Baş prokuror Zakir Qaralov bir qrup Türkiyə vətəndaşının işğal altındakı Dağlıq Qarabağ ərazisinə qanunsuz səfər etməsinə də münasibət bildirib.
Baş prokuror bu barədə cinayət işinin başlandığını deyib: "Təəssüflər olsun ki, bir qrup Türkiyə vətəndaşı ərazi bütövlüyümüzə hörmətsizlik göstərərək erməni qəsbkarları tərəfindən işğal olunmuş Dağlıq Qarabağa səfər edib.
Bununla bağlı Baş Prokurorluq məlumat alandan dərhal sonra həmin şəxslər barəsində cinayət işi açılıb və onlar barəsində beynəlxalq axtarış elan olunub. Onların səfəri Türkiyə dövlətinin mövqeyi deyil. Onlar ermənipərəst mövqeyi ilə tanınan şəxslərdir və PKK-nı dəstəkləyirlər, müstəqil kürd dövlətinin yaradılmasını təbliğ edirlər. Kimliyindən asılı olmayaraq Dağlıq Qarabağa qanunsuz səfər edənlərlə bağlı cinayət işi başlayacaq və onları bütün ölkələrdə izləyəcəyik".
Xarici havadarlarından pul alıb Azərbaycana gətirmək istəyənlərin qarşısını alırıq
Xarici havadarlarından pul almağa cəhd edərkən yaxalanan qeyri-hökumət təşkilatları nümayəndələri ilə bağlı cinayət işinin istintaqı davam edir. Trend-in məlumatına görə, bunu jurnalistlərə açıqlamasında Baş prokuror Zakir Qaralov deyib.
Baş prokuror bildirib: "Qarşıda məhkəmə prosesləri var. Ona görə bunu şərh etmək istəməzdim. Dəfələrlə bəyan etmişəm ki, özlərini müxalifət adlandıran qeyri-hökumət təşkilatları, müxtəlif qəzetlər Azərbaycan qanunlarına hörmət etməlidirlər. Öz fəaliyyətlərində istər vergi, istərsə də gömrük qanunvericiliyinin tələblərini pozmalı deyillər. Müxalifət, qeyri-hökumət təşkilatları öz xarici havadarlarından ölkə daxilində pul ala bilmədiklərindən həmin pulu digər ölkələrdə əldə edərək Azərbaycana gətirmək istəyirlər. Biz də bunun qarşısını alırıq".
Müdafiə Nazirliyi tərəfindən ifşa olunan casus qrupu ilə bağlı istintaq bu ilin sonuna yekunlaşacaq
“Azərbaycanda hərbçi və mülki şəxslərdən ibarət casus qrupu Azərbaycanın Müdafiə Nazirliyi tərəfindən ifşa olunub”. Bunu da jurnalistlərə açıqlamasında baş prokuror deyib. Onun sözlərinə görə, bununla bağlı Respublika Hərbi Prokurorluğu cinayət işinin istintaqını davam etdirir.
Baş prokurorun sözlərinə görə, bu ilin axırına qədər cinayət işinin istintaqı yekunlaşacaq.
Turan İnformasiya Agentliyinin fəaliyyəti ilə bağlı isə Z.Qaralov deyib ki, hər hansı bir məhdudiyyət yoxdur.
Baş prokuror bildirib ki, istənilən vergi ödəyicisi vergi qanunvriciliyinin tələblərini pozmamalıdır.
Gənc prokurorluq əməkdaşlarının sayı əhəmiyyətli dərəcədə artıb
Hazırda gənc prokurorluq əməkdaşlarının sayı əhəmiyyətli dərəcədə artaraq prokurorluq işçilərinin 65 faizini təşkil edir” – deyən Z.Qaralov bildirib ki, ümumilikdə 2002-ci ildən başlayaraq Tələbə Qəbulu üzrə Dövlət Komissiyası (Dövlət İmtahan Mərkəzi) ilə əlaqəli şəkildə, tam aşkarlıq şəraitində və şəffaf prosedurlar əsasında, dövlət qurumları, vətəndaş cəmiyyəti təsisatları və beynəlxalq təşkilatlar, eləcə də kütləvi informasiya vasitələri nümayəndələrinin iştirakı ilə Azərbaycan Respublikasının Baş Prokurorluğu üzrə 10 və Naxçıvan Muxtar Respublikasının Prokurorluğu üzrə isə 7 müsabiqə keçirilməklə başa çatmışdır.
Həmin müsabiqələr nəticəsində 780 namizəd prokurorluq orqanlarına qulluğa qəbul edilmişdir. İslahatlara qədərki dövrdə prokurorluq orqanlarında qulluq keçən 30 yaşınadək işçilərin sayı prokurorluq əməkdaşlarının cəmi 3 faizinə bərabər olduğu halda qulluğa qəbulun müsabiqə yolu ilə həyata keçirilməsi nəticəsində gənc prokurorluq əməkdaşlarının sayı əhəmiyyətli dərəcədə artaraq hazırda prokurorluq işçilərinin 65 faizini təşkil edir.
