Yadigar Məmmədli: "Prezidentin qayğısı nəticəsində jurnalistlərin mənzil-məişət şəraiti yaxşılaşdırılır"
"Mənzilə ehtiyacı olan jurnalistlər üçün dövlət tərəfindən 3-cü bina da tikiləcək". Xəbər verildiyi kimi, bunu Kütləvi İnformasiya Vasitələrinin İnkişafına Dövlət Dəstəyi Fondunun icraçı direktoru Vüqar Səfərli deyib.
Qeyd edək ki, bundan öncə Mətbuat Şurasının sədri Əflatun Amaşov da jurnalistlər üçün 3-cü binanın tikiləcəyi anonsunu vermişdi. Xatırladaq ki, jurnalistlərin Bakının Bibiheybət yaşayış sahəsindəki 156 mənzildən ibarət ilk binası 2013-cü ildə istifadəyə verilib. 256 mənzildən ibarət ikinci bina bu il 22 iyul - Milli Mətbuat Günündə sahiblərinə veriləcək.
O da məlumdur ki, jurnalist ömrü hər zaman qayğılarla, sosial çətinliklərlə yüklü olub. Bu yükü təkbaşına çəkmək, problemlərə sinə gərmək asan məsələ deyil.
Ancaq Azərbaycanda jurnalistlərin həyat şəraitinin yaxşılaşdırılmasına dövlətin verdiyi açıq dəstək ictimaiyyət tərəfindən yüksək səviyyədə qarşılanır. Dövlət başçısının "Azərbaycan mətbuat işçilərinin sosial müdafiəsinin gücləndirilməsi tədbirləri haqqında" 22 iyul 2010-cu il tarixli Sərəncamı isə xüsusi qeyd olunmalıdır. Çünki həmin sərəncam Azərbaycanda mətbuat işçilərinin mənzil-məişət şəraitinin yaxşılaşdırılması və onlar üçün yaşayış evlərinin tikilməsi məqsədilə verilib. Ondan sonra bu davamlı xarakter almağa başlayıb.
Ümumən İlham Əliyev prezidentlik fəaliyyəti dövründə kütləvi informasiya vasitələrinin maddi-texniki bazasının möhkəmləndirilməsi istiqamətində bir-birinin ardınca sərəncamlar imzalayıb, jurnalistlərin sosial müdafiəsinin gücləndirilməsi istiqamətində təsirli tədbirlərin həyata keçirilməsinə nail olub. Jurnalistlər üçün yaşayış evlərinin tikilməsi ona görə xüsusi qeyd edilməyə layiqdir ki, bu vaxta qədər dünyanın heç bir ölkəsində belə bir tədbir olmayıb. Jurnalistlər üçün 3-cü binanın da tikiləcəyinin bəyan olunması mətbuat işçilərinə göstərilən dövlət qayğısının növbəti göstəricisidir.
Məsələyə münasibət bildirən Demokratik Jurnalistlər Liqasının rəhbəri Yadigar Məmmədli dövlətin jurnalistlərə göstərdiyi bu qayğını alqışladığını dedi: "Prinsipcə, bu hardasa gözlənilən idi. Ona görə ki, cənab Prezident jurnalistlərə göstərilən bu qayğının kampaniya xarakteri daşımadığını demişdi. O xüsusi olaraq qeyd etmişdi ki, bu daimi olacaq. Çünki jurnalistlərin aldıqları əməkhaqqı imkan vermir ki, onlar sosial vəziyyətini tam yaxşılaşdıra bilsin. Yəni mənzil problemini həmin əməkhaqqı ilə həll etmək mümkün deyil. Ümumilikdə, üçüncü binanın da tikiləcəyi barədə səslənən fikirlər xoş xəbərdir. Baxmayaraq ki, dünyada iqtisadi böhran var və bu, ölkəmizə də təsir edir. Ancaq dövlət başçısının qayğısı nəticəsində jurnalistlərin mənzil-məişət şəraiti yaxşılaşdırılır. Belə bir addımın atılması önəmli hadisədir. Bu həm də KİV-ə göstərilən böyük etimaddır. Hesab edirəm ki, KİV təmsilçiləri göstərilən bu etimadı doğrultmalıdır. Mətbuat professional olmalı, öz peşəkarlığını, məsuliyyətini artırmalıdır".
Vidadi ORDAHALLI
