İyunun 5-də "Bakı-Xəbər" qəzeti redaksiyasında qəzet əməkdaşlarına mənzillərin verilməsi ilə bağlı iclas keçirildi.
İclasda Prezident Administrasyasının tövsiyəsi ilə yaradılan "Kütləvi informasiya vasitələrinin əməkdaşlarına mənzillərin verilməsi qaydaları və şərtləri"nin müəyyənləşdirilməsi, eləcə də həmin qaydalar və şərtlər əsasında sənədlərin qəbulu prosesinin ədalətli və şəffaf şəkildə həyata keçirilməsi məqsədilə yaradılan komissiyanın üzvləri - Azərbaycan Mətbuat Şurasının idarə heyətinin üzvü, "İki sahil" qəzetinin baş redaktoru Vüqar Rəhimzadə, Jurnalist Həmkarlar İttifaqının sədri Müşfiq Ələsgərli və Azərbaycan Mətbuat Şurasının idarə heyətinin üzvü, "Bakı Xəbər" qəzetinin baş redaktoru Aydın Quliyev iştirak edirdi. İclasın sədri "Bakı-Xəbər" qəzetinin baş redaktoru Aydın Quliyev, katibi isə qəzetin redaktoru Samirə Səfərova seçildi.
İclas sədri Aydın Quliyev qonaqları salamlayaraq bildirdi ki, ölkə başçısı İlham Əliyevin sərəncamı ilə jurnalistlərin mənzil-məişət şəraitinin yaxşılaşdırılması məqsədilə son illərdə 2 yaşayış binasının tikilib istifadəyə verilməsi təqdirəlayiq haldır.
O vurğuladı ki, qəzet əməkdaşlarının namizədliyi şəffaf şəkildə müəyyən edilib.
Sonra komissiya üzvü Vüqar Rəhimzadə çıxış etdi. O bildirdi ki, ölkə başçısının jurnalistlərin mənzil-məişət şəraitinin yaxşılaşdırılması üçün verdiyi sərəncamlar yüksək səviyyədə icra olunur. Onun sözlərinə görə, Prezidentin 2013-cü il 22 iyul tarixli "Azərbaycan mətbuat işçilərinin sosial müdafiəsinin gücləndirilməsinə dair əlavə tədbirlər haqqında" Sərəncamına əsasən Səbail rayonu ərazisində 17 mərtəbəli, 3 girişli, 255 mənzilli sayca ikinci yaşayış binasının tikintisi artıq başa çatdırılıb.
Müşfiq Ələsgərli isə qeyd etdi ki, dünyanın heç bir yerində dövlət bu şərtlərlə jurnalistlərə mənzillər vermir. M.Ələsgərli ölkədə peşəkar səviyyədə jurnalistlik fəaliyyəti ilə məşğul olan insanların indi və gələcəkdə mənzillə təmin olunmasına əminliyini bildirdi və evə namizəd olacaq jurnalistlərə uğurlar arzu etdi.
"Bakı-Xəbər" qəzeti redaksiyasının iclasında baş redaktor Aydın Quliyev mənzil almağa namizəd olan əməkdaşların adlarını açıqladı. Redaksiya əməkdaşlarından 5 nəfərin namizədliyi səsə qoyularaq yekdilliklə qəbul edildi.
Xəbər xidməti
