Dağlıq Qarabağ münaqişəsinin nizamlanması üzrə sənəd əvvəlki sənəddir. Trend-in məlumatına görə, bunu Azərbaycanın xarici işlər naziri Elmar Məmmədyarov Bakıda estoniyalı həmkarı Sven Mikserlə birgə mətbuat konfransında deyib.
Nazir bildirib ki, bu sənəd üzərində Azərbaycan, Ermənistan və Rusiya prezidentləri səviyyəsində Sankt-Peterburqda birgə görüş zamanı iş aparılıb: "Hazırda bu sənəd danışıqlar masasında əsas sənəd olaraq qalır”.
Azərbaycanın XİN rəhbəri qeyd edib ki, aprelin 29-da Moskvada ermənistanlı və rusiyalı həmkarları ilə görüşündə danışıqlar prosesinin irəliləməsi məsələsini müzakirə edib.
ATƏT-in Minsk qrupu həmsədrlərinin regiona səfərini şərh edən E.Məmmədyarov deyib: “Mən indi həmsədrlərin hansı təkliflərlə Bakıya gələcəyini deyə bilmərəm”.
O bildirb ki, həmsədrlər hazırda Ermənistanda səfərdədirlər: “Gözləyək görək, onlar Ermənistandan Bakıya hansı mesajla gələcəklər”.
Nazir qeyd edib ki, Azərbaycan Dağlıq Qarabağ üzrə substativ danışıqların başlanmasını istəyir: “Azərbaycanın mövqeyi dəyişməz olaraq alır. Status-kvo dəyişməlidir, belə ki, onun saxlanılmasının hansı fəsadlara yola aça biləcəyi hamıya məlumdur”.
Qeyd edək ki, ATƏT-in Minsk qrupunun həmsədrləri iyunun 19-da Azərbaycana səfər edəcklər.
“Azərbaycanla Avropa İttifaqı (Aİ) arasında strateji tərəfdaşlıq haqqında yeni saziş üzrə danışıqlar prosesində iştirak etmək üçün Aİ-nin Avropa qonşuluq siyasəti və genişlənmə danışıqları üzrə komissarı Yohannes Han iyunun 15-də Bakıya səfər edəcək”. Bunu da Azərbaycanın xarici işlər naziri deyib.
E.Məmmədyarov qeyd edib ki, estoniyalı həmkarı ilə görüş zamanı Azərbaycan-Aİ əməkdaşlığı məsələləri müzakirə olunub: “Hesab edirik ki, biz Aİ ilə danışıqlar prosesinin sürətlənməsi üçün düzgün yoldayıq və uğur qazanacağımıza ümid edirik”.
“Azərbaycanın və Estoniyanın xüsusilə də təhsil və İT sahələrində münasibətlərin dərinləşdirilməsi üçün böyük potensialı var”. Bunu isə Estoniyanın xarici işlər naziri Sven Mikser deyib.
O qeyd edib: "Biz hesab edirik ki, əməkdaşlığın bu istiqamətlərdə genişləndirilməsi üçün çalışmalıyıq. Ümid edirəm ki, Azərbaycan və Avropa İttifaqı strateji tərəfdaşlıq haqqında saziş imzalayacaqlar. Bizim üçün sazişin kontenti çox mühümdür, bu, Bakı-Tallin münasibətlərinə də müsbət təsir edəcək".
Dağlıq Qarabağ münaqişəsinin nizamlanmasına gəlincə, S.Mikser bildirib ki, münaqişənin hərbi yolla həlli yoxdur: "Sülh yolu ilə nizamlanma münaqişəyə cəlb olunmuş tərəflərin də maraqlarına xidmət edir".
