İranın media fəaliyyətinə məsul qurumlarının nümayəndələri Azərbaycanda səfərdədir. Səfər Azərbaycan Mətbuat Şurası ilə İranın Mədəniyyət və İslam İrşadı Nazirliyinin Mətbuat və İnformasiya Departamenti arasında imzalanmış Əməkdaşlıq Memorandumu çərçivəsində reallaşıb. Şuradan baki-xeber.com-a verilən məlumata görə, İran İslam Respublikasının Mədəniyyət və İslam İrşadı Nazirinin mətbuat işləri üzrə müavini Hüseyn Entezaminin rəhbərlik etdiyi nümayəndə heyəti iyulun 10-dan 13-dək Azərbaycanda səfərdədir.
Nümayəndə heyətinin tərkibinə, H.Entezami ilə yanaşı, Mədəniyyət və İslam İrşadı Nazirliyinin mətbuat işləri üzrə planlama şurasının üzvü Həmidrza Asəfi, xarici KİV-lə iş üzrə baş direktor Məhəmməd Cəfər Safi, İranın Xəbər Onlayn Agentliyinin baş redaktoru Cavad Məhacer, İranın Naşravran təşkilatının İdarə Heyətinin üzvü Seyid Cəfər Haşemi və İranın Xarici İşlər Nazirliyinin Media və Ümumi Siyasət idarəsinin rəis müavini Həmid Əhmədi daxildir.
Səfər proqramında nümayəndə heyətinin üzvlərinin KİV rəhbərləri ilə ümumi toplantısının keçirilməsi, həmçinin ayrı-ayrı redaksiyalara səfərləri, rəsmi şəxslərlə, deputatlarla görüşləri, Azərbaycanın tarixi yerlərinə səyahətləri nəzərdə tutulub.
Qeyd edək ki, Azərbaycan Mətbuat Şurası ilə İranın Mədəniyyət və İslam İrşadı Nazirliyinin Mətbuat və İnformasiya Departamenti arasında imzalanmış Əməkdaşlıq Memorandumunda hər iki ölkənin jurnalistika ilə əlaqədar qurumlarının nümayəndələrinin, habelə KİV təmsilçilərinin qarşılıqlı səfərlərinin təşkili, birgə toplantıların keçirilməsi, təcrübə mübadiləsinin aparılması və s. tədbirlər nəzərdə tutulur. Əməkdaşlıq Memorandumu çərçivəsində Azərbaycandan da İrana jurnalistlərin səfəri gerçəkləşdiriləcək.
