı şəhəri, Nizami rayonu, Heydər Əliyev prospekti 109 ünvanında tikiləcək. Hansı ki, bu prospektə SOCAR, ARDNF, Azersun, ASK Arena stadionu, Atletlər kəndi və s. yeni inşa edilən  tikililər var.

Onu da nəzərə almaq lazımdır ki, azad edilmiş torpaqlarda bərpa işlərinə ehtiyacın və qlobal böhranın iqtisadiyyata təsirlərinin olduğu vəziyyətdə 452 milyon manat dövlət vəsaitinin ofis binasının tikintisinə xərclənməsi müzakirələrə səbəb olub. İctimaiyyət Mərkəzi Bankın binasının tikintisinə xərclənəcək vəsaitin işğaldan azad olunmuş ərazilərin bərpasına xərclənməsini tələb edir. Hazırda işğaldan azad olunmuş torpaqların bərpasına ehtiyac var. Belə bir ərəfədə Mərkəzi Bankın özünə 3-cü inzibati binanı tikdirməsi cəmiyyət tərəfindn sərt qarşılanır.

Məlumat üçün bildirək ki, tikintisi planlaşdırılan Mərkəzi Bankın yeni inzibati binası 37 mərtəbədən ibarət olacaq. Bakının Heydər Əliyev prospektində yerləşəcək binanın hündürlüyü 168 metrə bərabər olacaq. Türkiyə şirkətinin tikəcəyi bina 67 981 kvadratmetr ərazidə inşa olunacaq. Tikintisi 3 il davam edəcək.

  • Natiq Cəfərli: “Mərkəzi Bankın yeni binası üçün ayrılacaq vəsaitlə həm sosial problemlərin həllini, həm də işğaldan azad olunmuş torpaqlarda bərpa işlərini sürətləndirmək olar”

İqtisadçı-ekspert Natiq Cəfərli bildirdi ki, hər hansı dövlət qurumuna yeni inzibati binanın tikilməsi üçün onların əsaslandırması olmalıdır. Onun sözlərinə görə, Mərkəzi Bank bu günə qədər belə bir əsaslandırma etməyib: “Nəyə görə belə bir binanın tikilməsinə ehtiyac duyulduğu barədə heç elan da edilməyib. Məlumdur ki, Mərkəzi Bank çox gözəl bir yerdə, şəhərin mərkəzində, 1998-ci ildə tikilmiş binaya sahibdir. Kifayət qədər genişdir və yeni tikilidir. Orada minlərlə ştat yoxdur ki, hansısa binaya yerləşməsin və ya iş şəraiti ilə bağlı problem yaşasın. Mərkəzi Bank yeni binanın tikintisi ilə bağlı əsaslandırma gətirməlidir.

Bu, sadəcə, öncədən alınmış qərarın indi heç bir yeni reallığı nəzərə almadan uyğulanması deməkdir. Bu da kifayət qədər qıcıq yaradan məsələdir, çünki yeni binanın heç bir əhəmiyyəti olmayacaq. Mərkəzi Bankın hansısa binada oturmasının, fəaliyyət göstərməsinin iqtisadiyyata birbaşa təsiri yoxdur. Əlavə dəyər yaratmayan bir qurumdur. Bu qərar indiki şəraitdə yersiz qərardır. Həmin vəsaitlə çox iş görmək olardı. Həm sosial problemlərin həllinə, həm də işğaldan azad olunmuş torpaqlarda bərpa işlərinin sürətləndirilməsinə xərclənə bilərdi”.

  • Əkrəm Həsənov: “...AMB-nin yeni binaya ehtiyacı yoxdur

Bank üzrə ekspert Əkrəm Həsənov bildirdi ki, bütün dünyada daşınmaz əmlak, ilk növbədə, torpağa görə çox bahadır. Sırf binanın özü elə də baha olmur: “Məlumat üçün deyim ki, hazırda Mərkəzi Bankın sərəncamında bina var. Üstəlik, sabiq Maliyyə Bazarlarına Nəzarət Palatasının da binası hazırda Mərkəzi Bankın sərəncamındadır. Bu qədər real və potensial binaları ola-ola yeni bina nəyinə lazımdır axı Mərkəzi Bankın? Lazım deyil. İşçilərinə yer çatmır? Çatır!”.

Həmsöhbətimiz onu da əlavə etdi ki, pandemiya, müharibə və işğaldan azad olunmuş ərazilərdə gələcək bərpa işləri gündəmi dəyişib. Buna görə də hazırda bu xərcə ehtiyac yoxdur: “Hazıda əsas diqqət Qarabağın abadlaşdırılmasına yönləndirilməlidir”.

Günel CƏLİLOVA

Son xəbərlər