Erməni mediasının məlumatına görə, Belqradda Serb Respublikasının Silahlı Qüvvələrinin keçmiş Baş Qərargah rəisi, general Ratko Mladiçlə vida mərasimi keçirilib.
RTS xəbər verir ki, mərasimdə vətəndaşlar, Mladiçin keçmiş silahdaşları və tərəfdarları, eləcə də Serbiya və Serb Respublikası rəsmiləri iştirak edib. Çıxış edənlər generalı serb xalqının tarixinin bir hissəsi və peşəkar hərbçi kimi təqdim ediblər.
Vida mərasimində Rusiya Elmlər Akademiyasının üzvü Yelena Quskova da çıxış edib. O, Mladiçi “görkəmli hərbi lider” adlandıraraq onun Serbiya tarixində qalacağını bildirib.
RTS-in məlumatına görə, Ratko Mladiç bazar ertəsi Belqradın Topçider qəbiristanlığında, 1994-cü ildə vəfat edən qızı Ananın məzarının yanında dəfn olunacaq. Dəfn mərasimindən əvvəl generalın cənazəsi Müqəddəs Luka kilsəsinə aparılacaq.
Ermənistan mediası və erməni ictimaiyyəti 1995-ci ildə Srebrenitsada minlərlə müsəlmanın qətli ilə əlaqələndirilən Ratko Mladiçə niyə belə rəğbət və hörmət göstərir? Hətta Rusiya Elmlər Akademiyasının üzvü Yelena Quskovanın onun vida mərasimində iştirak edərək Mladiçi “görkəmli hərbi lider” kimi təqdim etməsini necə izah etmək olar? Bu münasibət Ermənistanın insan haqları və müharibə cinayətləri məsələsindəki mövqeyi ilə ziddiyyət təşkil etmir?
Əli Orucov: "Erməniləri bu cinayətkarlarla mənəvi-ideoloji eyniliklər bağlayır"
Politoloq Əli Orucov məsələ ilə bağlı "Bakı-Xəbər" qəzetinə müsahibəsində bildirib ki, Ridko Mladiç bəşəriyyətə qarşı ən ağır cinayətlər törədən qatı cinayətkarlardan biridir. Ona Serb cəlladı və Bosniya qəssabı adı verilib. Onun fikrincə, bu serb generalı Srebriniçada 8 mindən çox günahsız müsəlmanın qətlində günahkar bilinərək Beynəlxalq Cinayət Məhkəməsinin Yuqoslaviya işi üzrə cinayət işində soyqırım, ağır hərbi cinayətlər və s.-də təqsiri sübuta yetirilərək ömürlük həbs cəzasına məhkum olunub: "Onun vəfat etməsi Serbiyada çox böyük hüznlə qarşılanıb. Qəribəsi odur ki, bu qatil millətçi serblər tərəfindən qəhrəman kimi qəbul edilir. Ermənilər və ruslar da ona qəhrəman kimi yanaşırlar. Ermənilərin Radko Mladiçə xüsusi simpatiya göstərməsi onların xislətindən doğur. R.Mladiçin Srebrenitsada törətdiyi qanlı əməllərin analoqunu ermənilər Xocalıda törədiblər. Bu ən ağır bəşəri cinayət - soyqırım cinayətidir. Ermənilər faşist Qaregin Njdeyə də sitayiş edir, onu milli qəhrəman kimi yüksəkdə tutur. Hətta abidə ucaldıblar, onun zəhərli ideologiyasını mənimsəyərək düşmənçilik toxumu yayırlar".
Siyasi şərhçi vurğulayır ki, erməniləri bu cinayətkarlarla həm də mənəvi-ideoloji eyniliklər bağlayır. Onun fikrincə, ermənilər özlərini dünyaya məsum, fağır, qədim və mədəni xalq kimi təqdim etməyə çalışsalar da, onların mahiyyəti və xarakteri məhz nifrət, qəzəb, irqçilik və terrordur.
Dəniz NƏSİRLİ
