Məlum olduğu kimi, bu günlərdə “Avronest” PA-nın Bakıda keçirilən forumuna Ermənistan parlamentinin iki deputatı da qatılıb.
Təbii, beynəlxalq tədbir olmasına baxmayaraq, Azərbaycan öz ərazisinə düşmən ölkə nümayəndələrinin gəlişinə etiraz da edə və bu tam normal qarşılana bilərdi. Lakin Azərbaycan hökuməti özünün tolerant mahiyyətinə uyğun olaraq buna getmədi və erməni deputatları Bakıya gəldilər. Bu səfərin yaxşı tərəfi də o idi ki, onlar, öz miskin ölkələrindən fərqli olaraq, Azərbaycanda gedən inkişafı öz gözlərilə gördülər. İctimai rəydəki gərginliyə rəğmən düşmən ölkə deputatlarına Bakını gəzmək imkanının yaradılması da əslində bu məqsədlə izah olunmalıdır.
Lakin bu məsələdə də erməni mahiyyəti öz sözünü dedi. Belə ki, səfər boyu başqa neqativ tapmayan erməni deputatları Azərbaycan tərəfini onları Bakıdakı erməni kilsəsinə buraxmamaqda suçlayıb. Elə Bakı turu öncəsi onların öz sosial şəbəkə səhifələrində “sabah Bakını gəzib baxacağıq, görək erməni irsi burada necə qorunur” kimi həyasız paylaşımları da bu iblis mahiyyətindən xəbər verir. Çünki bu həmin bədnam toplumun nümayəndələridir ki, işğal etdikləri torpaqlarımızda müqəddəs məkanlarımızı yerlə bir edib, dağıtmadığı məscidlərdə isə donuz saxlayırlar. İndi bu toplumun üzvlərinin onlara mötəbər tədbirdə iştirak etməyə şərait yaradılmasını, göstərilən insani qonaqpərvərliyi bir kənara atıb fəaliyyəti dayandırılmış kilsəyə buraxılmamalarını əlində bayraq etməsi və bunu az qala bütün xəbər saytlarının elə həmin başlıqla təqdim etməsi sadəcə acı gülüş doğurur...
Baki-xeber.com
