İqtisadi Əməkdaşlıq Təşkilatına (İƏT) üzv ölkələri arasında iqtisadi əlaqələrin möhkəmləndirilməsi və inteqrasiya proseslərində kömək etmək kimi qarşıya qoyduğu ali məqsədlərə tam nail olunması üçün şərait mövcuddur. Trend-in məlumatına görə, bunu Baş Prokuror Zakir Qaralov Bakıda keçirilən İƏT-ə üzv dövlətlərin prokurorluq, ixtisaslaşdırılmış korrupsiyaya qarşı mübarizə qurumları rəhbərlərinin və Ombudsmanlarının 3-cü Görüşündə çıxışı zaman deyib.
Z.Qaralov bildirib ki, müasir dövrdə müsəlman dövlətlərinin siyasi sabitliyə, mənəvi həmrəyliyə və tərəfdaşlığa böyük ehtiyacı var: “Bu, ölkələrin iqtisadi tərəfdən inkişafını labüd edir”.
“Azərbaycanda korrupsiya hallarına qarşı mübarizənin gücləndirilməsi daim diqqət mərkəzində saxlanılır və bu istiqamətdə ardıcıl tədbirlər həyata keçirilir” - deyə Z.Qaralov bildirib.
Z.Qaralov vurğulayıb ki, Azərbaycanda korrupsiyaya qarşı mübarizə sahəsində qanunvericilik beynəlxalq hüquqa uyğunlaşdırılıb və tam təkmilləşdirilib, işlək istitusional mexanizm yaradılıb və onun səmərəliliyi təmin edilib: “Ölkəmizdə korrupsiyaya qarşı mübarizə sahəsində üç milli fəaliyyət planının icrası başa çatdırılıb. Açıq Hökumətin təşviqinə dair 2016-2018-ci illər üçün milli fəaliyyət planı isə hazırda uğurla icra edilməkdədir”.
Baş prokuror əlavə edib: "Bu gün tam əminliklə demək olar ki, Azərbaycanda korrupsiyaya qarşı səmərəli mübarizə üçün bütün qanunlar mövcuddur. Ölkədə həyata keçirilən korrupsiyaya qarşı uğurlu strategiya nəticəsində əldə edilən yüksək nəticələr artıq nəinki ölkə daxilində, hətta beynəlxalq miqyasda da tanınır, mötəbər beynəlxalq qurumlar ölkəmizdə korrupsiyaya qarşı mübarizəni yüksək qiymətləndirir”.
“Özünü müxalifət adlandıran, hüquqi qeydiyyatdan keçməyən siyasi partiyalar aldığı qrantlar barədə məlumat vermirlər”. Bunu da jurnalistlərə açıqlamasında Baş Prokuror deyib.
O bildirib ki, həmin şəxslər qanunları kobud pozurlar: "Biz də məcbur olduq ki, bir sıra tədbirlər görək. Bu sahədə Azərbaycanda qanunvericilik təkmilləşib. Onlar hər hansı qeyri-qanuni yolla Azərbaycanda həmin pulları ala bilmirlər. Ona görə də digər ölkələrdə hesablar açmaqla bunu həyata keçirirlər. Bu da qanunsuzdur”.
Baş Prokuror bildirib ki, bu halların qarşısı tam ciddiliklə alınıb: “Gələcəkdə də bu halların qarşısı alınacaq. Həmin yoldaşlara sual olunur, onlar 10 illərlə hər hansı bir qurumda işləməyərək cangüdənlər saxlayır, müxtəlif avtomobillər alırlar, xarici səfərləri nəyin hesabına edirlər? Onlar maliyyə hesabatları vermirlər”.
Sonra Z.Qaralov əlavə edib ki, nümunə kimi hakim Yeni Azərbaycan Partiyası (YAP) həm Maliyyə Nazirliyinə, həm də Ədliyyə Nazirliyinə hesabat verirlər: "Bəziləri qanundan danışırlar, amma özləri isə bu cür qanunsuz qrant korrupsiyasına qoşulublar. Bunlar bilməlidirlər ki, son dövrlərdə baş verən hadisələr, aşkar edilən vəsaitlərin mənbələri bizim tərəfimizdən müəyyən ediləcək. Artıq vaxt çatıb ki, bu qurumların tam genş şəkildə maliyyə mənbələrinin yoxlanılmasını təmin edək".
Z.Qaralov deyib ki, Orduda baş verən hadisələrlə bağlı başlanmış cinayət işinin ətrafında Azərbaycan Ordusuna ləkə yaxmaq istəyən qüvvələr bəzi KİV-lərdə dövlət təhlükəsizliyimizə xələl gətirən, həqiqətə uyğun olmayan müxtəlif məlumatlar və məqalələr dərc edirlər. Onun sözlərinə görə, artıq 6 media orqanına Baş prokurorluq tərəfindən rəsmi xəbərdarlıq edilib: "Bütün KİV-i bu məlumatların işıqlandırılması ilə bağlı çəkindirməyə çağırıram. Azərbaycan dövləti müharibə şəraitində yaşayır. Heç kəsin ixtiyarı yoxdur ki, Azərbaycan Ordusuna, onun hərbi qüdrətinə, orduda xidmət edən qeyrətli azərbaycanlı balalarımıza ləkə yaxsın. İstənilən hallar mövcud ola bilər, ancaq dövlətin qurumları bunun qarşısını alıblar. Dövlətimiz və hərbi qüdrətimiz üçün bu gün hər hansı təhlükə yoxdur".
