ATV telekanalının yeni rəhbəri Azər Xəlilov təyinatı ilə bağlı məsələyə münasibət bildirib. Əməkdar jurnalist A.Xəlilov Trend-ə açıqlamasında yeni vəzifəyə ATV təsisçilərinin qərarı ilə təyin olunduğunu deyib: “Təsisçilərin qərarı ilə bu vəzifəyə təyin edilmişəm”.
Qeyd edək ki, ATV-nin rəhbəri Vüqar Qaradağlı vəzifəsindən azad edilib. A.Xəlilov bu gün kollektivə təqdim edilib.
Xatırladaq ki, bundan öncə A.Xəlilov CBC telekanalının direktoru vəzifəsində çalışıb.
ATV-nin yeni prezidenti Azər Xəlilov telekanalın əməkdaşının kütləvi şəkildə işdən çıxarılması barədə yayılan məlumatlara da münasibət bildirib. A. Xəlilov bildirib ki, işçilərin kütləvi şəkildə işdən çıxarılması barədə rəhbərlik tərəfindən hər hansı qərar qəbul edilməyib.
Onun sözlərinə görə, kimsə işdən getmək istəyirsə, öz işidir: “Heç kimin iradəsinə qarşı çıxmaq olmaz. İşdən getmək istəyi ilə mənə cəmi 3 nəfər müraciət edib. Hələlik mən onların adlarını açıqlamaq istəmirəm”.
A. Xəlilov qeyd edib ki, Turan İbrahimovun aparıcısı olduğu “ATV Səhər” verilişinin yayımı dayandırılıb: “Vüqar Qaradağlının rəhbərlik etdiyi administrasiyadan mənə bildirilib ki, Turan İbrahimovun aparıcısı olduğu verilişin yayımı hələ bu gün səhər saatlarında dayandırılıb. Bundan əlavə, Azər İsmayılovun aparıcısı olduğu “Yoxlama” verilişi də qapadılıb. Əlbəttə ki, bu verilişlərin yayımı dayandırılıbsa, Turan İbrahimov və Azər İsmayılov işdən azad ediləcəklər. Onların telekanalda çalışmalarına ehtiyac qalmayacaq”.
Qeyd edək ki, bu gün Azad Azərbaycan Teleradio Şirkətinin təsisçisinin qərarı ilə ATV-nin rəhbəri Vüqar Qaradağlı vəzifəsindən azad olunub.
Onun yerinə A. Xəlilov təyin olunub.
A. Xəlilov buna qədər CBC televiziyasının rəhbəri olub.
