"Aprel müharibəsi"nin Azərbaycan cəmiyyətində doğurduğu ab-hava...

Tarix: 14.06.2016 / 00:22
Bölmə: Gündəm

"Aprel döyüşləri bir daha Azərbaycanın qüdrətini, ordumuzun gücünü göstərdi. Xahiş edirəm ki, bütün dünya azərbaycanlıları adından bizim qəhrəman hərbçilərimizi salamlayaq. Eşq olsun, Azərbaycan Ordusuna! Yaşasın Azərbaycan!" - Dünya Azərbaycanlılarının IV Qurultayında ölkə başçısı İlham Əliyevin qurultay iştirakçılarını Azərbaycan Ordusunu alqışlamağa çağırması cəmiyyətdə böyük əks-səda yaradıb.

Sevinirik ki, yalnız Azərbaycanda deyil, respublikamızdan uzaqlarda yaşayan azərbaycanlılar da milli ordumuzun qələbəsini, əsgər və zabitlərimizin şücaətini ayaq üstə alqışladı. Bəli, ordumuz alqışa layiqdir!

Azərbaycan xalqı o xalqlardandır ki, Vətən naminə, ana yurdun müqəddəratı üçün birləşə bilir. Zaman-zaman bunun şahidi olmuşuq. Millətindən, dilindən, dinindən asılı olmayaraq, üçrəngli bayrağımızı, ana torpağımızı and yeri bilən, özünə qiblə hesab edən vətəndaşlarımız Qarabağ yolunda hər zaman birgə mübarizə aparıb. Xalqımızın birliyi, cəmiyyətimizin ordu ilə eyni ruhda, eyni mövqedə olması təqdirəlayiq haldır. Biz bunu "dördgünlük müharibə" zamanı bir daha dərindən müşahidə edə bildik. Aydın göründü ki, xalqın ürəyi ordumuzla, əsgər və zabitlərimizlədir. Bu ilin aprel ayında ordumuzun düşmən üzərində qazandığı misilsiz qələbəni xalqımız böyük həyəcan və coşqu hissi ilə yaşadı. Sirr deyil ki, ordumuzun şücaəti, cəsarəti, yüksək peşəkarlıqla bir neçə strateji yüksəkliyi düşməndən geri qaytarması Azərbaycan cəmiyyətində böyük ruh yüksəkliyi yaratdı. Mübaliğəsiz deyə bilərik ki, cəmiyyətimiz bir daha ordumuza inandı. Əslində cəmiyyətimizin ordumuza inamı heç zaman solmayıb, əksinə, xalqımız hər zaman mübariz, yenilməz ordumuza ümid, inam bəsləyib. Ancaq "aprel müharibəsi" cəmiyyətə uzun illərdən bəri həsrətini çəkdiyi qələbə sevincini yaşatdı. Xalqımız kiçikdən-böyüyə qələbə müjdəsində idi. Çünki hər kəsin bir arzusu var - düşmən tapdağında olan doğma ellərimiz geri alınmalıdır. Ordu, dövlət və xalqın arzusunun birləşdiyi bu müqəddəs niyyətə qovuşmaq hər birimizin ümdə istəyidir. Dörd günlük "aprel müharibəsi" cəmiyyətimizi çalxalayıb durultdu, bu zaman hamının ürəyindəkilər meydana çıxdı. Xalqımızın niyyəti və məqsədi saf və müqəddəsdir. Orduya dəstək olmaq və tezliklə Qarabağ torpağını yağıdan təmizlənmiş görmək ən böyük məqsədimizdir. Bizi bu məqsədə ölkə başçısının müdrik siyasəti, ordumuzun qüdrəti və cəmiyyətimizin birliyi çatdıracaq.

"Dördgünlük müharibə" Azərbaycan tarixində yeni bir səhifə açdı. O səhifəyə qələbə, zəfər, xalq və ordu birliyi kimi müqəddəs kəlamlar həkk olundu. Ordu döyüşdü, cəmiyyət qürur hissi ilə ordumuzu alqışladı. Açığını deyək, bir gözümüz ağladı, bir gözümüz güldü. Qanını vətən torpağına qatan şəhidlərimizin düşmən gülləsinə tuş gəlməsi hər birimizi kədərləndirdi, ağrıtdı...Azərbaycanın çox yerinə üçrəngli Vətən bayrağına bükülən şəhid cənazələri aparıldı. Ağlayan ürəklərdən, gözlərdən bir nida qopdu - Vətən sağ olsun!

Böyük şairimiz Məmməd İlqarın aşağıdakı misraları analara, atalara bir təsəlli ismarıcı oldu:

Vətən, başa çox iş gələr,

Baş əymə, başın sağ olsun!

