Ermənistan silahlı qüvvələri tərəfindən işğal olunan Azərbaycanın ərazisi Dağlıq Qarabağa gedən Türkiyə vətəndaşları Azərbaycana təhvil verilməli və məhkəmə qarşısında cavab verməlidirlər. Bu barədə Trend-ə Əsassız Erməni İddialarına qarşı Beynəlxalq Assosiasiyadan (ASİMDER) daxil olan məlumatda deyiir.
Məlumatda ASİMDER rəhbəri Göksel Gülbey erməni işğalı altındakı Azərbaycan torpağı olan Dağlıq Qarabağa gedən Türkiyə vətəndaşları Ufuk Uras, Əli Bayramoğlu, Səid Çəkinoğlu və Erol Katırçıoğlunu şiddətlə qınadığını bildirib.
G.Gülbey bildirib ki, U.Uras, Ə.Bayramoğlu, S.Çəkinoğlu və E.Katırçıoğlu uzun illərdir Türkiyədə erməni lobbisinin dəstəyi ilə fəaliyyət göstərib və qondarma “erməni soyqırımının” tanınması və dəstəklənməsi üçün kitablar yazıblar.
G.Gülbeyin sözlərinə görə, 15 iyul hərbi çevriliş cəhdi, Ərbildəki müstəqillik haqqında qeyri-qanuni referendumdan sonra PKK və Fətullah Gülən (FETÖ) terror təşkilatları Türkiyənin qonşu ölkələrlə münasibətlərinə xələl gətirmək üçün çalışırlar: “Adları sadalanan şəxslərin Bakı-Tbilisi-Qars dəmir yolu xəttinin açılması ərəfəsində Ermənistana və işğal altında olan Azərbaycan torpaqlarına getmələri təsadüfi deyil və Azərbaycan dövlətinin bu məsələdə həssaslığı düşünülərək atılan addımdır”.
“İnanırıq ki, Qarabağa qanunsuz səfər edən Türkiyə vətəndaşları tezliklə Azərbaycana təhvil veriləcək”
Bir qrup Türkiyə vətəndaşının Azərbaycanın ermənilər tərəfindən işğal olunmuş ərazilərinə səfər edərək oradan Azərbaycana qarşı bəyanatlar səsləndirmələri həm də Türkiyənin özü üçün təhqirdir. Bunu millət vəkili Aydın Hüseynov deyib.
Millət vəkili bildirib ki, ermənilər tarixən Türkiyə ilə torpaq davası edib və onlar indi də Türkiyəni qondarma "erməni soyqırımı"nda günahlandırırlar: "Ermənilər Xocalı soyqırımını orada yaşayanlar azərbaycanlılar olduğu üçün törətdilər. Türkiyə vətəndaşlarının Azərbaycanın işğal altındakı ərazilərində keçirilən tədbirə qatılmaları həm Azərbaycan, həm də Türkiyə üçün hörmətsizlikdir. Onların bu addımı başa düşülən deyil. Azərbaycan və Türkiyə qardaş ölkələrdir. İnanırıq ki, Türkiyə bu şəxsləri qısa zaman ərzində Azərbaycana təhvil verəcək".
“Türkiyə ...ciddi tədbirlər görməlidir”
Türkiyə dövləti bir qrup vətəndaşının Azərbaycanın işğal altındakı ərazilərinə səfər etməsinə qarşı ciddi tədbirlər görməlidir. Bu barədə isə millət vəkili Q.Paşayeva deyib.
Millət vəkili bidirib ki, Ermənistanın Azərbaycan torpaqlarını işğal etməsi faktı bütün beynəlxalq təşkilatların qərarlarında yer alıb: "Ufuq Urasın, Əli Bayramoğlu, Səid Çəkinoğlu və Erol Katırçıoğlunun işğal altında qalan Xankəndinə gedərək separatçı rejimin nümayəndələri ilə görüşmələri açıq şəkildə düşmənə dəstək kimi dəyərləndirilməlidir. Onların işğalçılara bu formada dəstək vermələrinin səbəbləri ciddi şəkildə araşdırılmalı və Türkiyə dövləti tərəfindən bu məsələ ilə bağlı ciddi tədbirlər görülməlidir. Ufuq Urasın erməni sevgisinin tarixi kökləri, irsi bağlılığı araşdırılmalıdır. Bu şəxsin uzun illərdir Azərbaycanla Türkiyənin mövqelərinə zidd çıxaraq davamlı şəkildə ermənilərə dəstək verməsi təsadüfi ola bilməz”.
Q.Paşayeva bildirib ki, Türkiyəyə səfəri zamanı ölkə rəsmiləri ilə görüşlərində bu məsələni diqqətə çatdırıb və Azərbaycan xalqının ciddi narahatlığından danışıb.
