Ramil Hüseynov: “Rusiyanın elə regionları var ki, coğrafi baxımdan Azərbaycana daha yaxındır”
Stavropolda “İnvestisiyalar, innovasiyalar və turizm” mövzusunda VIII Rusiya-Azərbaycan Regionlararası Forumu çərçivəsində iki ölkə arasında ümumilikdə 5 sənəd imzalanıb.
Bununla bağlı yayılan məlumata görə, forumda "Tərəvəz məhsullarının istehsalı üzrə istixana kompleksinin tikintisi haqqında investisiya layihəsinin icrası niyyəti barədə", "400 yerlik sanitar-mehmanxana kompleksinin yaradılması üzrə investisiya layihəsinin icrası niyyəti haqqında", "Rusel" sanatoriyasının tikintisi üzrə investisiya layihəsinin icrası niyyəti haqqında" memorandumlar və "Həştərxan Vilayəti Hökuməti və Nərimanov Rayon İcra Hakimiyyəti arasında əməkdaşlıq haqqında", "Azərbaycan-Rusiya İşgüzar Şurası və Stavropol diyarı Ticarət-Sənaye İttifaqı arasında əməkdaşlıq haqqında" sazişlər bağlanıb.
Azərbaycan Rusiya ilə yaxın qonşudur. İki ölkə arasında bir sıra sahələrdə çoxşaxəli əlaqələr var. Son illər Azərbaycanla Rusiya arasında siyasi-iqtisadi, mədəni əlaqələr daha da genişlənir. Əlaqələrin yüksələn xətlə inkişaf etməsinin nəticəsidir ki, indiyədək 8 Rusiya-Azərbaycan regionlararası forumu keçirilib. Bu forumlar hansı siyasi-iqtisadi nəticələri doğurur?
Məsələyə münasibət bildirən VİP-in sədr müavini Ramil Hüseynovun sözlərinə görə, iki ölkə arasında çoxşaxəli əlaqələr var: “Sözügedən forumlar nəticəsində iqisadi əlaqələrin miqyası genişlənir. Bunun da nəticəsində ticarət dövriyyəsi artır. Hesab edirəm ki, bu da iki qonşu dövlətin maraqlarına cavab verir. Sözügedən əlaqələr həm iki dövlət arasında, həm də ayrı-ayrı regionlar arasında genişlənir. Rusiyanın elə regionları var ki, coğrafi baxımdan Azərbaycana daha yaxındır. Onlardan biri də Stavropol vilayətidir. Bu baxımdan qarşılıqlı əlaqələr üçün çox böyük imkanlar var. Bunun iqtisadi tərəfi ondan ibarətdir ki, Azərbaycandan olan sahibkarlar Rusiyanın müxtəlif bölgələrinə sərmayə qoyur, iş qurur və bunun nəticəsində gəlir əldə edirlər. Siyasi tərəfinə gəldikdə isə, bu, iki ölkə arasında mehriban münasibətlərin möhkəmlənməsinə öz təsirini göstərir. Hesab edirəm ki, bu kimi əlaqələr hər iki ölkənin maraqlarına xidmət edir”.
Vidadi ORDAHALLI