Biz ölməyə doğuluruq,

Torpağın, daşın sağ olsun!

Vətən oğulları canından keçdi ki, Vətən yaşasın, Vətənin torpağı düşmən nəfəsindən təmizlənsin, arınsın! Onsuz da Vətənə fəda olanlar ölmür, onlar şəhidlik zirvəsinə, ölümsüzlüyə qovuşub əbədi sağ qalır. Xalq heç vədə şəhidini unutmur. El yolunda canını qurban verənlər yaddaşlardan silinmir, bütün nəsillər onları ehtiramla yad edir. Könüllərdə yaşayan Vətən şəhidləri Vətəni ruhları ilə müdafiə edir. "Aprel müharibəsi"ndə Azərbaycan oğulları misilsiz şücaət göstərdi. Düşmənin burnunu ovdu ordumuz, inanırıq ki, hələ düşmən illər sonra da özünə gələ bilməyəcək.

Düşmənin təxribat maşını dayanmadan gecə-gündüz işləyir. Şər-böhtan ixrac edən bu maşın Qafqaza böyük təhlükə yaradıb. Erməni fitnəkarlığı qonşu xalqların hər birinin həyatında hiss olunur. Düşmən mütəmadi olaraq bizi təxribata çəkir. "Dördgünlük müharibə" də ermənilərin atəşkəsi pozması nəticəsində baş verib. Azərbaycan Ordusu düşmən hücumunu dəf edərək Azərbaycan üçün strateji əhəmiyyət daşıyan bir neçə yüksəkliyi düşməndən təmizləyib. Bilirik ki, döyüş nəticəsində Goranboy rayonu və Naftalan şəhərinə təhlükə yarada biləcək Talış kəndi ətrafındakı yüksəkliklər, eləcə də Seysulan məntəqəsi erməni qüvvələrindən tam təmizlənib. Horadiz şəhərinin erməni təhlükəsindən qorunması məqsədilə Füzuli rayonu istiqamətində yerləşən, geniş ərazini nəzarətdə saxlamaq imkanı verən, strateji əhəmiyyətli Lələtəpə adlandırılan yüksəklik də Azərbaycan hərbi qüvvələrinin nəzarətinə keçib. Məlum olduğu kimi, döyüşlər nəticəsində Azərbaycan Silahlı Qüvvələri Ağdərə-Madagiz istiqamətində yolların nəzarətdə saxlanmasını təmin edir. Rəsmi məlumata görə, hərbi əməliyyatlar zamanı Azərbaycan Silahlı Qüvvələrinin 88 hərbi qulluqçusu şəhid olub, 1 "Mİ-24" helikopteri vurulub və 1 tank mina partlayışı zamanı sıradan çıxıb.

Azərbaycan Orusunun düşmənə göstərdiyi müqavimət, işğalçılara həddini göstərməsi məqamları cəmiyyətdə gənc nəslin vətənpərvərlik tərbiyəsinə müsbət təsir göstərdi. Sevindirici haldır ki, uşaqlar belə "əsgərliyə getmək istəyirəm" deyirdi. Azərbaycan cəmiyyəti qısa bir vaxtda ayaq üstə qalxdı və orduya dəstək məqsədilə səfərbər oldu. Gənc qızlar və oğlanlar, ali məktəb tələbələri, keçmiş döyüşçülər, Qarabağ qaziləri Vətən uğrunda döyüşə getməyə hazır olduqlarını bəyan etdilər. Ölkə başçısı, Ali Baş Komandan İlham Əliyevin ünvanına yüzlərlə məktub, müraciət göndərildi. Məktub müəlliflərinin məramı bir idi - cəbhəyə getmək, düşmənlə savaşda ön cəbhədə olmaq, torpaqlarımızı işğaldan azad etmək. Cəmiyyətimiz, gənclərimiz birləşdi və cəbhədə əsgərlərimizin yanında olmağa can atdı. O da faktdır ki, müxtəlif bölgələrdən olan gənclər cəbhəyanı kəndlərə gedir, səfərbərlik və hərbi xidmətə çağırış idarələrinə, Müdafiə Nazirliyinə müraciət edirdilər.

