Günel Fərhadqızı: "Mehriban Əliyeva tərəfindən qarşıya qoyulmuş vəzifələrin icrası şübhə doğurmur"
Azərbaycan Prezidentinin ictimai-siyasi məsələlər üzrə köməkçisi Əli Həsənov Yeni Azərbaycan Partiyasının (YAP) Nərimanov rayon təşkilatının X konfransında deyib ki, Birinci vitse-prezidentlik institutu Azərbaycanın əsas hədəflərini uğurla həyata keçirəcək bir qurum olacaq: "Azərbaycanın Birinci vitse-prezidenti Mehriban xanım Əliyeva Azərbaycanda çoxsaylı ilklərə imza atıb".
Ə.Həsənov bildirib ki, Mehriban Əliyeva birinci xanım institutunu formalaşdırdı, Heydər Əliyev Fondunun və Azərbaycan Mədəniyyət Fondunun prezidenti kimi Azərbaycan mədəniyyətinin, dilinin, tarixinin xarici ölkələrdə təbliğinin və təmsilçiliyinin yeni nümunəsini yaratdı və bu çox uğurlu nəticələr verdi: "Bu gün vitse-prezidentlik institutunu məhz Mehriban xanım Əliyeva inkişaf etdirir. Mən əminəm ki, Birinci vitse-prezidentlik institutu Azərbaycan dövlətinin inkişafında önəmli rol oynayacaq, onun əsas hədəflərini, sosial, mədəni və digər sahələrdə əhəmiyyətli layihələri uğurla həyata keçirəcək bir qurum olacaq. Mehriban xanım Əliyevanın dinamik xarakteri, onun xarakterindən irəli gələn konkretlik, işgüzarlıq, humanistlik, Azərbaycan dövlətinə, xalqına bağlılıq hissi əsas verir ki, o, cənab Prezidentin qarşıya qoyduğu vəzifələrin reallaşdırılmasına, hakimiyyət komandasının səfərbər olunaraq inamla ölkəni gələcəyə doğru aparmasına dəyərli töhfə versin".
Göründüyü kimi, Birinci vitse-prezidentlik institutunun ölkənin gələcək inkişafında mühüm rol oynayacağı fikri səsləndirilir. Bununla bağlı ekspertlərin nə kimi əsaslandırması var?
İqtisadçı Günel Fərhadqızının sözlərinə görə, ötən ilin sentyabr ayının 26-da keçirilmiş referendumda qəbul edilmiş Azərbaycan Respublikası Konstitusiyasına dəyişikliklərə əsasən, ölkəmizdə vitse-prezidentlik institutu təsis edilib: "Bu çərçivədə İlham Əliyev Birinci vitse-prezident vəzifəsinə Mehriban Əliyevanı təyin edib. İlk şərhlərində ekspertlərin bəziləri Azərbaycandakı vitse-prezidentlik institutunu ABŞ analoqu ilə müqayisə etməyə çalışıb. Axı bu vəzifə ilk dəfə məhz həmin ölkədə yaranıb.
Məlum olduğu kimi, ABŞ-da vitse-prezident prezidentdən sonra ölkənin ikinci şəxsidir. Hesab edirəm ki, Azərbaycanda bu institut kimlərəsə oxşamaq istəyindən yaradılmayıb.
Azərbaycanda müşahidə edilən iqtisadi problemlər və Prezident İlham Əliyevin onların aradan qaldırılması məqsədilə apardığı miqyaslı islahatlar fonunda vitse-prezidentlik institutuna kəskin zərurət yaranıb. Bununla birlikdə, islahatların həyata keçirilməsində Nazirlər Kabinetinin funksiyaları və rolu çoxlu suallar yaradırdı. Prezident bu və ya digər islahatın həyata keçirilməsinə görə bütün siyasi məsuliyyəti öz üzərinə götürürsə, digər icra orqanları burada ya passiv rol oynayır, yaxud da fəal müşahidəçiyə çevrilir.
Digər tərəfdən, Nazirlər Kabineti kollegial orqandır və bu və ya digər proseslərə operativ və vaxtında müdaxilə etmək iqtidarında deyil. Özünün azacıq əhəmiyyətli qərarlarını belə hökumət müxtəlif nazirliklər səviyyəsində təsdiq etdirməli və digər prosedur qaydalara riayət etməlidir. Bəzən həmin proses illərlə uzana bilər və bu, islahatların sürətini azaldır, onları ətalətli və uğursuz edir.
Bu baxımdan, vitse-prezidentlik institutu prezidentin bu və ya digər göstərişlərinin həyata keçirilməsinə nəzarəti gücləndirə, bürokratik əngəlləri aradan qaldıra və proseslərin qat-qat sürətlənməsinə səbəb ola bilər. Bütün bu dəyişikliklərə baxmayaraq, Nazirlər Kabineti icra hakimiyyətinin ali orqanı olaraq qalır. Azərbaycanda vitse-prezidentlik institutunun tətbiqi və Birinci vitse-prezident vəzifəsinə Mehriban Əliyevanın təyin edilməsi iqtisadi islahatları sürətləndirəcək. Böyük iş təcrübəsini və şəxsi peşəkar keyfiyyətlərini nəzərə alaraq, Birinci vitse-prezident Mehriban Əliyeva tərəfindən qarşıya qoyulmuş vəzifələrin icrası şübhə doğurmur".
Məhəmmədəli QƏRİBLİ
