Oktyabrın 9-da Bakıda Azərbaycan Prokurorluğu və Beynəlxalq Prokurorlar Assosiasiyasının, həmçinin Avropa İttifaqı və Avropa Şurasının birgə təşkilatçılığı ilə “Kibercinayətkarlıqla mübarizəyə dair Konfrans” öz işinə başlayıb.
Baş prokuror yanında Korrupsiyaya qarşı Mübarizə Baş İdarəsinin inzibati binasında baş tutan tədbirə Şərqi Avropa, Balkan regionu və Mərkəzi Asiya ölkələrinin hüquq mühafizə orqanlarının 50-dək əməkdaşı, beynəlxalq ekspertlər, Beynəlxalq ProkurorlarAssosiasiyasının rəsmi şəxsləri, həmçinin ölkənin hüquq-mühafizə orqanlarının nümayəndələri qatılıb.
Konfransın açılış mərasimində Beynəlxalq Prokurorlar Assosiasiyasının Baş katibi, eyni zamanda Assosiasiyanın Prokurorların Qlobal Elektron Cinayət Şəbəkəsinin (GPEN) rəhbəri və Niderland Krallığının “Eurojust”da təmsilçisi Han Moraal, Avropa Şurasının Bakı Ofisinin rəhbəri Zoltan Hernyes və Avropa Birliyinin Azərbaycandakı nümayəndəliyinin siyasi bölməsinin rəhbəri Denis Daniildis iştirak edib.
Tədbiri giriş sözü ilə açan Baş prokurorun müavini - Baş prokuror yanında Korrupsiyaya qarşı Mübarizə Baş İdarəsinin rəisi Kamran Əliyev sürətlə qloballaşan dünyada kibercinayətkarlıq probleminin xüsusi aktuallığı və ona qarşı dövlət orqanları tərəfindən aparılan mübarizənin vacibliyi barədə ətraflı məlumat verərək, cinayət yolu ilə əldə edilmiş pul vəsaitlərinin leqallaşdırılması, terrorçuluğun maliyyələşdirilməsi və digər cinayətlərə qarşı mübarizənin ölkələrin milli təhlükəsizliyinin təmin olunmasına xidmət etdiyini bildirib. Qeyd edilib ki, ölkəmizdə Prezident İlham Əliyevin siyasi rəhbərliyi altında korrupsiya, çirkli pulların yuyulması və kibercinayətkarlıq da daxil olmaqla cinayətkarlığın bütün təzahürlərinə qarşı barışmaz mübarizə aparılır, Azərbaycan Respublikasının 2010-cu ildən Avropa Şurasının “Kibercinayətkarlıq haqqında” Konvensiyasına qoşularaq bu beynəlxalq müqavilədən irəli gələn öhdəliklərin yerinə yetirilməsi istiqamətində kompleks və sistemli inzibati və normativ tədbirlər görülməklə, həyata keçirilmiş hüquqi və institusional islahatlar nəticəsində ölkəmizdə ən müasir beynəlxalq standartlara cavab verən qanunvericilik bazası formalaşdırılıb. Dövlət başçısının 18 noyabr 2016-cı il tarixli Sərəncamı ilə təsdiq edilmiş “Cinayət yolu ilə əldə edilmiş pul vəsaitlərinin və ya digər əmlakın leqallaşdırılmasına və terrorçuluğun maliyyələşdirilməsinə qarşı mübarizəyə dair 2017-2019-cu illər üçün Milli Fəaliyyət Planı”nın bu istiqamətdə fəaliyyətin uğurla davam etdirilməsi üçün mühüm siyasi hüquqi sənədin əhəmiyyəti xüsusi vurğulanıb.
K.Əliyev ölkənin hüquq-mühafizə orqanları ilə Beynəlxalq Prokurorlar Assosiasiyası arasında qarşılıqlı əməkdaşlıq münasibətlərinin hazırkı vəziyyəti və gələcək inkişaf perspektivləri haqda geniş məlumat verib.
Korrupsiyaya qarşı mübarizə üzrə Komissiyanın katibi Kamal Cəfərov, BPA-nın Baş katibi Han Moraal, Avropa Şurasının Bakı Ofisinin rəhbəri Zoltan Hernyes və Avropa Birliyinin Azərbaycandakı nümayəndəliyinin siyasi bölməsinin rəhbəri Denis Daniil də sçıxış edərək kibercinayətkarlığa qarşı mübarizə işində dövlət orqanları və beynəlxalq təşkilatların fəaliyyətlərinin effektiv əlaqələndirilməsini təmin edən koordinasiya mexanizminin yaradılmasının, onlar arasında əməkdaşlığın və məlumat mübadiləsi sisteminin səmərəliliyinin artırılmasının, qanunvericiliyin beynəlxalq standartlara tam uyğunlaşdırılmasının, habelə beynəlxalq əməkdaşlığın gücləndirilməsinin vacibliyini vurğulayıb, kibercinayətkarlıqla mübarizədə hüquq-mühafizə orqanları əməkdaşlarının peşəkarlığının artırılması və effektivliyin təmin edilməsində keçiriləcək təlimlərin əhəmiyyətini qeyd edib.
Tədbirdə daha sonra kütləvi informasiya vasitələrinin nümayəndələrinin sualları cavablandırılıb.
Oktyabrın 11-dək davam edəcək konfransda ekspertlər tərəfindən təqdimatların keçirilməsi, eləcə də işçi qruplar çərçivəsində praktiki məsələlərin həlli nəzərdə tutulur.
