Məhərrəm Zülfüqarlı: “Görünən odur ki, son illər bu sahəyə diqqət artırılır”
Məlum olduğu kimi, Prezident İlham Əliyev yanvarın 17-də dövlət ilk peşə-ixtisas təhsili müəssisələrində çalışan, bilik və bacarıqlarının diaqnostik qiymətləndirilməsi aparılmış müəllimlərin həftəlik dərs yükü normasının 1,5 dəfə, aylıq vəzifə maaşlarının orta hesabla 2 dəfə artırılmasına Sərəncam verib. Yenilik 2018-ci il yanvarın 1-dən tətbiq edilir.
Nazirlər Kabineti bilik və bacarıqlarının diaqnostik qiymətləndirilməsi aparılmış, dövlət ilk peşə-ixtisas təhsili müəssisələrində idarəetmə, təhsil və təlim fəaliyyəti ilə məşğul olan işçilərin aylıq vəzifə maaşlarının sxemini və məbləğlərini on beş gün müddətində təsdiq etməlidir.
Diaqnostik qiymətləndirmədən sonra Təhsil Nazirliyinin keçirdiyi mərkəzləşdirilmiş müsabiqə yolu ilə ilk peşə-ixtisas təhsili müəssisələrinə işə qəbul edilən, idarəetmə, təhsil və təlim fəaliyyəti ilə məşğul olan işçilər bilik və bacarıqlarının diaqnostik qiymətləndirilməsi aparılmış işçilərə bərabər tutulacaq.
Məlumat üçün qeyd edək ki, yanvarın 1-dən ötən il diaqnostik qiymətləndirmədən keçən 42 minə yaxın müəllimin əməkhaqqı artırılıb. Mərkəzləşdirilmiş müsabiqə yolu ilə dövlət ümumtəhsil müəssisələrinə işə qəbul olunan müəllimlər diaqnostik qiymətləndirilməsi aparılan müəllimlərə bərabər tutulur. 2017-ci ildə müəllimlərin işə qəbulu imtahanından uğurla keçib təyin olunan 6 minə yaxın müəllimin də əməkhaqqı artırılıb.
2014-cü ildən ölkə üzrə ümumilikdə 140 000-dək müəllim diaqnostik qiymətləndirmədən keçib.
Ümumilikdə, peşə-ixtisas təhsili müəssisələrində çalışan müəllimlərin maaşlarının 2 dəfə artırılmasına ekspertlərin münasibəti necədir? Bu, sözügedən sahədə tədrisin keyfiyyətinə nə kimi müsbət təsir göstərəcək?
Məsələyə münasibət bildirən təhsil sahəsi üzrə ekspert Məhərrəm Zülfüqarlı ölkə başçısının məlum qərarına müsbət prizmadan yanaşdı: “Peşə-ixtisas təhsili müəssisələrində çalışan müəllimlərlə bağlı belə bir qərarın verilməsi çox müsbət addımdır. Həmin təhsil ocaqlarında çalışan müəllimlər bunu alqışlayırlar. Fikrimcə, bu, həmin təhsil müəssisələrində tədrisin keyfiyyətinin daha da yaxşılaşmasına öz müsbət təsirini göstərəcək. Azərbaycan iqtisadiyyatı ildən-ilə güclənir. Yeni-yeni müəssisələr, zavod və fabriklər yaranır, turizm sahəsi genişlənir, kənd təsərrüfatı, tikinti sektoru sürətlə inkişaf edir. Bütün bunlar ixtisaslı fəhlə kadrların yetişdirilməsinə də diqqəti artırmağı tələb edir. Ölkədə ali və orta ixtisas təhsili ilə yanaşı, peşə təhsilinin də inkişafı zərurəti yaranır. İlk peşə-ixtisas təhsilinin əsas məqsədi geniş dünyagörüşünə malik, təşəbbüsləri, yenilikləri qiymətləndirməyi bacaran, nəzəri biliklərə yiyələnən, müasir təfəkkürlü və rəqabət qabiliyyətli mütəxəssis-kadrlar hazırlamaqdır. Hələ XIX əsrin ortalarından ölkəmizin bir sıra bölgələrində müxtəlif sahələr üzrə peşə təhsili müəssisələri fəaliyyət göstərib. Peşə təhsilinin inkişafının yüksəliş dövrü mərhum prezident Heydər Əliyevin hakimiyyət illərinə təsadüf edir. Həmin illərdə Azərbaycanda 300 peşə üzrə 100 mindən artıq şagirdin təhsil aldığı 185 peşə tədris müəssisəsinin fəaliyyət göstərməsi bu sahənin inkişafının bariz göstəricisi idi. Görünən odur ki, son illər bu sahəyə diqqət artırılır. Düşünürəm ki, bu, ölkədə qeyri-neft sektorunun inkişafına müsbət təsir göstərəcək. Hazırda Təhsil Nazirliyinin nəzdində 99 ilk peşə-ixtisas təhsili müəssisəsi fəaliyyət göstərir. Bu müəssisələrdə 5,5 mindən çox işçi çalışır. Respublikamızda fəaliyyət göstərən mövcud ilk peşə-ixtisas təhsili müəssisələri statuslar üzrə qruplaşdırılıb”.
Vidadi ORDAHALLI
