Ukraynanın Dağlıq Qarabağ münaqişəsi ilə bağlı mövqeyi - Bu işğaldır
Azərbaycan və Ukrayna arasında münasibətlər strateji xarakter daşıyır. Trend-in məlumatına görə, bunu bu gün Azərbaycanın xarici işlər naziri Elmar Məmmədyarov Bakıda ukraynalı həmkarı Pavlo Klimkin ilə görüşdən sonra mətbuat konfransında deyib.
E.Məmmədyarov qeyd edib: "Bizim siyasi mövqeyimiz beynəlxalq arenada da üst-üstə düşür".
Azərbaycan XİN rəhbəri əlavə edib ki, gələn il hökumətlərarası komissiyanın iclası keçiriləcək.
Nazir vurğulayıb ki, Azərbaycan ilə Ukrayna arasında əməkdaşlıq inkişaf edir: "Biz strateji tərəfdaşlığın ikinci mərhələsini müzakirə edirik. Burada müəyyən çətinlikllər var. Müzakirələr davam etdiriləcək. Biz müzakirələri noyabra qədər başa çatdırmağı düşünürdük. Açıq səma üzrə ikinci sənəd mövcuddur. Böyük ehtimalla oktyabrda sonuncu görüş olacaq".
"Azərbaycanla Avropa İttifaqı arasında əməkdaşlıq tədricən güclənməkdədir. Biz strateji tərəfdaşlıq layihəsinin ikinci fəslini müzakirə edirik. İlk dəfədir ki, tərəfdaş ölkə üzv ölkələrlə tərəfdaşlıq layihəsi təklif edib. Bu bir az çətin prosesdir. Amma ümid edirik ki, proseslər hamar gedəcək. Biz yeni saziş üzrə danışıqları noyabrda Brüsseldə keçiriləcək sammit öncəsi yekunlaşdırmağı planlaşdırırdıq". APA-nın məlumatına görə, bunu da E.Məmmədyarov deyib.
Nazir bildirib ki, hazırda danışıqların növbəti mərhələləri keçirilir: "Oktyabrda açıq səma sazişi üzrə görüş olacaq. Bu, bəlkə də sonuncu görüş oldu. Hazırda tərəflər arasında əməkdaşlıq sürətlə inkişaf edir. İkitərəfli münasibətlər çərçivəsində bir sıra məsələlər var. Biz 10 üzv ölkə ilə strateji tərəfdaşıq. Bəziləri ilə strateji tərəfdaşlıq sənədi imzalamağa hazırlaşırıq. Ümid edirəm ki, Avropa Komissiyası ilə də bu sənədi imzalayacağıq".
"Azərbaycanlı dostlarımızı hamıdan yaxşı başa düşürük. Çünki bu işğaldır". Trend-in məlumatına görə, bunu Ukraynanın xarici işlər naziri Pavlo Klimkin deyib.
Dağlıq Qarabağ münaqişəsinə toxunan nazir bildirib ki, Ukrayna Azərbaycanın ərazi bütövlüyünə dəstək verməyə sadiq qalacaq.
Ukraynanın xarici işlər naziri deyib ki, cari ilin 9 ayı ərzində Azərbaycanla Ukrayna arasında əmtəə dövriyyəsində ötən ilin analoji dövrü ilə müqayisədə 66 faiz artım qeydə alınıb.
O bildirib ki, bundan başqa Ukrayna tərəfdən Azərbaycan ərazisi ilə yükdaşımalarda 5 dəfə artım qeydə alınıb.
