Azərbaycan Respublikasının Qırğız Respublikasında Səfirliyi Azərbaycanın Milli Qurtuluş Günü ilə bağlı press-relizi Qırğızstanın Milli informasiya agentliyi olan "Kabar”da, ən böyük oxucu kütləsinə sahib olan "Akipress” informasiya agentliyində və digər agentliklərdə geniş işıqlandırılmışdır.
Məlumatlarda deyilir: "Azərbaycan öz müstəqilliyini 18 oktyabr 1991-ci ildə bərpa etmişdir. Lakin, müstəqilliyin ilk illərində ölkədə hakimiyyətin krizisə uğradığı müşaidə olunurdu və Ermənistanın işğalçılıq təcavüzü getdikcə güclənirdi.
1993-cü ilin iyun ayının 15-də xalqın təkidli tələbi ilə Heydər Əliyev Azərbaycan Respublikası Ali Sovetinin sədri, həmən ilin oktyabr ayının 3-də isə Azərbaycan Respublikasının Prezidenti seçildi. Beləliklə, 15 iyun tariximizə Milli Qurtuluş Günü kimi daxil olub. Azərbaycan Respublikası Milli Məclisi 1997-ci ilin iyununda bu günü bayram elan etdi.
Azərbaycan dövlətçiliyi ona qarşı yönəlmiş qəsdlərdən uğurla çıxdı. Ümummilli Liderin qətiyyəti xalqa ruh yüksəkliyi gətirdi, inamımızı özümüzə qaytardı, sabitlik və əmin-amanlıq yaratdı. Ümummilli liderimiz Heydər Əliyevin Azərbaycana rəhbərlik etdiyi dövrdə milli-mənəvi dəyərlərimiz bərpa edilmiş, onun qətiyyəti, apardığı uğurlu daxili və xarici siyasət sayəsində ölkəmiz xaosdan xilas olmuş, sivil demokratik inkişaf yolu ilə inamla irəliləyərək böyük nailiyyətlər qazanmışdır. Heydər Əliyev öz gücünə, təcrübəsinə güvənən dahi siyasətçi kimi dəfələrlə söylədiyi məşhur kəlamına sadiq qaldığını sübut etdi ki, "Azərbaycanın dövlət müstəqilliyi əbədidir, sarsılmazdır, dönməzdir”.
Hələ 1993-cü ildə BMT-nin Təhlükəsizlik Şurası Azərbaycan Respublikasının ərazi bütövlüyünü, suverenliyini dəstəkləyən, Ermənistan silahlı qüvvələrinin Azərbaycan ərazisindən qeyd-şərtsiz dərhal çıxarılması ilə bağlı dörd Qətnamə qəbul etmişdir.
Təəsüf ki , bu günədək belə böyük beynəlxalq təşkilatın qərarı Ermənistan tərəfindən icra olunmur.
Heydər Əliyev türkdilli ölkələrlə qardaşlıq münasibətlərinin yaranması üçün hədsiz işlər görüb və türk dünyasının ən çox sayılıb-seçilən şəxslərindəndir.
Mərkəzi Asiya və Qırğızstanla qarşılılıqlı sıx əməkdaşlığın inkişafı Heydər Əliyevin xarici siyasətinin prioritet hissərindən biri idi.
Heydər Əliyev deyirdi ki: "Bizim xalqlarımız qardaşdır və "Manas" dastanı bizim ümumi dilimizdə yazılıb".
