Aydın Mirzəzadə: "1918-ci ildə erməni millətçilərinin Qubada törətdikləri vəhşiliklər barəsində həqiqətin həm gələcək nəsillərə, həm də..."
Məlum olduğu kimi, Prezident İlham Əliyevin müvafiq tapşırığına uyğun olaraq, Azərbaycan Respublikası Prezidenti Administrasiyasının rəhbəri Ramiz Mehdiyev "Quba şəhərində "Soyqırım memorial kompleksi" ilə bağlı bəzi məsələlər haqqında" sərəncam imzalayıb.
Sənədə əsasən, kompleksin mövcud vəziyyətinin araşdırılması və görüləcək işlər barədə müvafiq təkliflərin hazırlanması üçün komissiya yaradılıb. Azərbaycan Respublikası Prezidentinin ictimai-siyasi məsələlər üzrə köməkçisi-şöbə müdiri Əli Həsənov komissiyanın sədri təyin edilib. Komissiyanın tərkibinə, həmçinin, Azərbaycan Milli Elmlər Akademiyasının vitse-prezidenti, Milli Məclisin Elm və təhsil komitəsinin sədri İsa Həbibbəyli, AMEA-nın A.Bakıxanov adına Tarix İnstitutunun direktoru, Milli Məclisin deputatı Yaqub Mahmudov, Azərbaycan Respublikasının Dini Qurumlarla İş üzrə Dövlət Komitəsinin sədri Mübariz Qurbanlı və digər tanınmış şəxslər daxildir.
Komissiya araşdırmanın nəticələri və görüləcək işlər barədə təkliflərini bir ay müddətində Azərbaycan Respublikası Prezidentinin Administrasiyasına təqdim etməlidir.
Quba soyqırımının dünyada tanınması istiqamətində son 10 ildə bir sıra işlər görülüb. 2007-ci ildə Qubada "Soyqırım memorial kompleksi" yaradılıb. Ümumilikdə, Prezidentin ictimai-siyasi məsələlər üzrə köməkçisi, şöbə müdiri Əli Həsənovun komissiyanın sədri təyin edilməsi sözügedən soyqırımın dünyada tanıdılmasında nə kimi rol oynayacaq?
Məsələyə münasibət bildirən millət vəkili Aydın Mirzəzadə buna bir neçə prizmadan yanaşdı: "Son dövrlər bəzi mütəxəssislər kompleksin vəziyyəti ilə bağlı müəyyən təkliflər veriblər. Bu onun qorunub saxlanması və kompleksin daha da təkmilləşdirilməsi ilə bağlı təkliflərdir. Oranın nəzərdən keçirilməsi və kompleksin vəziyyətinin qiymətləndirilməsi ilə bağlı Prezident Administrasiyasının rəhbəri tərəfindən sərəncam imzalandı və müvafiq addım atıldı. Hesab edirəm ki, ilk növbədə həmin kompleksin qorunub saxlanması, ona təbii erroziyanın təsirinin qarşısının alınması üçün indiki tədbirlər haqqında mövqe bildiriləcək. Eyni zamanda, həmin kompleksin fəaliyyətinin gücləndirilməsi ilə də bağlı təkliflər veriləcək. Bütün bunlar göstərir ki, Azərbaycan dövləti özünün tarixinə çox böyük həssaslıqla yanaşır.
1918-ci ildə erməni millətçilərinin Qubada törətdikləri vəhşiliklər barəsində həqiqətin həm gələcək nəsillərə, həm də beynəlxalq ictimaiyyətə çatdırılması üçün daha geniş işlər görüləcək".
Vidadi ORDAHALLI