Ölkə başçısı İlham Əliyev xalq və ordu birliyinin yenilməz olduğunu qeyd edir və bu vəhdətin xalqımızı qələbəyə, zəfərə aparacağını vurğulayır. Xalq, ordu və dövlət başçısının birliyi həqiqətən də bizi zəfərə yaxınlaşdırır. Dövlət başçımızın cəbhə bölgəsinə getməsi, təmas xəttində düşməndən ziyan görən sakinlərlə görüşməsi, onlara ürək-dirək verməsi, qələbəyə ümidləndirilməsi cəmiyyətdə böyük əks-səda yaratdı. Onu da vurğulayaq ki, Azərbaycan Respublikasının Prezidenti İlham Əliyev təmas xəttində yerləşən və düşmənin hədəfə aldığı və iriçaplı silahlardan zərbələr endirdiyi kəndlərə, yerlərə tək getməmişdi, həyat yoldaşı, ölkənin birinci xanımı, Heydər Əliyev Fondunun rəhbəri, millət vəkili Mehriban xanım Əliyeva ilə birgə getmişdi. Ölkə başçımızın bu addımı cəmiyyətdə alqışlarla qarşılandı. Bu, vətənpərvər və qətiyyətli dövlət başçısına xas olan xüsusiyyətdir. Tarixdən bəllidir ki, qüdrətli hökmdarlarımız ordunun qabağında gedib. İlham Əliyevin təmas xəttinə getməsi onu göstərdi ki, o əsl Ali Baş Komandandır və xalqını müdafiə edir. Xalqla, şəhid ailələri ilə ağır gündə bir olan ölkə başçımız bununla cəmiyyətdə xoş ab-hava yaratdı. Düşmən nə qədər təxribata əl atsa da, xalqımızın orduya inamını sarsıda bilmədi.

Məlum olduğu kimi, aprelin 7-də Azərbaycanın birinci xanımı, Heydər Əliyev Fondunun prezidenti Mehriban Əliyevanın adından Azərbaycan və Ermənistan qoşunlarının təmas xəttində ermənilərin təxribatının qarşısını alarkən qəhrəmanlıqla şəhid olan hərbçilərin ruhuna ehsan verildi. Mehriban Əliyeva şəhid ailələri ilə görüşdə bildirdi: "...Analara, valideynlərə, qohumlara Allah səbr versin. Yaralanmış, xəsarət almış əsgərlərimizə Allah şəfa versin. Bu gün bizim qəhrəman döyüşçülərimiz Vətən qarşısında müqəddəs borclarını şərəflə yerinə yetirirlər. Bu günlər bütün xalqımız həm qələbə sevinci, qələbə duyğusu, eyni zamanda, kədər hissi yaşayır. Əziz analar, mən bir ana kimi sizin qarşınızda baş əyirəm. Siz elə övladlar böyütmüsünüz ki, bu gün bütün xalq onlarla fəxr edir. Əlbəttə, heç bir ana istəməz ki, müharibə olsun, övladlarımız gənc yaşında dünyalarını dəyişsin. Azərbaycan dövləti Ermənistan-Azərbaycan, Dağlıq Qarabağ münaqişəsinin sülh yolu ilə həlli üçün artıq 20 ildən çoxdur ki, bütün səylərini göstərir. Biz istəyirik ki, torpaqlarımız azad edilsin. Biz istəyirik ki, insanlarımız öz doğma yurdlarına qayıtsın. Biz işğalçı deyilik. Biz işğalçı ilə mübarizə aparan millətik. Bizim heç bir başqa millətin, başqa xalqın torpağında gözümüz yoxdur. Biz, sadəcə, öz torpaqlarımızı işğaldan azad etmək istəyirik. Bu həqiqəti bütün dünya bilir və artıq qəbul etməlidir. Ədalətsiz, işğalçı siyasətin qarşısını almaq üçün bizim qəhrəman ordumuz, qəhrəman övladlarımız var. Azərbaycan xalqı üçün hər bir əsgərimiz dəyərlidir və əzizdir. Dünyanın ən böyük sərvəti olan ömrünü Vətən naminə qurban verən hər bir övladımız Azərbaycanın tarixində qəhrəman kimi yaşayacaq. Bu günlər bütün xalqımız ordumuza dəstək verir. Əziz analar, sizin qəlbinizdə yaşayan ağrı və kədər əminəm ki, hər bir Azərbaycan qadınının ürəyində yaşayır. Bir daha çox sağ olun. Çox sağ olun ki, belə övladlar böyütmüsünüz. Çox sağ olun ki, ömrünüzün ən ağır anlarını belə ləyaqətlə qəbul edirsiniz. Mən əminəm ki, ədalət bərpa olunacaq. Azərbaycan torpaqları işğaldan azad ediləcək, Azərbaycanın ərazi bütövlüyü bərpa olunacaq. Bütün qaçqınlarımız, məcburi köçkünlərimiz öz doğma torpaqlarına qayıdacaqlar. Bunun üçün biz güclü və birgə olmalıyıq. Əminəm ki, biz bu sınaqdan da birgə şərəflə çıxacağıq. Allah hər zaman Azərbaycanı qorusun!".

