Ermənistanın “news.am” saytının xəbərinə görə, Kollektiv Müdafiə Təşkilatının qərargah rəisi Anatoli Sidorov, ehtiyac yaranarsa, təşkilatın Ermənistana hərbi dəstək verəcəyini deyib.
Saytın xəbərinə görə, rus general-polkovnik bunu Ermənistanda keçiriən “Axtarış2017” hərbi təlimləri çərçivəsində mətbuat konfransında deyib. Xəbərə görə, jurnalistlərin “elə bir qırmızı xətt varmı ki, o keçildiyində KTMT ordusu Ermənistana hərbi dəstək verə bilər” sualına cavabında qərargah rəisi deyib ki, Ermənistanın ağrılı problemindən (!) xəbərdardır və təmsil etdiyi təşkilatın ordusu da elə bütün üzv dövlətlərin suverenliyinin və ərazi bütövlüyünün (!) qorunması məqsədilə yaradılıb. “Allah eləməsin, bu dövlətlərin hansınınsa bu istiqamətdə problemi yaranarsa, biz regiona gələrək onu çözməyə hazırıq, buna heç bir şübhə olmasın”- derə sayt Sidorovun sözlərindən iqtibas gətirir, hətta daha da irəli gedərək, KTMT-nin yüksək hərbi hazırlıq keçmiş 20 minlik ordusunun olmasına diqqət çəkir. Eyni zamanda bildirir ki, general-polkovnik Qarabağ məsələsində işin bu həddə çatmasına – KTMT qüvvələrinin dəstəyinə ehtiyac yaranmasına qədər gəlib çatmayacağına ümid edir.
Əvvəla ondan başlayaq ki, KTMT ordusunun qərargah rəisi Anatoli Sidorov əslində təmsil etdiyi təşkilatın və onun ordusunun təyinatını çox doğru izah edib. Çünki adətən belə birliklər yaranarkən onun nizamnaməsində üzv dövlətlərin istənilən probleminə həssas münasibət əsas maddələrdən birini təşkil edir. Lakin indiki halda maraqlıdır, cənab Sidorov həqiqətənmi dediyi kimi Qarabağ münaqişəsinin mahiyyətindən xəbərdardır? Əgər xəbərdardırsa, bilməmiş deyil ki, sözügedən münaqişə Ermənistanın Azərbaycanın beynəlxalq hüquq çərçivəsində tanınmış ərazilərini işğal etməsi nəticəsində yaranıb və üzv dövlət olsa da, KTMT heç bir halda işğalçı ölkəyə hərbi dəstək vermək kimi beynəlxalq konvensiyalara zidd bir funksiyanı öz üzərinə götürməz. Yox, məsələnin mahiyyətindən xəbərdar deyilsə, o halda erməni mediasının yenə blef etdiyi və hər düşən fürsətdə olduğu kimi bu dəfə Azərbaycana özünün olmayan əzələ nümayiş etdirmək cəhdi ortadadır. İstisna deyil ki, cənab Sidorov verilən suala cavabında elə Ermənistanı nəzərdə tutub və təmsil etdiyi təşkilata üzv dövlət kimi onun ərazi bütövlüyünə və suverenliyinə təhdidlər olarsa, dəstək vermək kimi bir vəzifələrinin olduğunu xatırladıb. Lakin bu zaman o bilməyib və ya bilibsə də nəzərə almayıb ki, fikrindəki dilində olan rus millətindən fərqli olaraq, müdafiəsinə qalxdığı millətin minbir dili olduğu kimi, mindir də üzü var. Amma bilməlidir, öyrənməlidir, əks halda bu tip bəyanatların onun özünə qarşı çevrilməyəcəyinə kim təminat verə bilər?
SAMİRƏ
