İyunun 12-də Daxili İşlər Nazirliyinin Əlahiddə Çevik Polis Alayında Milli Qurtuluş Gününə həsr olunmuş tədbir keçirilib.
İclası giriş sözü ilə açan alay komandiri, polis general-mayoru Zaur Abdullayev 1993-cü ilin iyun hadisələri ərəfəsində respublikamızda yaranmış ağır vəziyyətdən danışaraq bildirib ki, müstəqilliyimizin ilk illərində ölkəmizdə anarxiya, xaos hökm sürürdü. Belə ağır vəziyyətdə xalqın təkidli tələbilə ümummilli lider Heydər Əliyev Bakıya dəvət olundu, bundan sonra ölkədə ictimai-siyasi sabitlik yarandı, ulu öndərin müdrik siyasəti nəticəsində sosial-iqtisadi və siyasi inkişafa nail olundu, dövlətçiliyimizə yönəlmiş qəsdlərin qarşısı qətiyyətlə alındı.
Daha sonra çıxış edən Bakı Dövlət Universitetinin professoru, tarix elmləri doktoru Nuru Məmmədov bildirib ki, ümummilli liderin rəhbərliyilə hələ 1969-1982-ci illərdə ictimai həyatın ən müxtəlif sahələrindəki köklü dəyişikliklər miqyasına görə Azərbaycanın quruculuq salnaməsində şanlı səhifələr yazıb. Ölkəmiz qısa müddətdə ittifaqın qabaqcıl respublikalarından birinə çevrilib, onlarla zavod, fabrik, istehsalat sahələri yaradılıb, 250-dən artıq sənaye müəssisəsi fəaliyyətə başlayıb.
O qeyd edib ki, Azərbaycan 1991-ci il oktyabrın 18-də dövlət müstəqilliyini bərpa etsə də, bu istəyini reallaşdıra, dövrün doğurduğu ağır problemlərin öhdəsindən gələ bilməmişdi. Nəticədə iqtisadi tənəzzül dərinləşmiş, xalqın yaşayış səviyyəsi pisləşmiş, qanunçuluğun, hüquq qaydalarının, insan hüquq və azadlıqlarının qorunmasında ciddi problemlər yaranmışdı. Xüsusən də 1992-ci ilin mayında silahlı yolla hakimiyyətə gələn AXC-Müsavat rəhbərliyinin siyasi səriştəsizliyi, qətiyyətsizliyi Azərbaycan dövlətçiliyinə ciddi təhlükəyə çevrilən neqativ meyllərin baş qaldırmasına - siyasi mübarizədə qanunsuz silahlı birləşmələrdən istifadəyə, etnik separatizmə, vətəndaş itaətsizliyinə gətirib çıxarmışdı. 1993-cü ilin iyununda xalqın tələbilə ulu öndərin Azərbaycanda ali hakimiyyətə qayıdışından sonra ölkədə qanunçuluğun və hüquq qaydalarının bərpası istiqamətində kompleks tədbirlərin həyata keçirilməsinə, hüquqi, siyasi və iqtisadi islahatlara başlanıb, ictimai-siyasi sabitlik bərqərar olunub. Qısa vaxtda yüksək döyüş qabiliyyətli, vahid komandanlıqdan idarə olunan ordu yaradılıbş, Silahlı Qüvvələrimizin ilk həmləsində Horadiz qəsəbəsi və ətraf yaşayış məntəqələri işğaldan azad edilib.
Ümummilli liderin rəhbərliyilə 1993-2003-cü illərdə ölkədə həyata keçirilən siyasətin - iqtisadi islahatlar və inkişafın mahiyyət etibarilə yeni Azərbaycan modelinin formalaşmasına zəmin yaratdığı qeyd olunan tədbirdə xüsusilə vurğulanıb ki, ulu öndər Heydər Əliyevin qurub-yaratdığı, müstəqilliyə qovuşdurduğu Azərbaycan bu gün Prezident İlham Əliyevin rəhbərliyilə sürətlə inkişaf edir.
İlham Babayev, polis polkovnik-leytenantı
