"Azərbaycan torpağı olan Qarabağın işğaldan azad olunması vacibdir". APA-nın məlumatına görə, bunu Türkiyənin milli müdafiə naziri Nurəddin Canikli deyib.
O bildirib ki, Azərbaycan torpaqları gec-tez Ermənistanın işğalından azad olunacaq.
"Azərbaycanın gücü Türkiyənin, Türkiyənin gücü Azərbaycanın gücüdür. Azərbaycanla Türkiyə ən çətin anlarda xarici dövlətlərdən silah almaq məsələsində problemlərlə üzləşib.
Ona görə də müdafiə sənayesi sahəsində də səyləri birləşdirməliyik", - deyə N. Canikli qeyd edib.
“Azərbaycan xalqının istəyi bizim üçün əmrdir”
“Azərbaycan və Türkiyə qardaş dövlətlərdir. Bizim bir-birimizə ehtiyacımız var. Azərbaycan xalqının istəyi bizim üçün əmrdir, lazım olan addımı atırıq” – deyə müdafiə naziri bildirib.
Nazir bildirib ki, Azərbaycan və Türkiyə bütün sahələrdə gücünü birləşdirir: “Biz müdafiə sənayesi sahəsində də birgə hərəkət edirik. Azərbaycan və Türkiyənin milli silah sistemlərini inkişaf etdirməsi lazımdır. Bu, torpaqlarımızı müdafiə etmək üçün vacibdir”.
“Azərbaycan və Türkiyə Silahlı Qüvvələri vahiddir, birdir və bunu hər kəs bilməlidir”
“Azərbaycan və Türkiyə Silahlı Qüvvələri hər zaman bir-birinə dəstək olmalıdır” - deyən nazir bildirib ki, Azərbaycan və Türkiyə Silahlı Qüvvələrinin birgə təlimləri gələcəkdə davam etdiriləcək: “Bundan sonrakı birgə təlimlər daha çox hərbi birləşmə və texnikanın iştirakı ilə keçiriləcək. Biz Azərbaycana bütün sahələrdə dəstək verməyə hazırıq. Azərbaycan və Türkiyə Silahlı Qüvvələri vahiddir, birdir, bunu hər kəs bilməlidir. Silahlı Qüvvələrimiz lazım gələn anda bir-birinə hər cür dəstək verməyə hazırdır".
Nazirin sözlərinə görə, iki ölkə arasında bütün sahələr üzrə qarşılıqlı anlaşma var: “Əlaqələrin daha da inkişaf etdirilməsi üçün möhkəm siyasi iradə mövcuddur”.
“Şimali İraqdakı referendumdan sonra həmin bölgədən Türkiyəyə PKK təhdidləri artıb”
“Şimal İraq Kürdüstan muxtariyyətində keçirilən referendum bölgəni və bütün dünyanı oda atır”. Bunu da Türkiyənin milli müdafiə naziri Nurəddin Canikli bildirib.
Müdafiə naziri deyib ki, orta şərqdə etnik, dini tarazlığa toxunmaq olmaz: “Bu bölgədə indiyədək heç bir dövlətin proqnozu reallaşmayıb. Orta şərqin öz reallıqları var. Türkiyənin İraqla 350 kilometr sərhədi var və orada baş verənlərə Türkiyə biganə qala bilməz”.
Müdafiə nazirinin sözlərinə görə, Şimali İraqdakı referendumdan sonra həmin bölgədən Türkiyəyə qarşı PKK təhdidləri artıb: “Bölgədə biz bunu müşahidə edirik. Türkiyə buna laqeyd qala bilməz. Türkiyəyə yönəlik təhdidlərin aradan qaldırılması üçün bütün variantlar müzakirə olunur”.
N. Canikli onu da deyib ki, Kərkük və digər bölgələrdən türkmənlərin 2003-cü ildən köçürülməsinə və oraya başqa bir etnik qrupun yerləşdirilməsinə başlanıb: “Bu gün həmin bölgəyə Kərkük də daxil edilməyə çalışılır. Bu, yolverilməzdir”.
Qeyd edək ki, İraq Kürdüstanında sentyabrın 25-də müstəqillik referendumu keçirilib.
