Məhərrəm Zülfüqarlı: "Onlar səfər zamanı ölkədə gedən inkişafı, quruculuq işlərini yaxından görür"
Prezident İlham Əliyev iyunun 15-də Parlamentlərarası İttifaqın baş katibi Martin Çunqonqu qəbul edib. Görüş zamanı Parlamentlərarası İttifaqın baş katibi M.Çunqonq Azərbaycana səfərindən böyük məmnunluq hissi keçirdiyini, Bakının gözəl şəhər olduğunu bildirib.
O, ölkəmizdə müxtəlif dinlərin nümayəndələrinin dinc şəraitdə yaşamasının önəmini qeyd edərək, Parlamentlərarası İttifaqın Azərbaycanla əməkdaşlıqda xüsusilə maraqlı olduğunu vurğulayıb. Ölkəmiz haqqında həmişə yaxşı məlumatlar eşitdiyini deyən M.Çunqonq bu həqiqətlərin bütün dünyaya çatdırılmasının vacibliyini qeyd edib.
Azərbaycan haqqında dolğun və obyektiv məlumatların yayılmasında maraqlı olduğumuzu deyən Prezident İlham Əliyev müxtəlif ölkələrdən qonaqların, o cümlədən parlament üzvlərinin Azərbaycana səfərə gələrək inkişafı öz gözləri ilə görməsinin əhəmiyyətini vurğulayıb. Parlamentlərarası əlaqələrin önəminə toxunan dövlət başçısı Azərbaycanın MDB, Avropa Şurası, ATƏT və digər beynəlxalq təşkilatların parlament assambleyaları ilə əməkdaşlıq etdiyini və çoxşaxəli əməkdaşlığın uğurlu nəticələr verdiyini deyib. Ölkə başçısı qeyd edib ki, Azərbaycanda təşkil olunan yüksək səviyyəli beynəlxalq tədbirlər, səfərlər xalqlar və millətlər arasında dialoq, tolerantlıq və qarşılıqlı anlaşma mühitinin yaradılmasında xüsusi rol oynayır.
Ümumilikdə, belə bir mötəbər qurumun rəhbərinin ölkə Prezidenti ilə görüşməsi nə deməkdir? Məsələyə münasibət bildirən İctimai Problemlərin Tədqiqi Assosiasiyasının rəhbəri Məhərrəm Zülfüqarlının sözlərinə görə, bu, dövlət başçısının nüfuzunun göstəricisidir: "Məsələ ondadır ki, Prezident İlham Əliyevin dünyada böyük nüfuzu var. Bu səbəbdən regiona səfər edən beynəlxalq təşkilatların rəhbərləri ölkə başçısı ilə görüşə xüsusi önəm verir. Bu baxımdan Parlamentlərarası İttifaqın baş katibi M.Çunqonqun Azərbaycana səfəri mühüm əhəmiyyət kəsb edir. Mötəbər qurumları təmsil edən şəxslərin Azərbaycana səfərləri nə qədər çox olsa, bu bir o qədər ölkənin nüfuzu baxımından yaxşı göstəricidir. Çünki onlar səfər zamanı ölkədə gedən inkişafı, quruculuq işlərini yaxından görür. Başqa bir tərəfdən, nəzərə almaq lazımdır ki, bir sıra beynəlxalq qurumlarla çoxşaxəli əməkdaşlıq uğurlu nəticələrə gətirib çıxarır. Bu baxımdan Azərbaycanın regionda nüfuzu və yeridilən balanslı siyasət dövlət maraqlarımızın qorunmasına xidmət edir".
Vidadi ORDAHALLI
