Elçin Mirzəbəyli: “Hüquq-mühafizə orqanları əməkdaşlarının komissiyanın iclasına qatılması yaxşı nəticə verər” Şəmsəddin Əliyev: “Reket jurnalistika”nın qarşısını almaq baxımından məqsədəuyğundur”
“Reket jurnalistika” ilə mübarizədə Azərbaycan Mətbuat Şurasının son zamanlar həyata keçirdiyi tədbirlər, bu tədbirlərin nəticələri ictimaiyyət tərəfindən müsbət qarşılanır. “Reket mətbuat”ın neqativ fəaliyyətinə qarşı müxtəlif yönlü işlər görən Azərbaycan Mətbuat Şurası bəzi saytlarla bağlı hüquq-mühafizə orqanlarına müraciət edəcək.
Bu barədə MŞ sədri Əflatun Amaşov yerli mətbuata açıqlamasında bildirib. Ə.Amaşovun sözlərinə görə, Mətbuat Şurasının “Reket jurnalistika”ya qarşı mübarizə Komissiyası fəaliyyətini genişləndirib: “Məbuat Şurasının üzvləri, media nümayəndələri həmin komissiyanın işində iştirak edirlər. Artıq bundan sonra Baş Prokurorluğun, Daxili İşlər Nazirliyinin və digər əlaqədar qurumların nümayəndələri iclaslarda iştirak edəcəklər. Reketliklə bağlı məsələni daha geniş müstəvidə müzakirə edəcəyik. Ola bilsin ki, bəzi məsələlərlə əlaqədar hüquq-mühafizə orqanlarına müraciət edilsin”.
MŞ-nin məsələ ilə bağlı hüquq-mühafizə orqanlarına müraciət etməsinə müsbət yanaşan ekspertlər bildirir ki, bunun müsbət nəticələri olacaq. Ekspertlərin fikrincə, MŞ-nin müvafiq iclaslarında hüquq-mühafizə orqanları təmsilçilərinin iştirakı problemə ictimai münasibəti də gücləndirəcək.
“Xalq cəbhəsi” qəzetinin baş redaktoru Elçin Mirzəbəyli bizimlə söhbətində MŞ-nin edəcəyi müraciətə müsbət yanaşdığını və bunun nəticəsiz olmayacağını dedi: “Mənim bu məsələyə münasibətim müsbətdir. Hüquq-mühafizə orqanları əməkdaşlarının komissiyanın iclasına qatılması yaxşı nəticə verər. Belə məsələlərdə hüquq-mühafizə orqanları ilə mətbuatın əməkdaşlıq etməsi tamamilə məntiqlidir. Bu, “reket mətbuat”a qarşı mübarizənin mütəşəkkilliyini daha da artıracaq”.
“Polisə Yardım” İctimai Birliyinin sədri Şəmsəddin Əliyevin fikrincə də MŞ-nin müvafiq iclasında hüquq-mühafizə orqanlarının iştirakı müsbət hal olardı. Onun sözlərinə görə, “reket mətbuat”la mübarizədə hər birimiz fəal olmalıyıq: “Son illər Mətbuat Şurası bu sahədə kifayət qədər işlər görüb, ortada nəticələr var. Onların iştirakı həm də ictimai rəyə təsir edəcək, insanlar “reket mətbuat”a qarşı daha da barışmaz olacaq. “Reket jurnalistika”nın qarşısını almaq baxımından məqsədəuyğundur. Mətbuat Şurasının “reket jurnalist”lərlə bağlı fəaliyyət istiqamətləri təqdir olunur. Düşünürəm ki, artıq ictimaiyyət də bunu bilir. Yəni hansı mətbuat orqanının fəaliyyəti doğrudan da qanunvericiliyə ziddir, onlar artıq bəlli olub. Bu neqativ işlərlə məşğul olanların bəziləri azadlıqdan məhrum olundular, bəzilərinin qəzeti bağlanıb”.
Ş.Əliyev qeyd etdi ki, MŞ ilə hüquq-mühafizə orqanlarının bu yöndə əməkdaşlığı sui-istifadə hallarının qarşısının alınması məsələsində yetərlidir.
İradə SARIYEVA
