BMT beynəlxalq hüquqa əməl etməyən və bu beynəlxalq təşkilatın qərarlarını yerinə yetirməyən ölkələrə təzyiq göstərməlidir. "Trend"-in məlumatına görə, bunu Bakıda Almaniyanın Bohum Universitetinin beynəlxalq hüquq üzrə professoru Hans Yoahim Hayns Ermənistan tərəfindən uzun illərdir BMT Təhlükəsizlik Şurasının qətnamələrinin icra edilməməsinə münasibət bildirərkən deyib.
Professor qeyd edib ki, Dağlıq Qarabağ ermənilərinin müstəqil dövlət elan etmək və öz müqəddəratlarını təyin etmək hüququ yoxdur: "Çünki onlar Azərbaycanda milli azlıqdırlar. Belə məsələləri isə bütün ölkə əhalisi həll etməlidir. Məsələyə ermənilərin məntiqi ilə yanaşsaq, gərək dünyada 3 mindən çox dövlət olsun. Bu isə beynəlxalq münasibətlər sisteminin sonu deməkdir".
O bildirib ki, Dağlıq Qarabağ ərazisində qanunsuz rejim Ermənistanın müdaxiləsi nəticəsində yaranıb: "Mən həmişə ATƏT-in Minsk Qrupunu Dağlıq Qarabağ məsələsində həm öz müqəddəratını təyin etmə hüququ, həm də Azərbaycanın ərazi bütövlüyü prinsipini yanaşı xatırlatdığına görə tənqid edirəm".
Ekspert deyib ki, xarici oyunçular status-kvonun saxlanmasında maraqlıdır: "Buna görə də münaqişə tərəfləri, o cümlədən vətəndaş cəmiyyəti səviyyəsində bir-biri ilə birbaşa danışıqlar aparmalıdırlar".
