Ötən gün Bakıda Şimali Kipr Türk Cumhuriyyətinin təhsil və mədəniyyət naziri Özdemir Berova ilə 20-yə yaxın Azərbaycan KİV rəhbərinin görüşü keçirilib. Tədbirdə onun müavini Ziya Öztürkler, təhsil müşaviri Ahmet Simitçioğlu, ŞKTC-nin Bakı Nümayəndəliyinin rəhbəri Ufuk Turganer iştirak ediblər. Görüşə, həmçinin, millət vəkilləri də qatılıb.
Ö.Berova görüşdə çıxışı zamanı bildirdi ki, ŞKTC-də son 15 ildə təhsil və turizm sahəsi inkişaf edib: “Hazırda Şimali Kiprdə təhsil alan 95 min tələbədən 500-ü Azərbaycandan olan tələbələrdir. Onu da deyim ki, hazırda Azərbaycandan olan 30 müəllim Şimali Kiprdəki universitetlərdə çalışır. Şimali Kiprdə təhsil alan tələbələrin sayı günü-gündən artır. Biz təhsil sahəsində Azərbaycanla əlaqələrin, əməkdaşlığın daha da gücləndirilməsinin tərəfdarıyıq. Hazırda 30 azərbaycanlı tələbə dövlət xətti ilə Şimali Kipr universitetlərində pulsuz təhsil alır. Başqa ölkələrin tələbələri ilə bağlı isə bu rəqəm 20-dir. Biz azərbaycanlıların təhsillə yanaşı, Şimali Kiprdə turizmə də böyük maraq göstərməsindən çox razıyıq”.
Kıbrıslı nazir öz ölkəsində azərbaycanlı tələbələr üçün təhsil haqqının bir az daha azaldılmasına nail olmaq üçün özəl universitet rektorları ilə xüsusi görüşlər keçirəcəyini əlavə etdi. Bundan başqa, hörmətli nazir Azərbaycan və Kıbrıs universitetləri arasında yeni əməkdaşlıq layihələrinin həyata keçiriləcəyini də sözlərinə əlavə etdi.
Milli Məclisin deputatı, "Ədalət" qəzetinin təsisçisi Aqil Abbas Şimali Kipri çox sevdiyini və oranın insanlarının olduqca ziyalı olduğunu qeyd etdi. O bildirdi ki, Azərbaycan tərəfi Şimali Kiprdə təhsilə böyük diqqət və maraq göstərir: “Bu diqqət və maraq Şimali Kiprdəki ali təhsil müəssisələrinin yüksək səviyyədə təhsil verməsindən irəli gəlir. Biz bu qarşılıqlı əməkdaşlığı təqdir edir və bu əməkdaşlığa dəstək verməyə hazırıq”.
Milli Məclisin deputatı, "Yeni Azərbaycan" qəzetinin baş redaktoru Hikmət Məmmədov çıxışı zamanı bildirdi ki, Şimali Kipr sülh və təhsilin məskənidir: “Orada yaradılan şəraitlə tanış olmuşuq. Valideynlər ürək rahatlığı ilə övladlarını Şimalı Kiprdə oxumağa göndərirlər”.
“Səs” qəzetinin baş redaktoru Bəhruz Quliyev vurğuladı ki, Şimali Kiprin turizminin Azərbaycanda təbliğinə diqqət yetirilməlidir.
"Şərq” qəzetinin baş redaktoru Akif Aşırlı isə bildirdi ki, Şimali Kipr universitetlərinin ölkəmizdə təbliğinə, reklamına ehtiyac var.
“Trend" İnformasiya Agentliyinin direktor müavini Arzu Nağıyev Şimali Kipr universitetləri ilə bağlı azərbaycanlı valideynləri qiymətlərin və diplomun tanınması məsələsinin daha çox maraqlandırdığını dilə gətirdi.
Ö.Berova isə diplomların tanınması məsələsi ilə bağlı cavab olaraq qeyd etdi ki, Şimali Kipr universitetlərinin diplomlarının tanınmasında bütün maneələri dəf ediblər və hazırda belə bir problem yoxdur: “Həmçinin, onu da qeyd edim ki, azərbaycanlı tələbələrin kiprli tələbələrin ödədiyi təhsil haqqına yaxın məbləğdə ödəniş etmələri üçün aidiyyəti qurumlarla danışıqlar aparılır”.
"Xalq Cəbhəsi" qəzetinin baş redaktoru Elçin Mirzəbəyli isə Şimali Kiprdəki universitetlərdə qiymətlərin yüksək olduğunu diqqətə çatdırdı.
KİVDF Müşahidə Şurasının sədri, "Xalq qəzeti”nin baş redaktoru Həsən Həsənov Şimali Kiprin azərbaycanlılar tərəfindən sevildiyini bildirdi. O qeyd etdi ki, Şimali Kiprdə olan və olmayan hər bir azərbaycanlı Şimali Kipri sevir: "Hər kəsin qəlbində Kipr sevgisi var”.
Quzey kıbrıslı qonaqlar Azərbaycan media nümayəndələrinin çoxsaylı suallarına ətraflı cavablar verib.
Görüşdə ikitərəfli əməkdaşlıq məsələləri də müzakirə olunub.
Günel CƏLİLOVA