O bildirib ki, bu, ilk növbədə Türkiyə-Azərbaycan münasibətləri, iki ölkə arasındakı strateji əməkdaşlığa mənfi təsirini göstərir: “Ufuq Uras dəfələrlə Ermənistana səfərlər edərək qondarma erməni soyqırımı abidəsini ziyarət edib. O, hər zaman Türkiyə və Azərbaycan əleyhinə addımlar atıb. Türkiyə hökuməti erməni soyqırımı məsələsinin uydurma, yalan olduğunu bəyan edib. Özünü türk adlandıran bu şəxs isə, əksinə “soyqırım abidəsini” ziyarət etməklə öz dövlətinin maraqlarına qarşı çıxıb. Bu adam hər zaman Türkiyə və Azərbaycanın maraqlarına zidd addımları, açıqlamaları ilə gündəmə gəlib. Ufuq Uras Türkiyənin Dağlıq Qarabağa görə Ermənistanla sərhədlərini bağlaması faktı ilə barışmayıb. Onun bu cür çıxışlarını qəti şəkildə qınayır və təəssüf edirik. Türkiyə və Azərbaycan ictimaiyyəti, media, QHT-lər və digər təşkilatlar Ufuq Urasın bu addımına qarşı etiraz səsini qaldırmalıdır. Türkiyə dövləti vətəndaşlarının Ermənistan silahlı qüvvələri tərəfindən işğal olunan Azərbaycan ərazisi Dağlıq Qarabağa qeyri-qanuni səfərləri ilə bağlı ciddi tədbirlər görməlidir”.
“…Azərbaycan qanunvericiliyinə uyğun cəzalandırılacaqlar”
Ermənistan silahlı qüvvələri tərəfindən işğal olunan Azərbaycan ərazisi Dağlıq Qarabağa qanunsuz səfər edən və orada antiazərbaycan təbliğatı aparan Türkiyə vətəndaşlarına ziyalı deməyin özü qəbahətdir. Bunu Trend-ə açıqlamasında millət vəkili Aydın Mirzəzadə deyib.
Millət vəkili bildirib ki, bu səfər Ermənistan tərəfındən hazırlanmış siyasi təxribatdır: "Bunun arxasında Azərbaycan-Türkiyə münasibətlərini pozmaq istəyən Ermənistan və xaricdəki müəyyən dairələr dayanır. Türkiyə hər zaman Azərbaycana qardaş ölkə olub və iki ölkə arasındakı münasibətlər bütün dünya ölkələrinə bəllidir: 80 milyonluq Türkiyədə bir-iki nəfər belə xainin olması təbiidir. Türkiyə həmişə bütün problemlərdə Azərbaycanın yanında, Azərbaycan isə Türkiyənin yanında olub. Bu şəxslərin Dağlıq Qarabağa qanunsuz səfəri yalnız Ermənistanın və xaricdə yaşayan erməni diasporunun təxribat xarakterli addımıdır".
Deputat qeyd edib ki, bu hadisənin Türkiyə dövlətinin mövqeyi olmadığını bilirik: "Azərbaycanın Baş Prokurorluğu bu səfərlə bağlı cinayət işi başlayıb və həmin şəxslərin qanunsuz hərəkətlərinə hüquqi qiymət veriləcək. İnanıram ki, qardaş Türkiyə də bu məsələdə Azərbaycana dəstək olacaq, həmin şəxsləri qısa müddətdə saxlayaraq Azərbaycana təhvil verəcək və onlar Azərbaycan qanunvericiliyinə uyğun cəzalandırılacaqlar".
Qeyd edək ki, sentyabrın 22-də Türkiyə vətəndaşları Ufuk Uras, Əli Bayramoğlu, Səid Çəkinoğlu və Erol Katırçıoğlu Ermənistan silahlı qüvvələri tərəfindən işğal olunan Azərbaycan ərazisi Dağlıq Qarabağa qeyri-qanuni səfər ediblər. Azərbaycan Baş Prokurorluğunun Ağır Cinayətlərə Dair İşlər üzrə İstintaq İidarəsində Cinayət Məcəlləsinin 318.2-ci (Azərbaycan Respublikasının dövlət sərhədini qanunsuz olaraq keçmə) maddəsi ilə bu çəxslər barəsində cinayət işi başlanılıb. Onlar Cinayət Məcəlləsinin qeyd olunan maddəsi ilə təqsirləndirilən şəxs qismində cəlb olunmaqla barələrində məhkəmənin qərarları ilə həbs qətimkan tədbiri seçilərək dövlətlərarası axtarışa verilib. Həmin şəxslərin tutularaq istintaqa cəlb olunmaları məqsədi ilə Türkiyə hüquq-mühafizə orqanlarına müraciət edilib.
