Bu gün Bakıda “Azərbaycanda insan alverinə qarşı mübarizə üzrə potensialın artırılması” layihəsinin açılış mərasimi keçirilib.
Trend-in məlumatına görə, tədbirdə Azərbaycan xarici işlər nazirinin müavini Mahmud Məmmədquliyev, Daxili İşlər Nazirliyinin İnsan Alverinə qarşı Mübarizə Baş İdarəsinin rəisi Heydər Heydərov, Aİ-nin Azərbaycan nümayəndəliyinin rəhbəri Malena Mard və digər rəsmi şəxslər, ictimai xadimlər, millət vəkilləri iştirak ediblər.
Tədbirdə çıxış edənlər Azərbaycanda insan alverinə qarşı mübarizənin uğurlarından, yeni layihənin vacibliyindən bəhs ediblər.
Azərbaycanda 486 insan alverçisi məsuliyyətə cəlb edilib
“Son 12 ildə Azərbaycanda 486 insan alverçisi məsuliyyətə cəlb edilib”. Bunu Daxili İşlər Nazirliyinin (DİN) İnsan Alverinə qarşı Mübarizə Baş İdarəsinin rəisi Heydər Heydərov bu gün “Azərbaycanda insan alverinə qarşı mübarizə üzrə potensialın artırılması” layihəsinin açılış mərasimində deyib.
H.Heydərov bildirib ki, 2005-ci ildə Azərbaycanda insan alverinə qarşı mübarizə üzrə qanun qəbul edilib.
Onun sözlərinə görə, Azərbaycanda il ərzində törədilən cinayətlərin bir faizdən azı insan alveri cinayətinin payına düşür: “2015-ci ildə 26 min 916 cinayət işindən yalnız 128-i insan alveri cinayətidir. Bu rəqəm isə bir faizdən azdır. 12 ildən artıq bir müddətdə insan alveri ilə bağlı 1078 cinayət işi araşdırılıb. Bu müddətdə 486 insan alverçisi məsuliyyətə cəlb edilib. 761 insan alveri qurbanı müəyyən edilərək cəmiyyətə inteqrasiya edilib".
Aİ Azərbaycanda insan alverilə mübarizəyə qiymət verdi
“İnsan alveri bütün dünyanı, o cümlədən Avropa İttifaqını (Aİ) və insanların fundamental hüquqlarını təhlükə altına qoyur”. Bunu isə Aİ-nin Azərbaycan nümayəndəliyinin rəhbəri Malena Mard deyib.
O qeyd edib ki, insan alverinə qarşı mübarizə Aİ-nin gündəliyində duran ən vacib məsələlərdən biridir: “Dünya ölkələrinin bu istiqamətdə birgə fəaliyyət göstərməsi və bu bəlaya qarşı birgə mübarizə aparması mühüm əhəmiyyət kəsb edir. Biz Azərbaycanla bu istiqamətdə layihənin həyata keçirilməsinə çox şadıq. Avropa İttifaqı Azərbaycanla bir çox sahələrdə əməkdaşlıq edir”.
M.Mard bilirib ki, Aİ-nin Azərbaycanla əməkdaşlıq təcrübəsi var və bir çox layihələr uğurla icra edilib: “İnanıram ki, bu layihə də uğurla icra olunacaq və insan alverinə qarşı mübarizəyə öz töhfəsini verəcək”.
Mahmud Məmmədquliyev insan alverinə qarşı mübarizəni Azərbaycanın dövlət siyasətinin vacib prioritetlərindən biri kimi təqdim etdi
Azərbaycan xarici işlər nazirinin müavini Mahmud Məmmədquliyev isə bildirib ki, insan alverinə qarşı mübarizə Azərbaycanın dövlət siyasətinin vacib prioritetlərindən biridir.
M.Məmmədquliyev bildirib ki, Azərbaycan insan alverinə qaşı mübarizə sahəsində ardıcıl və məqsədyönlü siyasət həyata keçirir və bu siyasətin əsasında qabaqlama, təqib prinsipləri durur.
Nazir müavini bildirib ki, bu gün insan alveri ilə mübarizə sahəsində layihənin təqdimatı keçirməklə Beynəlxalq Miqrasiya Təşkilatı, Avropa ittifaqı və Azərbaycan arasında üçtərəfli əməkdaşlığın yeni mərhələsinin əsası qoyulur: “İnanırıq ki, bu layihə əvvəlki layihələr kimi uğurla həyata keçiriləcək və insan alverinə qarşı mübarizədə daha geniş imkanlar açacaq. Azərbaycan tərəfi layihədə nəzərdə tutulmuş tərəf qismində çıxış edəcək və layihənin uğurla icra olunmasında öz öhdəliyini yerinə yetirəcək. Biz layihənin həyata keçirilməsində dəstək verməyə hazırıq”.
"Biz Avropa İttifaqı ilə viza məsələsində sadələşdirilmə mərhələsindəyik. Viza rejiminin tamamilə ləğvi isə gələcəyin işidir". APA-nın məlumatına görə, bunu da M.Məmmədquliyev deyib.
Nazir müavininin sözlərinə görə, ilk növbədə birinci sazişi həyata keçirilməli, onun müsbət nəticələri əldə edilməlidir."Bəzən hər iki tərəfdən kiçik məsələlər ortaya çıxır. Biz bu məsələləri axıra çatdırsaq, tərəflər arasında fəaliyyət planı hazırlanmalı, bunun da məqsədi vizasız gediş-gəliş olmalıdır. Bunun nə zaman ola biləcəyini deyə bilmərəm. Bu, hər iki tərəfdən asılıdır. Azərbaycanda viza sadələşdirilməsi və readmissiya sazişləri üzrə nəzarət komitəsinin iclası olacaq. Ola bilsin ki, bu iclasda hansısa nailiyyət və ya irəliləyiş əldə olunsun". - deyə M. Məmmədquliyev qeyd edib.