Mehriban xanımın şəhid ailələri ilə birgə olması onların analarına, bacılarına, həyat yoldaşlarına, övladlarına böyük ruh verdi. Bu addım cəmiyyət tərəfindən də müsbət qarşılandı.

Cəmiyyət aydın gördü ki, "Dördgünlük müharibə" cəbhə xəttində vəziyyəti Azərbaycanın xeyrinə dəyişdi. Bu da cəmiyyəti ruhlandırdı və sabaha inamını gücləndirdi. Fakt budur ki, bu hadisə Azərbaycan cəmiyyətinin də müharibəyə tam hazır olduğunu göstərdi və düşmənin mənəvi-psixoloji, hərbi cəhətdən zəif olduğunu ortaya qoydu.

Azərbaycan cəmiyyəti, dövləti və ordusu arasındakı bağlılıq, vəhdət bizi sürətlə qələbəyə aparır. Sabahımızı zəfərlərlə aç, Azərbaycan Ordusu!

İradə SARIYEVA

Yazı Azərbaycan Mətbuat Şurasının Azərbaycanlıların və Digər Türkdilli Xalqların Əməkdaşlıq Mərkəzi ilə birlikdə "Milli Ordumuzun aprel sınağı: vətənpərvərliyin Qarabağ vəhdəti və yeni qəhrəmanlıq salnaməsi" mövzusunda keçirdiyi müsabiqəyə təqdim edilir.

DİGƏR XƏBƏRLƏR

Tarix: 30.10.2026 / 06:41

Yəhudilər erməni monastırına tüpürdülər

Tarix: 29.10.2026 / 17:00

Bir Millət, İki Dövlət, Bir Ürək: Türkiyə Cümhuriyyətinin 103-cü ildönümü münasibətilə İctimai Nəzarət Təşkilatının Təbrik Bəyannaməsi

Tarix: 28.10.2026 / 12:51

ROZA TÖREKULOVNA AYTMATOVANIN ƏZİZ XATİRƏSİNƏ

Tarix: 28.10.2026 / 08:35

Türkiyədəki “sərmayə olayı” Pasifik Holding-i də vurdu - aktivləri donduruldu

Tarix: 28.10.2026 / 06:26

Türkiyədə səs-küylü “Starlink əməliyyatı” - 85 nəfər saxlandı

Tarix: 27.10.2026 / 13:54

"Bakı bu cür beynəlxalq forumlar vasitəsilə mədəniyyətlərarası dialoqa mühüm töhfə verə bilər" - Ozodbek Nazarbekov

Tarix: 27.10.2026 / 13:30

Penitensiar Xidmətə yeni rəis təyin edildi

Tarix: 27.10.2026 / 10:28

Dubay məhkəməsi Rusiya neftinin satışından 700 milyon dollardan çox vəsaiti dondurub - işin içində azərbaycanlılar da var…

Tarix: 26.10.2026 / 06:58

Vuçiç seçkidə məğlubiyyətini rəsmən bəyan etdi

Tarix: 24.10.2026 / 08:38

Serbiyada etirazlar pik həddə - gənclər Vuçiçi devirməyə qərarlıdır

Tarix: 22.10.2026 / 15:01

44 günün fövqündə: milli iradənin və tarixi yaddaşın təntənəsi

Tarix: 20.10.2026 / 22:19

İran XİN sözçüsü Azərbaycana tövsiyə verməyə qalxdı - həm də insan haqları mövzusunda…

VİDEO

Tarix: 17.10.2026 / 17:10

Aydın Quliyev Mətbuat Şurasında seçkilərə qatılmamasının səbəblərini qurultayda açdı... - VİDEO

Tarix: 27.11.2025 / 11:10

Biri ermənini öpür, biri sovet bayrağı qaldırır... Günümüzə baxın! - VİDEO

Tarix: 12.11.2025 / 11:05

Lavrov işdən kənarlaşdırılır, yoxsa oyun qurulur? - VİDEO

Tarix: 29.10.2026 / 17:35

Məhkəmə hakimlərinin yeni "Etik Qaydaları"nda bir vacib məqam unuduldu...

Tarix: 29.10.2026 / 17:05

Ramiz Mehdiyevin təltiflərdən məhrum edilməsinin hüquqi mexanizmləri var...

Tarix: 22.10.2026 / 19:54

Orta Dəhliz Avropa ilə Asiya arasında ən təhlükəsiz marşrut seçildi...

Turizm regionlarımızın inkişaf mənbələrindən birinə çevrilir...