Arzuxan Əlizadə: “Bu partiyanın namizədinin növbədənkənar seçkidə qalib gəlmək şansı yoxdur”
Türkiyədə zaman-zaman növbədənkənar parlament və prezident seçkilərinə çağırışlar olur. Ölkədə prezident və parlament seçkiləri beş ildən bir eyni gündə keçirilir. Növbəti seçkilərin 2028-ci il mayın 7-dən gec olmayaraq keçirilməsi gözlənir. Hakim dairələrin planına görə, seçkilər 2028-ci ilə, amma nəzərdə tutulan vaxtdan əvvələ təyin edilməlidir.
AKP bununla bağlı müxtəlif vasitələrə əl atır və istəyir ki, öz namizədi qalib olsun. Ancaq məsələ ondadır ki, AKP pis durumdadır. Hazırda cəmiyyətdə reytinqi aşağıdır. Problem ondadır ki, son dövrlər bir sıra rüsvayçı korrupsiya faktları açılır. Türkiyədə 2026-cı ilin sentyabr ayında "Ponzi" sxeminə bənzər mexanizmlərlə idarə olunan investisiya fondlarının çökməsi ilə böyük bir fond böhranı baş verib. Bu böhran ölkənin kapital bazarlarını sarsıtmış, yüz minlərlə kiçik investorun zərər çəkməsinə və bəzi dövlət rəsmilərinin istefasına səbəb olub. Bunun arxasında korrupsiya faktlarının olması cəmiyyətdə AKP-yə münasibətdə məyusluuğu daha da artırıb. O baxımdan seçki AKP-yə nə vəd edir? Əksəriyyət hesab edir ki, AKP dəhşətli məğlubiyyətə uğrayacaq. Çünki mövcud vəziyyət bunu göstərir. Bu yandan da Azərbaycanın daxili işlərinə müdaxilə AKP-ni lap hörmətdən saldı.
Sözügedən məsələni baki-xeber.com-a şərh edən AMİP sədri, millət vəkili Arzuxan Əlizadə də hesab edir ki, növbədənkənar seçki olsa, AKP-nin şansı yüksək olmayacaq: “Məsələ ondadır ki, müşahidələr və sorğular partiyanın nüfuzunun aşağı olduğunu göstərir. Bunu başlıca səbəbi əhalinin sosial vəziyyətinin pisləşməsi, inflyasiyanın yüksəlməsi, bir sıra problemlərin artması və siyasi azadlıqların hər keçən gün daha çox məhdudlaşdırılmasıdır. Onu da nəzərə almaq lazımdır ki, son illər AKP-nin hakimiyyətdə qalmasını təmin edən MHP-dir. Əgər bu partiyanın dəstəyi, ortaqlığı olmasaydı AKP-nin iqtidarda qalması çətin məsələ idi. O baxımda zəmanət yoxdur ki, MHP AKP-yə dəstəyini bundan sonra da davam etdirəcək. Nəzərə almaq lazımdır ki, son vaxtlar Azərbaycana qarşı tənqidlərə, ölkəmizin daxili işinə müdaxiləyə MHP sərt reaksiya verdi. O baxımdan bu partiyanın namizədinin növbədənkənar seçkidə qalib gəlmək şansı yoxdur”.
Vidadi ORDAHALLI
